ករណីឆ្លង និងស្លាប់សរុបដោយ កូវីដ នៅទូទាំងតំបន់អាស៊ាន ពេលនេះក៏មិនធម្មតា

យោងតាមតួលេខផ្លូវការបានឲ្យដឹងថា ចំនួនករណីឆ្លងជំងឺកូវីដ ១៩ សរុបនៅក្នុងបណ្ដាប្រទេសអាស៊ីអាគ្នេយ៍ បានកើនឡើងលើសពី ៤ លានករណី ក្នុងនោះមានអ្នកស្លាប់ ៧៨,៥១៥ នាក់ និងមានអ្នកជាសះស្បើយជាង ៣.៦ លាននាក់ ។

ប៉ុន្តែការកើនឡើងករណីឆ្លងថ្មីបន្ថែមទៀត ចំនួន ២៥,៦០៣ ករណី ដែលត្រូវបានកត់ត្រានៅក្នុងរដ្ឋជាសមាជិក នៃសមាគមប្រជាជាតិអាស៊ីអាគ្នេយ៍ (អាស៊ាន) ក្នុងរយៈពេលមួយថ្ងៃចុងក្រោយនេះ គឺធ្លាក់ចុះពី ២៨,៧១៦ ករណីដែលបានកត់ត្រាកាលពីថ្ងៃមុន ។

ទន្ទឹមនោះ ឥណ្ឌូណេស៊ី នៅតែជាប្រទេសឈរលើគេក្នុងតំបន់ ដោយមានករណីឆ្លងជំងឺកូវីដ ១៩ សរុបកើនលើស ១.៨២ លានករណី និងមានអ្នកស្លាប់ ៥០,៥៧៨ បន្ទាប់មកគឺ ហ្វីលីពីន មានអ្នកឆ្លងជាង ១.២៣ លានករណី និងស្លាប់ ២០,៩៦៦ នាក់ ។

ចំណែក ប្រទេសម៉ាឡេស៊ី រហូតមកដល់ពេលនេះ បានរាយការណ៍ថា មានករណីឆ្លងនៅទូទាំងប្រទេស ចំនួន ៥៧២,៣៥៧ ករណី ខណៈករណីឆ្លងថ្មី បានកើនឡើងដល់កម្រិតកំណត់ត្រា កាលពីសប្តាហ៍មុន រួមជាមួយនឹងអ្នកស្លាប់សរុប ២,៧៩៦ នាក់ ។

ស្របពេលជាមួយគ្នានេះ ក្នុងគោលបំណងដើម្បីទប់ស្កាត់ ការរីករាលដាលនៃជំងឺនេះ រដ្ឋាភិបាលម៉ាឡេស៊ីបានប្រកាសបិទខ្ទប់ប្រទេស រយៈពេល ២ សប្តាហ៍ដោយចាប់ផ្តើមពីថ្ងៃទី ១ ខែមិថុនា នេះតទៅ ។

ទាក់ទងនឹងបញ្ហាញនេះ លោកនាយករដ្ឋមន្រ្តីម៉ាឡេស៊ី Muhyiddin Yassin បាននិយាយថា មានតែវិស័យសេដ្ឋកិច្ច និងសេវាកម្មសំខាន់ៗ ដែលត្រូវបានចុះបញ្ជីដោយ ក្រុមប្រឹក្សាសន្តិសុខជាតិប៉ុណ្ណោះ ដែលនឹងត្រូវបានអនុញ្ញាតឲ្យធ្វើប្រតិបត្តិការ ក្នុងអំឡុងពេលនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ យុទ្ធនាការចាក់វ៉ាក់សាំង កូវីដរបស់ ចិន បង្ហាញល្បឿននៃការស្តារសេដ្ឋកិច្ចឡើងវិញនៅតំបន់អាស៊ីទាំងមូល