ពន្ធត្រាំ ៥០% លើឥណ្ឌា គ្រោងចូលជាធរមាន​នៅថ្ងៃត្រង់នេះ

ពន្ធ ៥០ ភាគរយ ដែលប្រធានាធិបតីសហរដ្ឋអាមេរិក លោក ដូណាល់ ត្រាំ ប្រកាសដាក់លើទំនិញនាំចូលពីឥណ្ឌា គ្រោង​នឹងចូលជាធរមាននៅថ្ងៃទី ២៧ ខែសីហា នេះ ទោះបីជាការចរចាមិនទាន់បាន​សម្រេចផ្លែផ្កា។

​នៅដើមខែសីហា លោក ត្រាំ បាន​ប្រកាសដាក់ពន្ធ ២៥ ភាគរយ បន្ថែមពីលើពន្ធបដិការ ២៥​ ភាគរយ ដែល​មាន​ស្រាប់ ដោយ​ទាមទារឱ្យ​ឥណ្ឌា​ឈប់ទិញប្រេង​ឆៅរុស្ស៊ី ដើម្បីដាក់គំនាបរុស្ស៊ីឱ្យបញ្ចប់សង្រ្គាមឈ្លានពានអ៊ុយក្រែន។

តាមការចុះផ្សាយរបស់កាសែត Times of India នៅថ្ងៃពុធនេះ ក្រសួងសន្តិសុខមាតុភូមិអាមេរិក បានចេញផ្សាយសេចក្តីព្រាងច្បាប់មួយដោយនិយាយថា ពន្ធបន្ថែម ២៥ ភាគរយ​ នឹងអនុវត្តលើទំនិញឥណ្ឌា «ដែលនាំចូល​សម្រាប់ប្រើប្រាស់ ឬដកពីឃ្លាំងសម្រាប់ប្រើប្រាស់ នៅ/ក្រោយ ម៉ោង ០០ និង ០១ នាទី ព្រឹក ម៉ោងនៅភាគខាងកើត (ម៉ោង ១១ និង ០១ នាទី ព្រឹកនៅកម្ពុជា) ​ថ្ងៃទី ២៧ ខែសីហា ឆ្នាំ ២០២៥។

មកទល់ពេលនេះ មិនទាន់មាន​សញ្ញាណាមួយ​ដែលថា សហរដ្ឋអាមេរិក​នឹង​ដកពន្ធខ្ពស់របស់ខ្លួន​វិញទេ ខណៈឥណ្ឌា​បាន​ទទូចនាពេល​កន្លងមកថា ការទិញប្រេងរុស្ស៊ីធ្វើឡើងដើម្បីសម្រេច​បាន​នូវសន្តិសុខថាមពលក្នុងស្រុកសម្រាប់ប្រជាជន​ជាងជាង ១,៤ ប៊ីលាន​នាក់របស់ខ្លួន​។

ជាថ្មីម្ដងទៀត ថ្លែងក្នុងកិច្ចប្រជុំគណៈរដ្ឋមន្ត្រីនៅសេតវិមានកាលពីថ្ងៃ​អង្គារ​ លោក ត្រាំ បាន​គំរាមកំហែង​ឥណ្ឌាជាថ្មីចំពោះការដាក់ពន្ធខ្ពស់​ ហើយ​បដិសេធមិនបន្តកិច្ចព្រមព្រៀងពាណិជ្ជកម្ម លុះត្រាតែជម្លោះជាមួយ​ប៉ាគីស្ថានត្រូវបានដោះស្រាយ​។

គួរគូសបញ្ជាក់ថា ពាណិជ្ជកម្មទំនិញ និងសេវាកម្មរបស់សហរដ្ឋអាមេរិកជាមួយឥណ្ឌា មានចំនួនសរុបប្រមាណ ២១២,៣ ​ប៊ីលានដុល្លារក្នុងឆ្នាំ ២០២៤។ ជាលម្អិត ទំហំពាណិជ្ជកម្មទំនិញទ្វេភាគីមាន​ប្រមាណ ១២៨,៩ ប៊ីលាន​ដុល្លារ ដោយក្នុងនោះអាមេរិក​ទទួលរងនូវឱនភាពពាណិជ្ជកម្ម​ ៤៥,៨ ​ប៊ីលានដុល្លារ​។ ជាមួយ​គ្នានោះ ពាណិជ្ជកម្មសេវាកម្មសរុប​ទ្វេភាគី មានចំនួនសរុបប្រមាណ ៨៣,៤ ប៊ីលាន​ដុល្លារ ដោយអាមេរិកទទួលបាន​នូវ​អតិរេកពាណិជ្ជកម្មសេវាកម្ម​ប្រមាណ ១០២ លាន​ដុល្លារ៕