Shawn Mendes ផ្អាកការប្រគុំតន្ត្រី ព្រោះយកពេលទៅព្យាបាលផ្លូវចិត្ត

តារាចម្រៀង Shawn Mendes ប្រកាសសម្រាកពីសិល្បៈមួយរយៈ និងផ្អាកការប្រគុំតន្ត្រីនានា មូលហេតុយកពេលទៅព្យាបាលផ្លូវចិត្ត និងចំណាយជាមួយមនុស្សជាទីស្រឡាញ់របស់លោក។

តារាចម្រៀងវ័យ ២៣ឆ្នាំរូបនេះ បានប្រកាសកាលពីសប្តាហ៍មុនថា លោកកំពុងពន្យារពេលដំណើរទេសចរណ៍ពិភពលោក ក៏ដូចជាសម្រាកច្រៀងបណ្ដោះអាសន្នសិន ដើម្បីផ្តោតលើសុខភាពផ្លូវចិត្ត បន្ទាប់ពីជួបបញ្ហាផ្ទួនៗធ្វើឱ្យផ្លូវចិត្តរងប៉ះទង្គិចនាពេលកន្លងមក។

តារាប្រុសរូបនេះបន្ថែមថា លោកបាននិងកំពុងចំណាយពេលយ៉ាងច្រើនដើម្បីធ្វើការព្យាបាលផ្លូវចិត្តឱ្យប្រសើរឡើង ជាមួយសមាជិកគ្រួសារតាមលទ្ធភាពដែលអាចធ្វើបាន។ ក្រៅពីសមាជិកគ្រួសារ Shawn ក៏បានយកពេលរបស់ខ្លួន ចំណាយញ៉ាំអាហារពេលល្ងាច និងដើរកម្សាន្តជាមួយមិត្តសម្លាញ់ផងដែរ។

បន្ថែមពីលើនេះ Shawn ប្រាប់ទៀតថា អ្នកជំនាញផ្នែកសុខភាពផ្ដល់ដំបូន្មានឱ្យលោក ចំណាយពេលដើម្បីព្យាបាល ក៏ដូចជាថែទាំសុខភាពផ្លូវចិត្តជាមុនសិន មុនគិតរឿងអាជីព ។ យ៉ាងណាមិញ លោកសន្យាថា នឹងជូនដំណឹងទៅអ្នកគាំទ្រឱ្យបានដឹងពីពេលវេលានៃការវិលត្រឡប់មកពិភពតន្ត្រីវិញ។

គួររំលឹកថា កាលពីខែមេសាកន្លងទៅនេះ Shawn ធ្លាប់ចែករំលែកពីបញ្ហារបស់លោកទៅកាន់សាធារណជនម្ដងរួចហើយ នៅបណ្ដាញសង្គម IG ដោយកាលណោះលោកថា ខ្លួនកំពុងរងសម្ពាធផ្លូវចិត្ត ហើយត្រូវការពេលខ្លះដើម្បីសម្រាក។ មកទល់នឹងពេលនេះ​វាមានរយៈពេលជិត ៥ខែហើយ ខណៈផ្លូវចិត្តរបស់ Shawn នៅតែត្រូវការពេលបន្ថែមដើម្បីព្យាបាល៕

ប្រែសម្រួល៖ សន្យា

ប្រភព៖ Bang

ចុចអាន៖ រឿង “House of The Dragon” មានឈុតក្ដៅសាច់ច្រើនពេក រហូតតួឯកប្រុសលាន់មាត់

ចុចអាន៖ Blinks កាន់តែអន្ទះសារ ក្រោយ Blackpink ប្រកាសថ្ងៃទម្លាក់អាល់ប៊ុមថ្មី