៦ យ៉ាង គួរឲ្យចាប់អារម្មណ៍ពីតួអង្គនៅក្នុងរឿង Barbie

តារាសម្ដែង Margot Robbie ដែលជាតួអង្គមួយរូបក្នុងរឿង Barbie កំពុងទទួលបានចំណាប់អារម្មណ៍យ៉ាងខ្លាំងពីសំណាក់មហាជន ដោយសារតែរឿងនេះល្បីថា ប្រើពណ៌ផ្កាឈូកច្រើនរហូតបណ្ដាលឲ្យខ្វះខាតជាសកលលោក ។

ទន្ទឹមនោះ សម្រាប់អ្នកដែលចូលចិត្តតារាសម្ដែង Margot ក៏គួរស្វែងយល់ពីរឿងប្លែកៗមួយចំនួនរបស់តួអង្គមួយនេះដូចជា៖

១. អាជីពដែលនាងស្រមៃចង់ធ្វើ

Margot Robbie ធ្លាប់ទម្លាយនៅក្នុងប្រព័ន្ធផ្សព្វផ្សាយ Buzzfeed កាលពីឆ្នាំ ២០១៩ ថា នាងចង់ធ្វើជាម្ចាស់សណ្ឋាគារ ឬអ្នកលេងសៀកក៏បាន ។

២. Margot ចូលចិត្តរឿង Harry Potter

ចំណែកភាពយន្តវិញ Margot ចូលចិត្តរឿង Harry Potter ខ្លាំងណាស់ រហូតដល់ថ្នាក់កុហកពេទ្យភ្នែកថា ខ្លួនពិតជាត្រូវការវ៉ែនតាទើបអាចមើលឃើញ ។ នេះបើយោងតាមអ្វីដែលនាងនិយាយលើកម្មវិធី The Graham Norton ក្នុងឆ្នាំ ២០២០ ។

៣. តារាដែលនាងពេញចិត្តបំផុតគឺ 50 Cent

ការជួបជាមួយតារារ៉េប 50 Cent ធ្វើឲ្យ Margot ត្រេកអរបំផុត ។ អ្នកទាំងពីរបានជួបគ្នានៅទិវាសប្បុរសធម៌ប្រចាំឆ្នាំ ២០១៥ ដែលរៀបចំដោយ Cantor Fitzgerald និង BGC ក្នុងទីក្រុងញូវយ៉ក ។

៤. Margot ជប់លៀងខួបកំណើតអាយុ ២៤ ឆ្នាំ រយៈពេល ២៤ ម៉ោង

នៅឆ្នាំ ២០១៤ នាងបានជប់លៀងខួបកំណើត ២៤ ឆ្នាំ រយៈពេល ២៤ ម៉ោងពេញ ក្នុងទីក្រុងឡុងដ៍ ជាមួយមិត្តជិតស្និទ្ធ ដែលកម្មវិធីនោះចាប់ផ្ដើមពីម៉ោង ៩ ព្រឹកទៅ ។

៥. នាងធ្លាប់ធ្វើពុតជាស្លាប់

Margot ធ្វើពុតជាស្លាប់កាលពីនៅក្មេងដោយយកកាំបិត និងទឹកប៉េងប៉ោះមកលាបខ្លួន ហើយដេកស្ងៀមជិត ៤០ នាទី ធ្វើឲ្យអ្នកមើលថែដែលនាងស្អប់ឈប់មកធ្វើការទៀត ។

៦. Margot មិនអាចគេងដោយគ្មានតុក្កតារបស់នាងទេ

Margot មានតុក្កតាទន្សាយដ៏ចាស់មួយឈ្មោះ Bunny ដែលនាងបានជាកាដូរតាំងពីទើបនឹងកើតមកម្ល៉េះ ។ ស្វាមី Margot តែងតែគប់តុក្កតានោះចេញពីលើគ្រែ ធ្វើឲ្យនាងខឹងគាត់ជាខ្លាំង ហើយមានតែម្ដាយ Margot ប៉ុណ្ណោះដែលអាចដេរ និងបោកតុក្កតាសំណព្វចិត្តខាងលើបាន ។

គួរបញ្ជាក់ដែរថា រឿង Barbie ដែលមានតារាស្រី Margot Robbie ដើរតួ Barbie និងតារាប្រុស Ryan Gosling ដើរតួមិត្តប្រុសរបស់នាងឈ្មោះ Ken នឹងចាក់ផ្សាយតាមរោងកុននៅថ្ងៃទី ២១ ខែកក្កដា ឆ្នាំ ២០២៣ នេះហើយ ៕

ប្រែសម្រួល​៖ វារី

ប្រភព៖ insider

ចុចអាន៖ តួអង្គរឿង Barbie ទម្លាយការពិត ក្នុងវគ្គដោះស្បែកជើង ដែលកំពុងល្បី