SERC និង KSFC ចុះហត្ថលេខា បន្តការអនុវត្ត MoU ដើម្បីរួមគ្នាអភិវឌ្ឍន៍វិស័យមូលបត្រ

នៅ​ក្នុង​សនិ្នសីទអន្តរជាតិគម្រប់ខួប ៧០ ឆ្នាំ របស់សាជីវកម្មហិរញ្ញប្បទានមូលបត្រកូរ៉េ (KSFC) នៅទីក្រុងសេអ៊ូល សាធារណរដ្ឋកូរ៉េ លោក ស៊ូ សុជាតិ ប្រតិភូរាជរដ្ឋាភិបាល​ទទួលបន្ទុកជាអគ្គនាយក​នៃ​និយ័តករ​មូលបត្រ​កម្ពុជា (ន.ម.ក.) បាន​គូស​បញ្ជាក់​ថា ការធ្វើបច្ចុប្បន្នកម្ម MoU រវាង និយ័តករមូលបត្រកម្ពុជា (ន.ម.ក.) និង សាជីវកម្មហិរញ្ញប្បទានមូលបត្រកូរ៉េ (KSFC) មិនត្រឹម​តែ​ជាកិច្ចព្រមព្រៀងផ្លូវការប៉ុណ្ណោះទេ ក៏ប៉ុន្តែនេះគឺជាស្ពានយុទ្ធសាស្ត្រ និងជាការ​ឆ្លុះបញ្ចាំងពី​ចក្ខុវិស័យរួមគ្នា​របស់ស្ថាប័នទាំងពីរ។

នៅក្នុង​ការចុះ MoU នេះ លោក ស៊ូ សុជាតិ បានមានប្រសាសន៍ថា ការធ្វើបច្ចុប្បន្នកម្ម MoU រវាង ន.ម.ក. និង KSFC មិនត្រឹមតែជាកិច្ចព្រមព្រៀងផ្លូវការប៉ុណ្ណោះទេ ក៏ប៉ុន្តែនេះគឺជាស្ពានយុទ្ធសាស្ត្រ និងជាការឆ្លុះ​បញ្ចាំងពី​ចក្ខុវិស័យរួមគ្នា​របស់ស្ថាប័នទាំងពីរ ក្នុងការជំរុញការអភិវឌ្ឍវិស័យមូលបត្រនៅកម្ពុជា និងសាធារណរដ្ឋកូរ៉េ  តាមរយៈ​យន្តការហិរញ្ញប្បទានមូលបត្រ។

លោក​ថា តាមរយៈការពង្រឹងកិច្ចសហប្រតិបត្តិការនេះ ស្ថាប័នទាំងពីរ អាចទទួលផល​ប្រយោជន៍​លើ​នវានុវត្តន៍​បទប្បញ្ញត្តិ និង​ជា​ពិសេសការ​កសាងសមត្ថភាព តាមរយៈ​ការចុះហ្វឹកហាត់ការងារដល់ទីកន្លែង កិច្ចសហការ​រៀបចំ​កម្មវិធីបណ្តុះបណ្តាល និងការចែករំលែកជំនាញ ដែលអាចពង្រឹងសមត្ថភាពស្ថាប័ន បង្កើនទំនុកចិត្តទីផ្សារ និងជាមូលដ្ឋានសម្រាប់កំណើនសេដ្ឋកិច្ចរយៈពេលវែង។ យើងរួមគ្នាកសាងអនាគតនៃភាពរុងរឿង ទំនុកចិត្តគ្នាទៅវិញទៅមក និងភាពជាដៃគូយូរអង្វែង” ។

ហិរញ្ញប្បទានមូលបត្រ គឺជាប្រតិបត្តិការហិរញ្ញវត្ថុមូលបត្រដែលផ្តោតលើការផ្ទេរ ឬកម្ចីមូលបត្របណ្តោះអាសន្ន រួមមាន មូលបត្រកម្មសិទ្ធិ សញ្ញាបណ្ណ ឬឧបករណ៍ហិរញ្ញវត្ថុផ្សេងទៀត ដើម្បីសម្រួលដល់ការជួញដូរ ការផ្តល់មូលនិធិ និងការគ្រប់គ្រងហានិភ័យ ដែលបានដើរតួនាទីយ៉ាងសំខាន់ក្នុងការរក្សាស្ថិរភាពទីផ្សារ តាមរយៈការផ្តល់សន្ទនីយភាព និងសេវាហេដ្ឋារចនាសម្ព័ន្ធទីផ្សារមូលបត្រ។

