ព័ត៌មានអន្ដរជាតិ

Anutin រងការរិះគន់ថាធ្វើនយោបាយសងសឹក ជាជាងការកែទម្រង់រដ្ឋបាល ក្រោយរុះរើក្រសួងមហាផ្ទៃ

បានផុស

៩ ខែ មុន

នៅ

ថ្ងៃព្រហស្បតិ៍ ១៦ តុលា ២០២៥

ដោយ

Chheang

ក្រសួងមហាផ្ទៃរបស់ប្រទេសថៃ បានរងការរិះគន់បន្ទាប់ពីបានផ្ទេរមន្ត្រីជាន់ខ្ពស់ច្រើនជាង៤៥នាក់ រួមទាំងអភិបាលខេត្តមួយចំនួនផងដែរ នៅក្នុងអ្វីដែលអ្នករិះគន់និយាយថាជាការរុះរើដោយហេតុផលនយោបាយដោយគណបក្ស Bhumjaithai ដែលកំពុងកាន់អំណាច នៅមុនការបោះឆ្នោតសកលនៅឆ្នាំក្រោយ។

លោក Anutin Charnvirakul (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយនាថ្ងៃទី១៦ខែតុលាឆ្នាំ២០២៥នេះរបស់កាសែតបាងកកប៉ុស្តិ៍ នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក Anutin Charnvirakul បានអនុម័តការរុះរើនេះ ដែលសមាជិកសភា និងអ្នកសិក្សារបស់គណបក្សប្រឆាំង ហៅថាជាទង្វើនៃការសងសឹកផ្នែកនយោបាយ ជាជាងការកែទម្រង់រដ្ឋបាល។ ពួកគេប្រកែកថា វាធ្វើឲ្យខូចដល់អភិបាលកិច្ចមូលដ្ឋាន និងការគ្រប់គ្រងកណ្តាល។

ក្រុមបណ្ឌិតមកពីសាកលវិទ្យាល័យ Khon Kaen និង Chiang Mai បាននិយាយថា ការផ្លាស់ប្តូរនេះផ្តោតលើអភិបាលខេត្តដែលមានទំនាក់ទំនងជាមួយរដ្ឋាភិបាលដែលដឹកនាំដោយបក្សភឿថៃពីមុន ដោយឆ្លុះបញ្ចាំងពីកិច្ចខិតខំប្រឹងប្រែងដើម្បីដំឡើងអ្នកស្មោះត្រង់នៅក្នុងខេត្តសំខាន់ៗមុនពេលបោះឆ្នោត។ សមាជិកសភាមកពីគណបក្សប្រជាជន (PP) នៅឈៀងម៉ៃ ឈៀងរ៉ៃ និងភូកេត ក៏បានបរិហារការផ្ទេរនេះថាជាការរំខានដល់គម្រោងក្នុងស្រុក ដូចជាការគ្រប់គ្រងផ្សែងពុល ដំណោះស្រាយការបំពុលបរិស្ថាន និងការអភិវឌ្ឍទេសចរណ៍ជាដើម។

អតីតសមាជិកសភាគណបក្សភឿថៃ លោក Somkid Cheuakong បានចោទប្រកាន់លោក Anutin ថាបានប្រើប្រាស់ការរុះរើនេះ ដើម្បីពង្រីកឥទ្ធិពលការិយាធិបតេយ្យរបស់ Bhumjaithai ដោយព្រមានថា វានឹងធ្វើឲ្យការបែងចែកនយោបាយកាន់តែស៊ីជម្រៅនៅក្នុងជួរមុខងារស៊ីវិល៕

ដោយ៖ ឈាង