ក្រោយចេញពី កម្ពុជា Angelina Jolie ទៅសួរសុខទុក្ខជនភៀសខ្លួននៅ យេម៉ែន

ក្រោយចាកចេញពីប្រទេសកម្ពុជា ប៉ុន្មានថ្ងៃមុន នៅថ្ងៃចន្ទនេះ តារាហូលីវូដ Angelina Jolie បានទៅដល់ជំរុំជនភៀសខ្លួនក្នុងខេត្ត Lahj ភាគនិរតីនៃប្រទេសយេម៉ែន ដើម្បីសួរសុខទុក្ខប្រជាជនដែលរងគ្រោះដោយសង្រ្គាម។

អ្នកស្រី Angelina Jolie ដែលជាបេសកជនពិសេសរបស់អង្គការសហប្រជាជាតិ ទទួលបន្ទុកជនភៀសខ្លួន (UNHCR) បានចុះទៅដល់ជំរុំផ្ទាល់ ក្នុងដំណើរទស្សនកិច្ចរបស់នាងតាមបណ្ដាប្រទេសនៅអារ៉ាប់ នៅដើមសប្ដាហ៍នេះ។

ដោយឡែក កាលពីថ្ងៃអាទិត្យ តារាសម្ដែងរូបនេះ បានទៅដល់ទីក្រុង Aden ភាគខាងត្បូងនៃប្រទេសយេម៉ែន ដោយជួបសំណេះសំណាលជាមួយគ្រួសារដែលធ្លាប់ឆ្លងកាត់ការហែកហួរដោយសង្រ្គាម រយៈពេល ៨ឆ្នាំមកហើយ និងបានផ្ដល់ជំនួយសប្បុរធម៌ដល់ពួកគេផងដែរ។

គួររំលឹកថា យេម៉ែន ​ត្រូវ​បាន​លេប​ត្របាក់​ដោយ​អំពើ​ហិង្សា​ និង​អស្ថិរភាពសង្គម​ចាប់​តាំង​ពី​ឆ្នាំ ២០១៤ មក​ម្ល៉េះ គឺកំលុងពេល​ក្រុម​ឧទ្ទាម Houthi គាំទ្រ​ដោយ​អ៊ីរ៉ង់​ បាន​ដណ្តើម​កាន់កាប់​ប្រទេស​ជា​ច្រើន​រួម​ទាំង​រដ្ឋធានី Sanaa។

ជម្លោះនេះបានបង្កើតនូវវិបត្តិដ៏អាក្រក់បំផុតមួយរបស់ពិភពលោក ខណៈមនុស្សប្រមាណ ៣០លាននាក់ ត្រូវការជំនួយមនុស្សធម៌ និងការការពារ ហើយជាង ១៣លាននាក់ កំពុងស្ថិតក្នុងគ្រោះថ្នាក់នៃការអត់ឃ្លាន។ នេះបើយោងតាមរបាយការណ៍អង្គការសហប្រជាជាតិ៕

ប្រែសម្រួល៖ សន្យា

ប្រភព៖ Anadolu

ចុចអាន៖ តារាសម្ដែងកូរ៉េ Lee Young Ae បរិច្ចាគប្រាក់ជាង ៨ម៉ឺនដុល្លា ជួយដល់ អ៊ុយក្រែន