ប្រភេទអាជីវកម្មនៃហិរញ្ញប្បទានមូលបត្រ អាចមានរូបភាពជាការផ្តល់កម្ចីមូលបត្រ, កិច្ចសន្យាទិញត្រលប់ (Repo), ហិរញ្ញប្បទានវិនិយោគ និងការគ្រប់គ្រងវត្ថុបញ្ចាំជាដើម។ KSFC ដើរតួជាឆ្អឹងខ្នង​ផ្នែកហិរញ្ញវត្ថុ​ដ៏មានសក្តានុពល​សម្រាប់ទីផ្សារ​មូលបត្រ​របស់​ប្រទេសកូរ៉េ ដែល​បានផ្តល់ការធានាផ្នែកសន្ទនីយភាពទីផ្សារ កិច្ចគាំពារវិនិយោគិន និងលើកកម្ពស់សុខមាលភាពហិរញ្ញវត្ថុរយៈពេលវែងក្នុងប្រព័ន្ធអេកូឡូស៊ី។

ដើម្បីជំរុញនវានុវត្តន៍ ព្រមទាំងពង្រីកអាជីវកម្ម និងការវិនិយោគការប្តូររូបិយវត្ថុបរទេស​ KSFC បានចុះអនុស្សរណៈនៃកិច្ចសហប្រតិបត្តិការ​អន្តរជាតិជាមួយក្រុមហ៊ុនហិរញ្ញប្បទានមូលបត្រ ដូចជា៖ សាជីវកម្មហិរញ្ញប្បទានមូលបត្រចិន (CSF), ហិរញ្ញប្បទានមូលបត្រជប៉ុន (JSF) និងហិរញ្ញប្បទានមូលបត្រឥណ្ឌូនេស៊ី (PEI)។ ទន្ទឹមនឹងនេះ ការធ្វើបច្ចុប្បន្នកម្ម MoU រវាង ន.ម.ក. និង KSFC ជាច្រកហេដ្ឋារចនាសម្ព័ន្ធទីផ្សារសម្រាប់អាជីវកម្មហិរញ្ញប្បទានមូលបត្រ ដែលជាអាជីវកម្មថ្មីនៅកម្ពុជា ដែលគ្រោងនឹងដាក់ឱ្យដំណើរការនាពេលខាងមុខ ហើយតាមរយៈវត្តមាននៃអាជីវកម្មនេះ នឹងជួយជំរុញសន្ទនីយភាពទីផ្សារមូលបត្រ។

សូម​បន្ថែម​ដែរ​ថា ក្នុង​ឱកាស​នោះ ភាគី​ទាំង​ពីរ កម្ពុជា-កូរ៉េ បានធ្វើបច្ចុប្បន្នកម្ម MoU ឡើងវិញ ដោយរក្សា​នូវខ្លឹម​សារ​ទាំងស្រុង និងបង្កើតនូវកិច្ចសហប្រតិបត្តិការមួយដែលឆ្លើយតបនឹងតម្រូវការជាក់ស្តែង និងនិន្នាការវិវត្តន៍នៃវិស័យ​ជាសាកល ព្រមទាំងបង្កើតយន្តការសម្រាប់កិច្ចសហប្រតិបត្តិការរយៈពេលវែង ដើម្បីជំរុញទំនាក់ទំនងបន្ត និងបង្កើនផលប្រយោជន៍សម្រាប់ទីផ្សារមូលបត្រ នៅក្នុងប្រទេសកម្ពុជា និងសាធារណរដ្ឋកូរ៉េ។

MoU នេះ បានចុះរួមគ្នាកាលពីឆ្នាំ២០១៨ ដែលមាន​វិសាល​ភាព​គ្រប់ដណ្តប់​លើការចែករំលែកព័ត៌មានទីផ្សារ ការកសាងសមត្ថភាពមន្ត្រី តាមរយៈការចុះទស្ស​នកិច្ចសិក្សា ការចុះហ្វឹកហាត់ការងារដល់ទីកន្លែង និងវគ្គបណ្តុះបណ្តាល ព្រមទាំងការគាំទ្រការអភិវឌ្ឍហិរញ្ញប្បទានមូលបត្រ​ រួមទាំងការ​អភិវឌ្ឍក្របខ័ណ្ឌ​បទប្បញ្ញត្តិពាក់ព័ន្ធ​នឹងអាជីវកម្មហិរញ្ញប្បទានមូលបត្រ ដែល ន.ម.ក. បាននិងកំពុងរៀបចំ៕