ជំងឺផ្សិតខ្មៅរកឃើញឆ្លងកាន់តែច្រើនចំពោះបុរស ជាពិសេសអ្នកទឹកនោមផ្អែម

បុរសនិងមនុស្សមានជំងឺទឹកនោមផ្អែមងាយនឹងឆ្លងរោគ mucormycosis ឬជំងឺ “ផ្សិតខ្មៅ” ច្រើនជាងគេបំផុត។ នេះបើយោងតាមការស្រាវជ្រាវដែលបានចេញផ្សាយដោយវេជ្ជបណ្ឌិតឥណ្ឌា៤រូប។

វេជ្ជបណ្ឌិត ៤ រូបបានសិក្សាលើអ្នកជំងឺ Covid-19 ចំនួន ១០១ នាក់នៅប្រទេសឥណ្ឌាដែលពួកគេសុទ្ធតែឆ្លងរោគ mucormycosis ឬរោគ “ផ្សិតខ្មៅ” ដ៏កម្រ។ ​ការសិក្សារកឃើញមនុស្ស ៧៩ នាក់ដែលឆ្លងជំងឺផ្សិតខ្មៅគឺជាបុរស។ ក្នុងនោះអ្នកជំងឺទឹកនោមផ្អែមត្រូវបានគេរកឃើញប្រឈមហានិភ័យខ្ពស់ជាងគេ ដែលមានអ្នកឆ្លងរហូតដល់ ៨៣ ក្នុងចំណោមអ្នកជំងឺទាំង ១០១ នាក់។

ទិន្នន័យសិក្សាក៏បានកត់ត្រាមនុស្ស ៣១ នាក់ក្នុងចំណោម ១០១ នាក់បានស្លាប់ដោយសារឆ្លងមេរោគ “ផ្សិតខ្មៅ”។ ហើយមានមនុស្ស ៦០ នាក់បានវិវត្តទៅជារោគសញ្ញាកូវីដ-១៩ធ្ងន់ធ្ងរ និង ៤១ នាក់បានជាសះស្បើយ។

ការសិក្សាខាងលើគ្រោងនឹងចេញផ្សាយនៅក្នុងទស្សនាវដ្តី Elsevier ឥណ្ឌា។ ចំណែកអ្នកសិក្សាលើករណីនេះរួមមាន វេជ្ជបណ្ឌិត Awadesh Kumar Singh, វេជ្ជបណ្ឌិត Ritu Singh, វេជ្ជបណ្ឌិត Shashank Joshi និងវេជ្ជបណ្ឌិត Anoop Misra ដែលពួកលោកសុទ្ធតែជាអ្នកជំនាញផ្នែកជំងឺទឹកនោមផ្អែម។

វេជ្ជបណ្ឌិតបានបញ្ជាក់ពីផលលំបាកបណ្ដាលមកពីរោគ ​Mucormycosis ដោយវាធ្វើឱ្យប៉ះពាល់ដល់ច្រមុះ ប្រហោងឆ្អឹង គន្លងប្រព័ន្ធសរសៃប្រសាទកណ្តាល សួត ក្រពះ ពោះវៀន ស្បែក ឆ្អឹងថ្គាម សន្លាក់ បេះដូង និងតម្រងនោម។

យ៉ាងណាមិញ ការសិក្សាក៏បានរកឃើញថា ជំងឺផ្សិតខ្មៅអាចរីករាលដាលខ្លាំងនៅក្នុងចំណោមមនុស្សផ្ទុកកូវីដ-១៩ ដែលមានរោគសញ្ញាធ្ងន់ធ្ងរ ឬជាអ្នកជំងឺរ៉ាំរ៉ៃប៉ុណ្ណោះ៕

ប្រែសម្រួល៖ សន្យា

ប្រភព៖ The Indian EXPRES

ចុចអាន៖ កាន់តែបារម្ភ! ជំងឺផ្សិតខ្មៅ សម្លាប់មនុស្សច្រើនឡើងៗនៅ ឥណ្ឌា

ចុចអាន៖ រឿងអីឥណ្ឌាមិនឆ្លងខ្លាំង បើប្រជាជនចេះពាក់ម៉ាសត្រឹមត្រូវបានតែ១៤ភាគរយប៉ុណ្ណោះ