ព័ត៌មានអន្ដរជាតិ

សកម្មភាពចោរសមុទ្រនៅអាស៊ីអាគ្មេយ៍ កើនឡើងជាង ៨០% ឆ្នាំនេះ

បានផុស

១ year មុន

នៅ

ថ្ងៃសុក្រ ១១ កក្កដា ២០២៥

ដោយ

ទិន្នន័យពីក្រុមប្រឆាំងចោរសមុទ្រអន្តររដ្ឋាភិបាលឈ្មោះ ReCAAP បានឱ្យដឹងថា ចោរកម្មតាមសមុទ្រ និងការប្លន់ប្រដាប់អាវុធលើកប៉ាល់នៅអាស៊ីអាគ្នេយ៍ បានកើតឡើងចំនួន ៩៣ ករណី នៅឆមាសទី១ឆ្នាំនេះ ដោយកើនឡើង ៨៣ ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចោរកម្មសមុទ្រភាគច្រើនបានកើតឡើងនៅច្រកសមុទ្រម៉ាឡាកា និងសិង្ហបុរី ដែលរួមចំណែកប្រមាណ ៨០ ករណី ចន្លោះពីខែមករា ដល់ខែមិថុនា ធៀបនឹងប្រមាណត្រឹម ២១ ករណី ក្នុងរយៈពេលដូចគ្នាកាលពីឆ្នាំមុន ក្នុងតំបន់ទាំងនេះ។ បែបនេះហើយ ទើបច្រកសមុទ្រម៉ាឡាកា និងសិង្ហបុរី ក្លាយជាផ្លូវទឹកគួរឱ្យព្រួយបារម្ភសម្រាប់សកម្មភាពរបស់ចោរសមុទ្រ។

ReCAAP ដែលមានឈ្មោះពេញថា «កិច្ចព្រមព្រៀងសហប្រតិបត្តិការក្នុងតំបន់ស្តីពីការប្រយុទ្ធប្រឆាំងនឹងចោរកម្មសមុទ្រ និងការប្លន់ប្រដាប់អាវុធលើកប៉ាល់នៅអាស៊ី បាននិយាយថា ៩ ក្នុងចំណោម ១០ ករណីចោរកម្មសមុទ្រ កើតឡើងនៅពេលយប់ងងឹត។

ក្រុមប្រឆាំងចោរសមុទ្រ ដដែល បានឱ្យដឹងទៀតថា មិនមានភស្តុតាងណាដែលបង្ហាញថា ក្រុមចោរសមុទ្រកំណត់គោលដៅនៃកប៉ាល់របស់ប្រទេសណាមួយនោះទេ ប៉ុន្តែថា ចោរកម្មភាគច្រើនមានទំនោរកើតឡើងលើកប៉ាល់ដែលបើកយឺត ឬមាននាវិកកប៉ាល់ដែលខ្វះការប្រុងប្រយ័ត្ន។

ReCAAP បានឱ្យដឹងទៀតថា ពាក់កណ្តាលនៃ ៨០ ករណី នៃចោរកម្មនៅច្រកម៉ាឡាកា និងសិង្ហបុរី ពុំមានអ្វីដែលត្រូវបានលួចនោះទេ ប៉ុន្តែ ២៩ ភាគរយ នៅក្នុងនោះ ចោរសមុទ្របានប្លន់យកគ្រឿងបន្លាស់មាស៊ីនផ្សេងៗ៕