តារាមេ​ម៉ា​យ​ចាយ​សម្រស់​​​​​កូន៣ នាង​ Cecilia ថា លែងគិត លែង​ខ្វល់ពីស្នេហាទៀត​

ក្នុងវីដេអូជជែកគ្នាលេងជាមួយមិត្តរួមការងារដែលបានបង្ហោះនៅលើទំព័រផ្ទាល់ខ្លួនកាលពីថ្ងៃទី ២៨ខែមេសា តារាសម្ដែងហុងកុង នាង​ Cecilia Cheung បាននិយាយថា កាលពីនៅក្មេង ទោះរវល់យ៉ាងណាក៏នាងនៅតែរកវិធីនិយាយ និងជួបគូស្នេហ៍ ព្រោះនឹកនាគ្នាជាខ្លាំង។ ប៉ុន្តែតាំង​ពី​ក្លាយ​ជា​ម្ដាយ​កូន​បី​មក ការ​គិត​របស់​តារា​ស្រីស្រាប់តែ​ផ្លាស់​ប្ដូរ។

រាជិនីសម្រស់ប្រចាំភាពយន្តហុងកុង បាននិយាយថា «វាមិនមែនថាខ្ញុំមិនត្រូវការស្នេហាទេ វាគ្រាន់តែថា ខ្ញុំមិនមានពេលគិតអំពីស្នេហារវាងបុរស និងស្ត្រីទៀតទេ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារា​ស្រី​មិន​មែន​ជា​ប្រភេទ​មនុស្ស​ស្រី​ដែល​ពឹង​លើ​សេចក្ដី​ស្រឡាញ់​ ហើយ​ស្លាប់​ដើម្បី​រក្សា​មនុស្ស​ដែល​ខ្លួន​ស្រឡាញ់។ ទោះបីជានាងឈឺចាប់ដោយសារតែស្នេហាពីមុនៗមកក៏ដោយ ប៉ុន្តែនាងបានលាក់ខ្លួននៅកន្លែងណាមួយ ហើយយំជំនួសការបង្ហាញពីការឈឺចាប់នៅចំពោះមុខមិត្តប្រុសឬសាធារណជន។ Cecilia តែងតែគិតថា ​ស្នេហា​នាង​ដូចជាតួអង្គ Piu-Piu នៅក្នុង​ភាពយន្តក្រោមចំណងជើងថា «King of Comedy» ដែល​រួម​សម្តែង​ជាមួយ Stephen Chow ឬទិនហ្វី។

មិនតែប៉ុណ្ណោះ តារាសម្ដែងស្រីវ័យ៤៤ឆ្នាំថែមទាំងបញ្ចាក់យ៉ាងច្បាស់ថា ខ្លួនមានសុទិដ្ឋិនិយមតាំងពីនៅតូចមកម៉្លេះ។ កាលនៅតូចនាងតែងតែឮម្តាយនិយាយថា «អ្នកកើតមកតែម្នាក់ឯង អ្នកត្រូវចេះពីរបៀបធ្វើឲ្យខ្លួនសប្បាយចិត្ត មិនពឹងផ្អែកលើអ្នកដទៃជ្រុលពេក»។ ក្រោយ​មក សូម្បី​តែ​ពេល​ទទួល​បាន​មតិ​មិន​សប្បាយ​ចិត្ត​បំផុត​ពី​អ្នក​ក្រៅ​ក៏នាងនៅ​តែ​មាន​អារម្មណ៍​ថា​ វា​គ្រាន់​តែ​ជា​ទំនុក​ច្រៀង​របស់​បទ​ចម្រៀងដែលតែងតែឮជារឿយៗ។

តារា​សម្ដែង​រូប​នេះ​បាន​រស់​នៅ​ក្នុង​បរិយាកាស​ផ្សេង​ៗ​ជា​យូរ​មក​ហើយ​ដូច​ជា​ប្រទេស​កាណាដា សិង្ហបុរី និង​ទីក្រុង​នានា​ក្នុង​ប្រទេស​ចិន។ ភាពខុសគ្នានៃវប្បធម៌ និងរបៀបរស់នៅបណ្តុះបណ្តាលសមត្ថភាពរបស់ Cecilia ក្នុងការសម្របខ្លួនដោយភាពបត់បែន។ ឥឡូវនេះនាងមានអារម្មណ៍ថា ខ្លួនដូចជាបក្សីដែលអាចហោះហើរដោយសេរី។

Cecilia Cheung មានកូនពីរនាក់ជាមួយអតីតស្វាមី Nicholas Tse, កូនប្រុសច្បងឈ្មោះ Lucas មានអាយុ ១៨ ឆ្នាំនៅឆ្នាំនេះ និងម្នាក់ទៀតឈ្មោះ Quintus អាយុ ១៥ ឆ្នាំ។ យ៉ាងណា កាលពីល្ងាចថ្ងៃទី ១៦ ខែមេសា Lucas និង Quintus ត្រូវបានគេឃើញកំពុងអបអរសាទរចំពោះការផ្សាយផ្ទាល់របស់ឪពុកបង្កើតនៅហុងកុង ក្មេងប្រុសទាំងពីរនាក់បានអង្គុយក្បែរជីដូនរបស់ពួកគេយ៉ាងសប្បាយរីករាយ។

កូនពៅរបស់តារាស្រីរូបនេះ មានអាយុ ៧ឆ្នាំនៅឆ្នាំនេះ។ ប៉ុន្តែ Cecilia មិនដែលបង្ហាញព័ត៌មានអំពីឪពុករបស់កូនទីបីរបស់នាងទេ។ តាំង​ពី​លែងលះ​គ្នា​ក្នុង​ឆ្នាំ ២០១១មក រាជិនីសម្រស់​មិន​បាន​ណាត់​ជួប​នរណា​ជា​សាធារណៈទៀត​ឡើយ។

គួរបញ្ចាក់ដែរថា Cecilia Cheung អាយុ ៤៥ឆ្នាំមានភាពល្បីល្បាញនៅអាស៊ីតាមរយៈខ្សែភាពយន្តរឿង «King of Comedy, Lion of the East, Cat Loves Mouse និង Star Wish»។ បន្ថែមពីលើសម្រស់ស្រស់សោភា ការសម្ដែងរបស់តារាស្រីត្រូវបានវាយតម្លៃជាវិជ្ជមានដោយអ្នកជំនាញ និងទស្សនិកជនយ៉ាងគគ្រឹកគគ្រេង។ ជាពិសេស ក្នុងរយៈពេលប៉ុន្មានឆ្នាំចុងក្រោយនេះ ដោយសារតែមានភាពស្រស់ស្អាតពីកំណើត នាងតែងតែត្រូវប៉ាន់លើតម្រូវការសម្រាប់កម្មវិធីទូរទស្សន៍ កម្មវិធីបង្ហាញម៉ូដ និងការផ្សាយបន្តផ្ទាល់ការលក់៕

អត្ថបទ៖ សាង ស្រីល័ក្ខ

ចុចអាន៖តារាចិន​ល្បី​​អាក្រក់​​ខាង​រំលោភច្រើន​ករណី​ លោក Kris Wu ប្រឈមនឹងរឿងក្ដីក្ដាំ​​បន្ថែម​ទៀត​