ព័ត៌មានជាតិ

ផែស្វយ័តភ្នំពេញរកចំណូលបានជាង១៧លានដុល្លារក្នុងរយៈពេល៥ខែឆ្នាំនេះ

បានផុស

១០ ខែ មុន

នៅ

ថ្ងៃពុធ ១៨ មិថុនា ២០២៥

ដោយ

កំពង់ផែស្វយ័តភ្នំពេញ (PPAP) ដែលជាក្រុមហ៊ុនចុះបញ្ជីនៅផ្សារមូលបត្រកម្ពុជា (CSX) រកចំណូលបានចំនួន១៧,៥លានដុល្លារ បានកើនឡើង ២២ ភាគរយ នៅក្នុងរយៈពេល៥ខែឆ្នាំ ២០២៥ ធៀបនឹងរយៈពេលដូចគ្នាកាលពីឆ្នាំ ២០២៤។ នេះបើយោងតាមសេចក្តីប្រកាសរបស់ PPAP។

របាយការណ៍មិនបានធ្វើសវនកម្ម ដែល PPAP ផ្ញើទៅផ្សារមូលបត្រកម្ពុជាកាលពីម្សិលមិញឱ្យដឹងថា ក្នុងរយៈពេល៥ខែដើមឆ្នាំ ២០២៥ កំពង់ផែស្វយ័តភ្នំពេញ រកចំណូលសរុបបានជាង១៧,៥២លានដុល្លារ កើន ២២ ភាគរយធៀបទៅរយៈពេលដូចគ្នាកាលពីឆ្នាំ ២០២៤ដែលមានទឹក្រាក់១៤,៤លានដុល្លារ។

របាយការណ៍ឱ្យដឹងទៀតថា ជាមួយនឹងកំណើនដ៏ខ្ពស់នេះ គឺបានមកពីការរួមចំណែកយ៉ាងច្រើនពីចំណូលពីប្រតិបត្តិការផែ (Port Operation) ដែលមានចំនួន១៤,៣៦លានដុល្លារ កើនឡើង ២៣ភាគរយពីចំនួន ១១,៦៨ លានដុល្លារ កាលពីរយៈពេលដូចគ្នាកាលពីឆ្នាំ ២០២៤។ ចំណូលពីអាជ្ញាធរផែ (Port Authority) មានចំនួនជាង ២,៥៨ លានដុល្លារ កើនឡើង២៣ភាគរយ ពីចំនួនជាង ២ លានដុល្លារ និងចំណូលពីសេវាកម្មផ្សេងៗ (Other Services) មានចំនួន ៥៧៤ ៣៤៨ ដុល្លារ ថយ ១០ ភាគរយ ពីចំនួន ៦៣៧ ៣៦៨ ដុល្លារ ។

លោក ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) បានប្រាប់កម្ពុជាថ្មីកន្លងមកនេះថា ចាប់តាំងពីមានការផ្ទុះរាលដាលជំងឺកូវីដ ១៩ ថមថយ និងទោះបីជាការបន្តឡើងកំដៅនៃបញ្ហាភូមិសាស្រ្តនយោបាយ ការដឹកជញ្ជូនលើគ្រប់មធ្យោបាយមានសភាពដូចមុនបន្តិច ដោយសារតែស្ថានភាពសេដ្ឋកិច្ចសកលនិងក្នុងតំបន់ហាក់ល្អប្រសើរ។ ការរក្សាបាននូវភាពវិជ្ជមានទោះក្នុងកម្រិតទាប ក៏ជារឿងល្អផងដែរនៅក្នុងដំណាក់កាលនេះ។

ជាមួយគ្នានេះដែរ PPAP ក៏បានរាយកណ៍អំពីកំណើនទំនិញឆ្លងកាត់ផែក្នុងរយៈពេល៥ខែឆ្នាំនេះមានកើនឡើងជាង២០% ដែលក្នុងនោះបរិមាណទំនិញ ប្រេងឥន្ធនៈឆ្លងកាត់ផេមានជាង២លានតោនក្នុងរយៈពេល៥ខែកន្លងមកនេះ កើនឡើងជាង២១% ធៀបទៅនឹងជាង ១,៧ លានតោនក្នុងរយៈពេលដូចគ្នាកាលពីឆ្នាំមុន។ ជាមួយគ្នានេះដែរ បរិមាណកុងតឺនរ័ឆ្លងកាត់មានចំនួន ២០៦ ០៥៥ ធីអ៊ីយូ កើនឡើងជិត២៨%; បរិមាណនាវាសរុបមានចំនួន ១ ៤៧៨គ្រឿងកើន ១,៤៤%; បរិមាននាវាដឹកអ្នកដំណើរចូលមានចំនួន ១៨៤គ្រឿង កើនជិត៤% និងចំនួនអ្នកដំណើរឆ្លងកាត់សរុបចំនួន ១៩ ៦៩៥នាក់ កើនជិត១០%។

កាលពីឆ្នាំ២០២៤កន្លងទៅនេះ កំពង់ផែស្វយ័តភ្នំពេញរកចំណូលបានសរុបជាង៤១លានដុល្លារ កើនឡើងជាង ២០%ធៀបនឹងឆ្នាំ២០២៣ដែលមានចំណូលសរុបជាង ៣៤លានដុល្លារ។ នេះបើយោងតាមរបាយការណ៍ចំណូលមិនទាន់ធ្វើសវនកម្មរបស់ខ្លួន៕