សេដ្ឋកិច្ច

លោក ត្រាំ ឱ្យចាប់ផ្ដើមចរចាពន្ធបដិកាជាមួយកម្ពុជា-ថៃ ក្រោយបទឈប់បាញ់

បានផុស

៣៧ វិនាទី មុន

នៅ

ថ្ងៃអង្គារ ២៩ កក្កដា ២០២៥

ដោយ

ប្រធានាធិបតីអាមេរិក លោក ដូណាល់ ត្រាំ បានណែនាំឱ្យមន្ត្រីអាមេរិក ចាប់ផ្ដើមកិច្ចពិភាក្សាឡើងវិញជាមួយកម្ពុជា និងថៃ បន្ទាប់ពីប្រទេសទាំងពីបានយល់ព្រមបទឈប់បាញ់នៅថ្ងៃទី ២៩ ខែកក្កដា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ដូណាល់ ត្រាំ បានលើកឡើងតាមបណ្ដាញសង្គមហ្វេសប៊ុកផេកផ្លូវការថា៖ «យើងបានសង្គ្រោះជីវិតរាប់ពាន់នាក់ ខ្ញុំបានណែនាំឱ្យក្រុមមន្ត្រីពាណិជ្ជកម្មចាប់ផ្ដើមចរចាជុំវិញពាណិជ្ជកម្ម»។

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជាបានឱ្យដឹងថា លទ្ធផលចរចាពន្ធបដិការកម្ពុជា-អាមេរិក សង្ឃឹមមានពន្លឺថ្មី ពោលគឺក្រោម ៣៦% ខណៈកម្ពុជាបានចរចាដោយបើកចំហ និងស្មោះត្រង់ជាមួយភាគីអាមេរិក។

ក្រុមការងារចំពោះកិច្ច បានបញ្ជូនឯកសារទាំងអស់ពាក់ព័ន្ធនឹងការចរចាពន្ធបដិការទៅសហរដ្ឋអាមេរិកកាលពីថ្ងៃទី ១៦ ខែកក្កដា ឆ្នាំ ២០២៥។

លោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់បន្ថែមថា តំណាងពាណិជ្ជកម្មសហរដ្ឋអាមេរិក បានពិភាក្សាគ្នារួចហើយ និងធ្វើរបាយការណ៍ដាក់ជូនទៅប្រធានាធិបតីលោក ដូណាល់ ត្រាំ ហើយសង្ឃឹមថា មិនយូរទេ នៅថ្ងៃ ០១ ខែសីហាខាងមុខនេះ នឹងឯកភាពគ្នាហើយ។

លោក ស៊ុន ចាន់ថុល បន្ថែមថា៖ «យើងសង្ឃឹមថា សប្ដាហ៍ក្រោយ យើងនឹងទទួលព័ត៌មានពីសហរដ្ឋអាមេរិកអំពីអត្រាពន្ធបដិការ ហើយបើយើងមើលប្រទេសជិតខាង ប្រទេសហ្វីលីពីនបានចុះពី២០ មក ១៩% ប្រទេសជប៉ុនចុះពី ២៥% មកនៅត្រឹម ១៥% អញ្ចឹងពេលចរចាយើងខ្ញុំក៏បានសំណូមពរស្វិតស្វាញ សុំឱ្យពន្ធបដិការកម្ពុជា មានភាពប្រកួតប្រជែងជាមួយប្រទេសនៅជុំវិញយើង ដែលជាដៃគូនៅជុំវិញយើងនេះ បើយើងខ្ពស់ យើងមានការលំបាកក្នុងការប្រកួតប្រជែង»។

កាលពីថ្ងៃទី ០៧ ខែកក្កដា ប្រធានាធិបតីអាមេរិក លោក ដូណាល់ ត្រាំ បានផ្ញើលិខិតជូនសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បញ្ជាក់ពីការបញ្ចុះពន្ធបដិការពី ៤៩% មកអត្រា ៣៦% លើទំនិញរបស់កម្ពុជាដែលនាំចូលទៅអាមេរិក ដែលនឹងចាប់ផ្ដើមអនុវត្តពីថ្ងៃទី ០១ ខែសីហា បន្ទាប់ពីកម្ពុជាចរចាតាមប្រព័ន្ធអនឡាញ និងជួបផ្ទាល់ជាមួយតំណាងពាណិជ្ជកម្មអាមេរិកចំនួន ២ដង។

យោងតាមក្រសួងពាណិជ្ជកម្ម នៅក្នុងឆមាសទី១ ឆ្នាំ ២០២៥ កម្ពុជាបាននាំចេញផលិតផលកាត់ដេរ និងមុខទំនិញសំខាន់ៗ ទៅអាមេរិកក្នុងទំហំទឹកប្រាក់ជាង ៥,៥ ពាន់លានដុល្លារ កើនឡើង ២៥,៦% ធៀបនឹងរយៈពេលដូចគ្នានៅឆ្នាំ ២០២៤។ ចំណែកអាមេរិកនាំចូលមកវិញមានទំហំជាង ១៦០ លានដុល្លារ កើនឡើង ២៩%។

នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-អាមេរិកសម្រេចបានទឹកប្រាក់ជាង ១០ ពាន់លានដុល្លារកើនឡើង ១១% ធៀបនឹងឆ្នាំ ២០២៣ ក្នុងនោះ កម្ពុជានាំចេញទំនិញទៅអាមេរិកមានតម្លៃ ៩,៩១ ពាន់លានដុល្លារ កើនឡើង ១១,៤% និងទំនិញអាមេរិកនាំចូលមកកម្ពុជាតម្លៃជាង ២៦៤ លានដុល្លារ កើន ២%។

ទំនិញដែលកម្ពុជានាំចេញទៅអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និងសម្ភារប្រើប្រាស់មួយចំនួនទៀត។ ចំណែកអាមេរិកនាំចូលមកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត៕

អត្ថបទ៖ ឡេង ដេត