អ្នកសិល្បៈនិងសាធារណជន សម្តែងក្តីបារម្ភ ក្រោយដឹងដំណឹង នាយ កុយ មានបញ្ហាសុខភាពត្រូវវះកាត់ជាបន្ទាន់

តាមរយៈសារកាលពីម្សិលមិញនេះ លោក ជួង ជី ហៅ នាយ កុយ បានជូនដំណឹងឱ្យជ្រាបជាសាធារណៈថា លោកមានបញ្ហាសុខភាពត្រូវធ្វើការវះកាត់ជាបន្ទាន់ ដោយហេតុនេះ លោកសុំការអធ្យាស្រ័យទៅដល់អ្នកដែលអញ្ជើញលោកទៅសម្តែង ចំពោះការខកខាន។

សំណេរជូនដំណឹង ភ្ជាប់នឹងរូបថតកំពុងសម្រាកត្រៀមវះកាត់ ពីគណនីហ្វេសប៊ុកផ្ទាល់ខ្លួន តារាកំប្លែងជើងចាស់រូបនេះ បានត្រឹមតែសុំការអធ្យាស្រ័យចំពោះការខកខានការសម្តែង ប៉ុន្តែមិនបានបញ្ជាក់លម្អិតបន្ថែមជុំវិញស្ថានភាពសុខភាពរបស់លោកនោះឡើយ។

តែយ៉ាងណា ក្រោយដឹងដំណឹងនេះ មហាជន រួមនិងអ្នកសិល្បៈជាច្រើន បានសម្តែងក្តីបារម្ភ និងជូនពរដល់តារាកំប្លែងរូបនេះឱ្យឆាប់ធូរស្បើយពីជំងឺផងដែរ។

នាយ កុយ ជាតារាកំប្លែងចាស់វស្សារបស់កម្ពុជា ដែលមានឈ្មោះបោះសំឡេងប៉ុន្មានទសវត្សរ៍មកហើយ ដែលមានទេពកោសល្យសិល្បៈច្រើន ទាំងទម្រង់បុរាណ សម្តែង និងកំប្លែង។ ក្រៅពីឆាកសម្តែង លោកក៏ធ្លាប់ដើរតួក្នុងភាពយន្តចម្រៀង រឿងកុន និងទើបតែដើរតួឯកក្នុងភាពយន្តដែលដឹកនាំដោយផលិតករល្បីឈ្មោះ លោក ឆាយ បូរ៉ា ឆ្នាំ២០២៣ កន្លងទៅ ក្នុងរឿង «អ៊ំចនម៉ែដោះ»។ ខណៈក្នុងភាពយន្តមួយរឿងនេះ លោកបានបង្ហាញចំណេះដឹងផ្នែកសិល្បៈច្រើនបែបផងដែរ មានទាំងរបាំ ល្ខោនបាសាក់ ក៏ដូចជាក្បាច់គុនខ្មែរផងដែរ។

បច្ចុប្បន្ន បើទោះជាលោកមានវ័យជ្រេហើយក៏ដោយ ប៉ុន្តែដោយក្តីស្រលាញ់មិនចង់ឃ្លាតឆ្ងាយពីសិល្បៈ លោកនៅតែបន្តអាជីពរបស់ខ្លួន ខណៈប្រជាប្រិយភាពតារាកំប្លែងជើងចាស់រូបនេះ នៅតែទទួលបានការគាំទ្រពីសំណាក់មហាជន៕