ព័ត៌មានអន្ដរជាតិ

ម៉ាឡេស៊ីរំពឹងពីកំណើននៃការនាំចេញទុរេនទៅចិន

បានផុស

២ សប្តាហ៍ មុន

នៅ

ថ្ងៃអង្គារ ៦ ឧសភា ២០២៥

ដោយ

ការនាំចេញទុរេនរបស់ម៉ាឡេស៊ីទៅកាន់ប្រទេសចិន ត្រូវបានព្យាករថានឹងកើនឡើងពី ១៥-២០ ភាគរយនៅឆ្នាំនេះ ដែលជំរុញដោយតម្រូវការអ្នកប្រើប្រាស់ខ្លាំង បើទោះបីជាមានបញ្ហាប្រឈមទាក់ទងនឹងធាតុអាកាសក៏ដោយ។ នេះបើតាមការចុះផ្សាយបន្តរបស់កាសែត VnExpress កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក Loh Wee Keng ប្រធានសភាពាណិជ្ជកម្ម និងឧស្សាហកម្មម៉ាឡេស៊ីក្នុងប្រទេសចិន តម្រូវការរបស់ចិនសម្រាប់ពូជទុរេនគុណភាពលេខ១ ដូចជា Musang King និង D24 បន្តកើនឡើងលើសពីការផ្គត់ផ្គង់។

លោកបានប្រាប់សារព័ត៌មានរដ្ឋម៉ាឡេស៊ី Bernama ថា៖ «ទោះបីជាភ្លៀងធ្លាក់ខ្លាំងនៅម៉ាឡេស៊ីធ្វើឱ្យផ្លែមួយចំនួនធ្លាក់ចុះមុនអាចបេះបានក៏ដោយ ខ្ញុំព្យាករថា បរិមាណនាំចេញសរុបនៅឆ្នាំនេះនឹងកើនឡើងពី ១៥-២០ ភាគរយ បើប្រៀបធៀបទៅនឹងឆ្នាំមុន»។

លោក Loh បានចង្អុលបង្ហាញថា ទុរេនលេខ១ ប្រភេទ Musang King ដែលគេដាំដុះច្រើននៅម៉ាឡេស៊ី ឥឡូវនេះមានតម្លៃ ៧,១២ ដុល្លារ/គីឡូក្រាម នៅចម្ការ ហើយតម្លៃអាចហក់ឡើងច្រើនជាង ២,៥ ដង ពេលចុងរដូវប្រមូលផល។

កាលពីឆ្នាំមុន ចិនបាននាំចូលទុរេនពីម៉ាឡេស៊ីក្នុងតម្លៃ ២១២ លានដុល្លារ។ ទោះបីជាម៉ាឡេស៊ីបាននាំចេញទុរេនទៅចិនតាំងពីឆ្នាំ ២០១០ ក្ដី ប្រទេសទាំង ២ ទើបតែចុះហត្ថលេខាលើពិធីសារពិសេសមួយស្តីពីការនាំចូលទុរេនកាលពីឆ្នាំមុនប៉ុណ្ណេះ ដោយត្រួសត្រាយផ្លូវសម្រាប់អ្នកនាំចេញរបស់ម៉ាឡេស៊ីទៅទីផ្សារលក់ទុរេនដ៏ធំរបស់ពិភពលោក។

គេមើលឃើញថា កំណើននៃការនាំចេញទុរេនម៉ាឡេស៊ី កើតឡើងចំពេលដែលចិនរឹតបណ្ដឹងការត្រួតពិនិត្យរកសារធាតុគីមីលើការនាំចូលទុរេនពីវៀតណាម និងថៃ ដែលធ្វើឱ្យទុរេននៅវៀតណាមជន់លិចទីផ្សារក្នុងស្រុក ហើយធ្លាក់ចុះតម្លៃខ្លាំង៕