សេដ្ឋកិច្ច

ក្រុមហ៊ុនបារាំង SCA ត្រៀមដាក់បុគ្គលិក ១០០០ នាក់ នៅអាកាសយានដ្ឋានអន្តរជាតិតេជោ

បានផុស

១១ ខែ មុន

នៅ

ថ្ងៃពុធ ២៣ កក្កដា ២០២៥

ដោយ

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល បានប្រាប់ឱ្យដឹងថា ក្រុមហ៊ុនបារាំងដែលទទួលបានសិទ្ធិគ្រប់គ្រងសេវាកម្មមួយចំនួន នៅអាកាសយានដ្ឋានអន្តរជាតិតេជោ នឹងប្រើប្រាស់បុគ្គលិកប្រមាណ ១០០០ នាក់។ ក្នុងចំណោមបុគ្គលិក ១០០០ នាក់ មានខ្មែរ ៩០%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ីន ចាន់សិរីវុត្ថា បានលើកឡើងក្នុងពេលចូលរួមពិធីចុះហត្ថលេខាលើកិច្ចព្រមព្រៀងផ្ដល់សិទ្ធិទៅដល់ក្រុមហ៊ុន SCA ផ្ដល់សេវាកម្មមួយចំនួននៅអាកាសយានដ្ឋានអន្តរជាតិតេជោនៅថ្ងៃទី ១០ ខែកក្កដា ឆ្នាំ ២០២៥។

លោក ស៊ីន ចាន់សិរីវុត្ថា យល់ឃើញថា៖ «អាកាសយានដ្ឋានមួយៗ ត្រូវមានក្រុមប្រតិបត្តិករដែលមានវិជ្ជាជីវៈ និងបទពិសោធន៍ ក្នុងការគ្រប់គ្រង និងប្រតិបត្តិអាកាសយានដ្ឋាន ក្រុមហ៊ុនមានធនធាន និងបទពិសោធន៍ច្រើនឆ្នាំស្រាប់ គឺ ៣០ ឆ្នាំ ក្រោមកិច្ចព្រមព្រៀងនេះ នឹងធ្វើឱ្យអាកាសយានដ្ឋានលេចមុខមាត់ពីការផ្ដល់សេវាកម្មកាន់តែប្រសើរឡើង និងកាន់តែលេចធ្លោឡើងក្នុងតំបន់ និងសកលលោក»។

អាកាសយានដ្ឋានអន្តរជាតិតេជោលំដាប់ 4F តម្លៃ ២ ពាន់លានដុល្លារ ដំណាក់កាលទី១ បានបិទបញ្ចប់ការសាងសង់ ទាំងស្រុង និងត្រៀមបើកឱ្យដំណើរការនៅថ្ងៃទី ០៩ ខែកញ្ញា ឆ្នាំ ២០២៥។

យោងតាមអាកាសចរស៊ីវិល នៅក្នុងឆមាសទី១ ឆ្នាំ ២០២៥ កម្ពុជាទទួលបានអ្នកដំណើរចេញ-ចូលតាមផ្លូវអាកាសជាង ៣,៦ លាននាក់ កើនឡើង ២០% ធៀបនឹងរយៈពេលដូចគ្នា កាលពីឆ្នាំ ២០២៤។

រដ្ឋលេខាធិការដ្ឋានអាកាសចរណ៍ស៊ីវិលបានព្យាករណ៍ថា ការដឹកជញ្ជូនអ្នកដំណើរតាមផ្លូវអាកាសនឹងកើនដល់ចំនួន ៧,៥លាននាក់ នៅក្នុងឆ្នាំ ២០២៥នេះ៕