ក្រោយផ្ទុះរឿងអាស្រូវពេស្យាចារ​ អតីតម្ចាស់មកុដ MGI​ បង្ហាញមុខលើកដំបូង

យោងតាមប្រភពពីសារព័ត៌មានវៀតណាម saosta កាលពីល្ងាចថ្ងៃទី ១៤ ខែវិច្ឆិកា បានបង្ហាញពីសម្រស់របស់ Nguyễn Thúc Thùy Tiên ដោយបានទាក់ទាញការចាប់អារម្មណ៍ នៅពេលដែលនាងមានវត្តមាននៅក្នុងកម្មវិធីសម្ពោធរឿងមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្ចាស់មកុដ Miss Grand International 2021 រូបនេះបាន​ស្លៀក​រ៉ូប​ពណ៌​ខ្មៅ​គ្មាន​ខ្សែ​បង្អួត​រាងដ៏ស្រឡូន​ស្អាត​រង់ចាំ​ដល់​វេន​នាងចូលថត​រូប​លើ​កម្រាល​ព្រំ​ក្រហម។ នេះជាលើកទីមួយហើយ ដែលបវរកញ្ញា MGI ឆ្នាំ ២០២១ បង្ហាញខ្លួន បន្ទាប់ពីត្រូវបានប្រកាសថាទទួលជ័យជំនះក្នុងបណ្តឹងឧទ្ធរណ៍ វិវាទលើកិច្ចសន្យាកម្ចីអចលនទ្រព្យ និងវិវាទលើសំណងសម្រាប់ការខូចខាតដែលមិនមែនជាកិច្ចសន្យា ជាមួយលោកស្រី Dang Thuy Trang ។

លើសពីនេះ តំណាងស្រីស្អាតរូបនេះ ក៏បានបដិសេធ ចំពោះការសង្ស័យថា នាងជាប់ពាក់ព័ន្ធនឹងរកស៊ីផ្លូវភេទនិងពេស្យាចារ​ ដែលបង្កឲ្យមានការបញ្ចេញមតិព្រោងព្រាតកាលពីពេលថ្មីៗនេះ ។

យោងតាមសេចក្តីសម្រេចរបស់តុលាការប្រជាជនទីក្រុងហូជីមិញ នៅរសៀលថ្ងៃទី១៤ ខែវិច្ឆិកា អង្គជំនុំជម្រះសាលាឧទ្ធរណ៍បានច្រានចោលបណ្តឹងសាទុក្ខរបស់លោកស្រី Dang Thuy Trang ក្នុងបណ្តឹងជាមួយបវកញ្ញា Thuy Tien ដោយបញ្ជាក់ពីសាលក្រមសាលាដំបូង។ Thuy Tien មិនចាំបាច់បង់ប្រាក់ចំនួន ១.៥ ពាន់លានដុង ដល់លោកស្រី Dang Thuy Trang និងសំណើផ្សេងៗទៀតទេ។

ចំណែក​ ភាគីខាង Thuy Tien ក៏បាននិយាយឡើងអំពីរូបថតដែលនាងថតជាមួយបុរសម្នាក់ពាក់ព័ន្ធរឿងមេខ្យល់ព្រមទាំងពេស្យាចារ។ តំណាងក្រុមហ៊ុនគ្រប់គ្រងកម្មវិធី Miss World Grand 2021 បានបញ្ជាក់យ៉ាងដូច្នេះថា៖ «ពាក្យចចាមអារ៉ាមអំពីការជាប់ពាក់ព័ន្ធរបស់នាងក្នុងរឿងពេស្យាចារ គឺជារឿងមិនពិត និងជាទង្វើបំភ័ន្តមតិសាធារណៈដោយចេតនា» ព្រោះតាមការសន្និដ្ឋានរបស់នាយកដ្ឋាននគរបាលព្រហ្មទណ្ឌនៃក្រសួង សន្តិសុខសាធារណៈវាត្រូវបានបញ្ជាក់ថា Thuy Tien មិនពាក់ព័ន្ធនឹងរឿងនេះទេ។

សូមបញ្ជាក់ឲ្យដឹងដែរថា រូបភាពរបស់ Nguyễn Thúc Thùy Tiên ម្ចាស់មកុដ Miss Grand International 2021 ស្និតស្នាលជាមួយបុរសពីរនាក់ដែលជាប់ទោសពីបទឈ្មួញកណ្តាលពេស្យាចារកាលពីថ្ងៃទី ០៣ ខែវិច្ឆិកា បានបង្កឲ្យមានការភ្ញាក់ផ្អើលនៅក្នុងមតិសាធារណៈរបស់ប្រទេសវៀតណាម៕

ប្រែសម្រួល៖ សាង ស្រីល័ក្ខ

ចុចអាន៖បវកញ្ញាវៀតណាម Nguyễn Thúc Thùy Tiên សង្ស័យ​ជាប់​ពាក់ព័ន្ធ​រឿង​ពេស្យាចារ​