ថៃប៉ះសម្តីគ្នាឯង យ៉ាងក្តៅគគុក រឿងចាក់សំឡេងខ្មោចលើទឹកដី កម្ពុជា

ប្រទេសថៃកំពុងផ្ទុះការជជែកគ្នានិងប៉ះសម្តីគ្នាឯងយ៉ាងក្តៅគគុកជុំវិញការចាក់សំឡេងខ្មោចឮៗនៅលើទឹកដីកម្ពុជាក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គំនិតដ៏ស្មោកគ្រោកនៃការរៀបចំចាក់សំឡេងខ្មោចនិងឆ្កែលូ គឺកើតចេញពីអ្នកលេងបណ្តាញសង្គមថៃឈ្មោះ Kan Chom Phalang ដែលគេចង់បង្កការរំខាននិងបំភ័យដល់បងប្អូនខ្មែរ ទាំងអត់ខ្វល់ថា គេកំពុងយកឈ្មោះប្រទេសថៃ ទៅសម្អុយលើឆាកអន្តរជាតិ។

ជុំវិញរឿងនេះ សមាជិក​ព្រឹទ្ធសភា​ថៃ​លោកស្រី Angkhana Neelapaijit បាន​ស្នើ​ដល់​រដ្ឋាភិបាលទីក្រុងបាងកក ត្រូវ​ពិនិត្យ​លើ​ករណី​ដែល​បុគ្គល​ម្នាក់នេះ ប្រើប្រាស់​សំឡេង​ប្រឆាំង​ពលរដ្ឋ​ខ្មែរ​។

លោកស្រី Angkhana និយាយ​ថា៖ «រាជរដ្ឋាភិបាល​ថៃ​គួរ​តែ​បាន​ដឹង​ថា​រាល់​សកម្មភាព​ទាំង​ឡាយ​ណា​ បង្ក​ឲ្យ​មាន​អារម្មណ៍​ភ័យ​ខ្លាច​ ឬ​ប៉ះពាល់​ដល់​ផ្លូវ​ចិត្ត​របស់​ប្រជាជន​ ទោះ​បី​អ្នក​ស្ថិត​ក្នុង​ស្ថាន​ភាព​ជម្លោះ​ក៏​ដោយ​ ជា​ពិសេស​ក្រុម​ងាយ​រងគ្រោះ​ដែល​អាច​ជា​ការ​ធ្វើ​ទារុណកម្ម​ផ្លូវ​ចិត្ត ក្រោម​អនុសញ្ញា​ប្រឆាំង​ទារុណកម្ម និង​ការ​ប្រព្រឹត្តិ​មក​លើ​ខ្លួន ឬ​ទណ្ឌកម្ម​ឯទៀត​ដែល​ឃោឃៅ អមនុស្ស​ធម៌ ឬ​បន្ថោក​បន្ទាប (CAT) ដែល​ថៃ​ជា​រដ្ឋភាគី»។

ទោះបីជាយ៉ាងណាក៏ដោយ ប្រតិកម្មរបស់លោកស្រីបានបញ្ឆេះឲ្យមានកំហឹងពីសំណាក់ពលរដ្ឋថៃវង្វេងប្រវត្តិសាស្រ្តមួយចំនួន ដែលកំពុងរស់នៅប្រៀបបាននឹងកង្កែបក្នុងអណ្តូង ជឿតែពាក្យភូតកុហកមិនទទួលស្គាល់ការពិត។

ជាក់ស្តែង បើតាមការផ្សាយរបស់ Amarin TV កាលពីថ្ងៃអាទិត្យទី១២ខែតុលាឆ្នាំ២០២៥ អ្នកលេង Tik Tok ឈ្មោះ Jay Ae បានក្តៅស្លឹកត្រចៀកនឹងលោកស្រី Angkhana ដោយស្តីឲ្យសមាជិកសភារូបនេះថា «អ្នកអង្គុយតែក្នុងម៉ាស៊ីនត្រជាក់ គ្មានដឹងខ្យល់អីទេ»។ ទន្ទឹមនោះ Jay Ae ក៏បបួកលោកស្រី Angkhana ទៅព្រំដែនជាមួយគ្នា ២ថ្ងៃផងដែរ។

រឿងរ៉ាវទាំងនេះ សបញ្ជាក់យ៉ាងច្បាស់ថា ពលរដ្ឋថៃមួយចំនួនខ្វះការចេះដឹងនិងគ្មានមនុស្សធម៌ក្នុងខ្លួន ហើយយកការមើលងាយធ្វើបាបអ្នកដទៃជាល្បែងកម្សាន្ត។ 

តើនេះឬជាប្រទេសស៊ីវីល័យ ដែលសម្បូរទៅដោយមនុស្សប្រព្រឹត្តទង្វើស្មោកគ្រោកដូច្នេះ? តើហេតុអ្វីប្រទេសថៃ ចូលចិត្តលើកតម្កើងមនុស្សដែលប្រព្រឹត្តទង្វើថោកទាប?

អត្ថបទ៖ សុខ សុវណ្ណ

ចុចអាន៖ ចេតិយ​ព្រះពុទ្ធ​នៅ​ថៃ ដែលមានអាយុកាល​​ជាង១២០​ឆ្នាំ បាក់ស្រុត​ខ្ទេច​គ្មានសល់