អត្រាអត់ការងារធ្វើក្នុងចំណោមយុវជនចិនកើនឡើង ចំពេលសេដ្ឋកិច្ចយឺតយ៉ាវ

អត្រាគ្មានការងារធ្វើរបស់យុវជននៅក្នុង​ក្រុងរបស់ប្រទេសចិន បានកើនឡើងកាលពីខែមុន ដល់កម្រិតខ្ពស់បំផុតរាប់តាំងពីឆ្នាំ ២០២៣ ​ដោយសារតែកម្សោយ​នៃទីផ្សារការងារ និងកម្សោយនៃសន្ទុះកំណើនសេដ្ឋកិច្ចចិន។ នេះបើតាមការចុះផ្សាយរបស់កាសែត South China Morning Post។

ទិន្នន័យ​របស់ការិយាល័យស្ថិតិជាតិចិន ដែលចេញផ្សាយកាលពីថ្ងៃពុធ បាន​បង្ហាញថា អត្រា​អត់ការងារធ្វើសម្រាប់​ប្រជាជន​ចិន ដែលមានអាយុពី ១៦-២៤ ឆ្នាំ ​ដោយមិនរាប់បញ្ចូលសិស្ស បានកើនឡើងដល់ ១៨,៩ ភាគរយ នៅខែសីហា ធៀបនឹង​ ១៧,៨ ភាគរយ នៅខែកក្កដា។ ​

គួររំឭកថា ក្រោយ​អត្រាអត់ការងារធ្វើរបស់យុវជនចិនកើនដល់កម្រិតខ្ពស់បំផុត ២១,៣ ភាគរយ នៅខែមិថុនា ​ឆ្នាំ ២០២៣ រដ្ឋាភិបាលបាន​ឈប់ចេញផ្សាយទិន្នន័យប្រចាំខែរយៈពេល ៥ ខែ។ ក្រោយ​មក នៅខែធ្នូ ឆ្នាំដដែល ​រដ្ឋាភិបាល​បានណែនាំវិធី​គណនាអត្រា​អត់ការងារថ្មី ដោយ​មិនរាប់បញ្ចូលសិស្សពេញម៉ោង។

នៅរដូវក្តៅឆ្នាំ ២០២៥ នេះ​ និស្សិតសាកលវិទ្យាល័យចំនួន ១២,២ ​លាននាក់បានបញ្ចប់ការសិក្សា ហើយចូលប្រឡូកទៅក្នុង​ទីផ្សារការងារ ដែលចុះខ្សោយ​ដោយសារតែផលប៉ះពាល់​ពីបរិត្តផរណា និងភាពមិនប្រាកដប្រជាជាសកល។ ​ប្រជាជនចិន​ជាច្រើនកំពុង​ពិបាក​ស្វែងរកការងារ ដែលត្រូវនឹងលក្ខណៈសម្បត្តិរបស់ពួកគេ។

សហការីនៅមជ្ឈមណ្ឌល Asia Society’s Analysis for China លោក Barclay Bram បានសរសេរ​ក្នុងរបាយការណ៍​កាលពីដើមខែនេះថា លក្ខខណ្ឌម៉ាក្រូសេដ្ឋកិច្ចដ៏លំបាករបស់​ចិន រួមទាំងសង្រ្គាមពាណិជ្ជកម្ម ការធ្លាក់ចុះនៃ​វិបត្តិអចលនទ្រព្យ និងសម្ពាធបរិត្តផរណា បានបង្ខំឱ្យនិស្សិតបញ្ចប់ការសិក្សាមួយចំនួន​ត្រូវធ្វើការខុសជំនាញ​ ដូចជាការងារដឹកជញ្ជូនជាដើម៕

​