សេដ្ឋកិច្ច

កសិករស្រុកអូររាំងឪ ថា ម្រះចុះថោក ដាំមិនចំណេញ ត្រូវសត្វមមាញខៀវស៊ីបំផ្លាញ

បានផុស

១ year មុន

នៅ

ថ្ងៃអាទិត្យ ១៨ ឧសភា ២០២៥

ដោយ

កសិករដាំម្រះ ក្នុងស្រុកអូររាំងឪ អះអាងថា នៅដើមរដូវវស្សាឆ្នាំនេះ ម្រះប្រឈមនឹងសត្វមមាញខៀវស៊ីបំផ្លាញ ដាំមិនចំណេញ ហើយតម្លៃទីផ្សារក៏ចុះថោកថែមទៀត។ ពួកគាត់បានប្រើថ្នាំបាញ់សម្លាប់សត្វមមាញនេះដែរ តែមិនអាចកម្ចាត់វាបានទេ ខណៈជំនាញកសិកម្មស្រុក /ខេត្ត បាត់មុខរយៈមួយឆ្នាំមកហើយ មិនឃើញចុះដល់មូលដ្ឋាននោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ប៊ូ ចន្ថា អាយុ ៥០ ឆ្នាំ រស់នៅភូមិក្បាលទឹក ឃុំព្រះធាតុ បានបញ្ជាក់ឲ្យដឹងថា ដីទំហំ ១៣ អារ ដាំពូជម្រះកូនជ្រូកវាឲ្យផលប្រមាណ ២ តោនដែរ តែនៅដើមរដូវវស្សានេះ ម្រះមិនសូវលូតលាស់ល្អទេ ដោយសារប្រឈមនឹងសត្វមមាញខៀវស៊ីបំផ្លាញ បណ្ដាលឲ្យ ស្លឹក ត្រួយ ផ្កា ចេញក្រហម ខ្លោចស្លឹក ម្រះបាត់បង់ក្ដឹប ផ្លែ តែម្ដង។ ការប្រើប្រាស់ថ្នាំបាញ់សម្លាប់វាយ៉ាងណាក៏មិនអាចកម្ចាត់វាបានដែរ បច្ចុប្បន្ន កសិករដាំដុះមិនសូវបានផលទេ។

អ្នកស្រី ចន្ថា បានបន្តទៀតថា បើប្រៀបធៀបនឹងឆ្នាំទៅ ម្រះឲ្យផលចាញ់ឆ្នាំទៅ ហើយទីផ្សារចុះតម្លៃថែមទៀត។ ម្រះប្រមូលផលដំបូងលក់បានតម្លៃតែ ៦ រយរៀល ក្នុង ១ គីឡូក្រាម ឥលូវលក់បាន ១ ពាន់រៀល ទូទាត់សោហ៊ុយមិនចំណេញទេ។ ឆ្នាំទៅ ប្រមូលផលដំបូងលក់បាន ១ ពាន់ ២ រយរៀល ទៅ ២ ពាន់រៀល ឯណោះ។ ម្រះអាចដាំបាន ៣ ដង ក្នុង ១ ឆ្នាំ ក្នុងភូមិក្បាលទឹកនេះ មានកសិករដាំម្រះមានចំនួនតែ ៤ គ្រួសារទេ ហើយកសិករជាច្រើនគ្រួសារទៀត បានប្រកបរបរកសិកម្មដំណាំផ្សេងៗ មាន ស្រូវ ដំឡូង ជី រំដេង ត្រសក់ ត្រឡាច ននោង សណ្តែក … ។ល។ សម្រាប់ផ្គត់ផ្គង់គ្រួសារផងដែរ៕

អត្ថបទ ៖ សាន វិឡែម