ខ្លាចការពារមិនជាប់! មានប្រទេស២ហើយ សម្រេចចាក់វ៉ាក់សាំង Sinopharm បន្ថែមដូសទី៣

ប្រទេសអារ៉ាប់រួមបាននិយាយកាលពីថ្ងៃអង្គារថា ខ្លួននឹងចាក់វ៉ាក់សាំង Sinopharm បន្ថែមដូសទី៣ ដល់ប្រជាជនបន្ទាប់ពីពួកគេ ចាក់គ្រប់២ដូសហើយរយៈពេល៦ខែ។

ប្រទេស បារ៉ែន ក៏បាននិយាយដែរថា ខ្លួននឹងចាក់វ៉ាក់សាំងដូសទី៣ ក្នុងរយៈពេលយ៉ាងហោចណាស់ប្រាំមួយខែ បន្ទាប់ពីការចាក់ដូសទី២ ដោយចាប់ផ្តើមជាមួយក្រុមមនុស្សងាយរងគ្រោះមុនគេ។

អាជ្ញាធរគ្រប់គ្រងវិបត្តិនិងគ្រោះមហន្តរាយជាតិ (NCEMA) បាននិយាយថា ការចាក់របស់អារ៉ាប់រួម គឺជាផ្នែកមួយនៃ “យុទ្ធសាស្ត្រសកម្មរបស់ខ្លួន ក្នុងការផ្តល់ការការពារអតិបរិមាសម្រាប់សង្គម” ដោយផ្តល់អាទិភាពដល់អ្នកដែលមានអាយុលើស៦០ឆ្នាំ ឬកំពុងមានជំងឺរ៉ាំរ៉ៃ។

អង្គការសុខភាពពិភពលោក (WHO) ដែលកាលពីសប្តាហ៍មុនបានអនុម័តវ៉ាក់សាំង Sinopharm សម្រាប់ការប្រើប្រាស់ជាបន្ទាន់ បាននិយាយថា ការសាកល្បងទ្រង់ទ្រាយធំដំណាក់កាលទី៣ បានបង្ហាញថា វ៉ាក់សាំងទាំង២ដូសដែលចាក់ចន្លោះពេល២១ថ្ងៃ គឺមានប្រសិទ្ធភាព៧៩ភាគរយប្រឆាំងនឹងការឆ្លងជំងឺកូវីដ-១៩។

គួរបញ្ជាក់ថា ប្រទេសអារ៉ាប់រួម ដែលជាមជ្ឈមណ្ឌលជំនួញនិងទេសចរណ៍ក្នុងតំបន់មានប្រជាជនប្រមាណ ៩លាននាក់ បានចាក់វ៉ាក់សាំងប្រហែល៧៣ភាគរយទៅហើយ លើប្រជាជនមានសិទ្ធិទទួលបានរបស់ខ្លួន៕

ប្រែសម្រួល៖ Vann Vann

ប្រភព៖ Reuters

ចុចអាន៖ អ្នកណាខ្លះបានចាក់វ៉ាក់សាំង Sinopharm? នេះជាអ្វីគួរដឹងពីវ៉ាក់សាំងដែល WHO ទើបទទួលស្គាល់នេះ