ក្រុមហ៊ុនថៃអាចនាំចូលមកកម្ពុជាតាមរយៈឡាវ និងផ្លូវទឹក ខណៈតានតឹងតាមព្រំដែនគោក

ចំពេលភាពតានតឹងព្រំដែនកម្ពុជា-ថៃបន្តហក់ឡើង ដែលរំខានដល់ដំណើរការពាណិជ្ជកម្មតាមច្រកព្រំដែនគោករវាងប្រទេសទាំង២ ក្រុមហ៊ុនថៃដែលមានអាជីវកម្មក្នុងស្រុកខ្មែរ រួមទាំង​ក្រុមហ៊ុនផ្គត់ផ្គង់ផលិតផល​ប្រើប្រាស់ កំពុងត្រៀមសម្រាប់ផលប៉ះពាល់ ក៏ដូចជាគ្រោងនឹង​ផ្លាស់ប្ដូរផ្លូវដឹកជញ្ជូនរបស់ខ្លួន ទោះបីជាថ្លៃដើមកើនឡើងក៏ដោយ​។

កាសែត The Nation បាន​រាយការណ៍ពីបញ្ហា​នេះ ក្រោយ​យោធាថៃបិទព្រំដែនដីគោកទាំងអស់ជាមួយ​កម្ពុជា ក្នុងការសម្រេចចិត្តជាឯកតោភាគី ដែលបង្កការឆ្លើយដូចគ្នាពីភាគីកម្ពុជា។ កម្ពុជាបាន​​ផ្អាកការនាំចូលប្រេង និងឧស្ម័នឥន្ធនៈ ក៏ដូចជា​បន្លែផ្លែឈើ ផ្តាច់អគ្គិសនី និងអ៊ិនធឺណិត​ ដើម្បីឆ្លើយបកទៅនឹងការរំខានសកម្មភាពតាមច្រកព្រំដែន និងការគំរាមកាត់ផ្ដាច់របស់ថៃ​។

ក្រុមហ៊ុនថៃដែលកំពុងប្រតិបត្តិការក្នុងប្រទេសកម្ពុជា កំពុងអនុវត្តផែនការបន្តអាជីវកម្ម ​គ្រប់គ្រងបុគ្គលិក ​គ្រប់គ្រងខ្សែច្រវ៉ាក់ផ្គត់ផ្គង់ និង​សម្របសម្រួលជាមួយអាជ្ញាធរកម្ពុជា។ ក្រុមហ៊ុនមួយចំនួនបានចាប់ផ្តើមធ្វើមាតុភូមិនិវត្តន៍បុគ្គលិកថៃ ក្រោមហេតុផល «ដើម្បីសុវត្ថិភាព»។

ប្រធានក្រុមប្រឹក្សាធុរកិច្ចថៃ-កម្ពុជា លោក Voratat Tantimongkolsuk បានកត់សម្គាល់ថា ការបិទព្រំដែនបានប៉ះពាល់ដល់ពាណិជ្ជកម្មឆ្លងដែន និងសេដ្ឋកិច្ច​មូលដ្ឋាន​ក្នុងខេត្តចំនួន ៧ ។ ជាមួយនឹងការកាត់ផ្តាច់​ការប្រើប្រាស់ព្រំដែនគោក​ អាជីវកម្មថៃនៅមានជម្រើសចម្បង ២ ដែលរួមមាន​ការដឹកជញ្ជូនតាមប្រទេសឡាវចូលមកកម្ពុជា និងការដឹកជញ្ជូនតាមផ្លូវទឹក។ កន្លងមក មាន​សេចក្ដីរាយការណ៍រួចហើយអំពីការណ៍ដែលថា ក្រុមហ៊ុនថៃផ្សេងៗ ដូចជាក្រុមហ៊ុនមី «​MAMA»  បាន​ពិចារណាលើការផ្លាស់ប្ដូរផ្លូវដឹកជញ្ជូន ប្រសិន​បើ​ការរំខានព្រំដែនដីគោកបន្តអូសបន្លាយរយៈពេលយូរ។

ចំពោះតាមឡាវ ក្រុមហ៊ុនថៃអាចដឹកជញ្ជូនពីខេត្ត Ubon Ratchathani ចូលទៅខេត្តប៉ាក់សេរបស់ឡាវ ហើយបន្តរហូតមកដល់កម្ពុជា កាត់តាមច្រកខេត្តស្ទឹងត្រែង ឆ្ពោះមកភ្នំពេញ។ តាមផ្លូវសមុទ្រ ក្រុមហ៊ុនថៃអាចដឹកពីផែថៃមកដល់កំពង់ផែខេត្តព្រះសីហនុ។

បន្ទុកភស្តុភារ តាមរយៈកំណើននៃការចំណាយសម្រាប់ដឹកជញ្ជូនគឺធំ។ ផ្លូវដឹកជញ្ជូនដែលពីមុនមានចម្ងាយ ៥០០ គីឡូម៉ែត្រ ឆ្លងកាត់ខេត្តស្រះកែវ ​មកច្រកប៉ោយប៉ែត ឥឡូវនេះ​ត្រូវអូសបន្លាយរហូតដល់ ១ ៥០០ គីឡូម៉ែត្រ ដែលបង្កើនថ្លៃដឹកជញ្ជូនដល់ទៅ ៣ ដង។ ​ប្រការនេះ​អាចបង្ខំអ្នកទិញកម្ពុជា​ ឱ្យផ្លាស់ប្ដូរទៅរកប្រភព​ផ្គត់ផ្គង់ថ្មី ​ឬបណ្តាលឱ្យក្រុមហ៊ុនផលិតថៃមួយចំនួនពន្យារពេលការដឹកជញ្ជូន ឬផ្អាកប្រតិបត្តិការ ជាពិសេសសម្រាប់រោងចក្រនៅកម្ពុជាដែលពឹងផ្អែកលើវត្ថុធាតុដើមថៃ ខណៈក្រុមហ៊ុនថៃរងការប្រកួតប្រជែងកាន់តែខ្លាំង៕