តួឯកស្រីរឿង “Twilight” ភ្ជាប់ពាក្យជាមួយស្រីដូចគ្នា និងត្រៀមចូលរោងការឆាប់ៗ

តួឯកស្រីខ្សែភាពយន្តអាមេរិករឿង Twilight កញ្ញា Kristen Stewart បានភ្ជាប់ពាក្យរួចហើយកាលពីពេលថ្មីៗនេះ ជាមួយនឹង​មិត្ត​ស្រីរបស់នាងគឺកញ្ញា Dylan Meyer។

ក្រោយទាក់ទងគ្នារយៈពេលពីរឆ្នាំ ​គូស្នេហ៍ភេទដូចគ្នា រវាង Kristen Stewart និង Dylan Meyer បានឈានដល់ថ្ងៃភ្ជាប់ពាក្យ ហើយអ្នកទាំងពីរថែមទាំងប្រកាសពិធីមង្គលការក្នុងពេលឆាប់ៗខាងមុខផងដែរ។

កាលពីមួយឆ្នាំមុន Kristen ធ្លាប់និយាយថានាងចង់រៀបការជាមួយ Meyer ហើយក៏បានគិតពីវិធីសុំរៀបការទៅកាន់មិត្តស្រី ប៉ុន្តែមិនទាន់មានឱកាស ទើបតែពេលនេះអាចសម្រេចក្ដីបំណងបាន។

ងាកទៅមើលអាជីពរបស់គូស្នេហ៍ Kristen នាងមិនត្រឹមជាអ្នកនិពន្ធប៉ុណ្ណោះទេ នាងក៏ជាតួសម្តែងដែលគេស្គាល់តាមរយៈខ្សែភាពយន្តល្បីៗដូចជា Moxie (២០២១), Rock Bottom (២០១៩) និង Miss 2059 (២០១៦)។

មុនជំពប់ស្នេហ៍នឹងនារីដូចគ្នា Kristen ធ្លាប់បានណាត់ជួបជាមួយកំពូលតារាជាច្រើនដួងមកហើយរួមមាន Stella Maxwell, Sara Dinkin, St Vincent, Alicia Cargile, Rupert Sanders, Robert Pattinson, Michael Angarano និងចុងក្រោយ Anton Yelchin ។

Kristen Stewart និង Dylan Meyer ធ្លាប់ជួបគ្នាតាំងពី ​៦ឆ្នាំមុន ប៉ុន្តែពួកគេទើបតែចាប់ផ្ដើមទាក់ទងគ្នាជាគូស្នេហ៍កាលពីឆ្នាំ ២០១៩ កន្លងទៅ។ ពេលផ្ដើមក្លាយជាសង្សារនឹងគ្នា Kristen ទម្លាយថា នាងមានសម្ពាធខ្លាំងណាស់ ព្រោះមនុមនុស្សជាច្រើនរិះគន់មិនសំចៃមាត់ទៅលើការស្រឡាញ់ភេទដូចគ្នាឡើយ។

ទោះជាយ៉ាងណា គូស្នេហ៍ស្រីស្រឡាញ់ស្រីមួយគូនេះ មិនបានរាថយឬចុះចាញ់ការមាក់ងាយឡើយ ហើយពេលនេះពួកគេបានក្លាយជាគូដណ្ដឹង និងត្រៀមខ្លួនជាស្រេចដើម្បីចូលការឆាប់ៗនេះផងដែរ៕

ប្រែសម្រួល៖ សន្យា

ចុចអាន៖ Ed Sheeran ក្លាយជាតារាអង់គ្លេសមានជាងគេបំផុត ក្នុងវ័យ ៣០ឆ្នាំ

ចុចអាន៖ មានកេរ្តិ៍ឈ្មោះល្បីមែន តែតារា K-Pop ទាំងនេះ ក្រោយចេញចម្រៀងរួច ក៏មានអ្នកមិនចូលចិត្តច្រើនដែរ