ក្រោយឡើងឆាករួមគ្នា! ឆន សុវណ្ណារាជ ប្រាប់អ្នកគាំទ្រថា ខ្លួននឹងមានអ្វីថ្មីជាមួយ ទេព បូព្រឹក្ស ម្តងទៀត

កំពូលតារាចម្រៀងមនោសញ្ចេតនាដ៏ស្រស់សង្ហា លោក ឆន សុវណ្ណារាជ និងកំពូលតារាចម្រៀងប្រសព្វបត់បែនតាមតន្ត្រីសម័យ អ្នកនាង ទេព បូព្រឹក្ស បានឡើងច្រៀងឆាករួមគ្នាជាថ្មី បន្ទាប់ពីម្នាក់បានដើរចេញពីកន្លែងរួមទ្រនំ សាងរូបភាពថ្មីតាមក្តីស្រមៃ ហើយខកខានមានចម្រៀងរួមគ្នាជាច្រើនឆ្នាំមកនេះ។

យ៉ាងណា ក្រោយឃ្លាតឃ្លាពីរៀមច្បងច្រើនឆ្នាំ អ្នកនាង ទេព បូព្រឹក្ស បានចាប់ដៃគូចម្រៀងជាមួយនឹងលោក ឆន សុវណ្ណរាជ ជាថ្មី ក្នុងព្រឹត្តិការណ៍ប្រគំតន្ត្រីកាលពីយប់ថ្ងៃឆ្លងឆ្នាំ នៅឯខេត្តបាត់ដំបង។

តាមរយៈចម្រៀងដែលធ្លាប់ច្រៀងរួមគ្នា ដៃគូចម្រៀងចាស់មួយគូនេះ បានធ្វើឱ្យមហាជនពិសេសអ្នកគាំទ្រ មានក្តីរំភើបរីករាយជាមួយនឹងអនុស្សាវរីយ៍នៃកំពូលមនោសញ្ចេតនាទាំងពីរធ្លាប់ផ្តល់ឱ្យប៉ុន្មានឆ្នាំកន្លងទៅ។ ក្នុងព្រឹត្តិការណ៍ប្រគំតន្ត្រីនេះដែរ អ្នកទាំងពីរបានស៊ើបសួរចិត្តអ្នកគាំទ្រ ថាចង់ឱ្យអ្នកទាំងពីរមានចម្រៀងរួមគ្នាទេ ហើយលោក ឆន សុវណ្ណរាជ ឆ្លៀតបង្ហើបប្រាប់ថា ខ្លួននឹងមានអ្វីថ្មីជាមួយ ទេព បូព្រឹក្ស ម្តងទៀត។

យ៉ាងណាមិញ បើទោះបីជាការបង្ហើបឱ្យដឹងនេះ មិនមានការបញ្ជាក់អ្វីច្រើន ថាជាការឡើងឆាកប្រគំតន្ត្រីរួមគ្នា ឬក៏មានចម្រៀងរួមគ្នាថ្មីទៀត តែអ្នកគាំទ្របង្ហាញក្តីរំភើបបន្ទាប់ពីទទួលបានដំណឹងនេះ៕