ព្យុះថ្មីកកើតក្បែរហ្វីលីពីន ហើយរំពឹងរំកិលខ្លួនមកក្បែរវៀតណាម ​កម្ពុជា និងឡាវ

ប្រព័ន្ធសម្ព័ន្ធទាប​កំពុងវិវត្តក្លាយជាព្យុះថ្មីមួយ​នៅក្នុងលំហរសមុទ្រភាគខាងកើតហ្វីលីពីន ​ហើយ​រំពឹងរំកិលខ្លួនរំលងប្រជុំកោះប្រទេសនេះ រួចបន្តបក់បោកចូលទៅសមុទ្រចិន​ខាងត្បូង ជាមួយនឹង​លទ្ធភាពបង្កើនកម្លាំងក្លាយជាព្យុះសង្ឈរានៅសប្ដាហ៍ក្រោយ​។

ព្យុះថ្មីនេះ ត្រូវបាន​គេឱ្យឈ្មោះជាអន្តរជាតិថា ហ្វេងសេង (Fengshen)។ គិតត្រឹមម៉ោង ១១ ព្រឹកថ្ងៃសៅរ៍ វាស្ថិតនៅជា វិសម្ពាធ (Tropical Depression) នៅឡើយ ជាមួយ​នឹង​កម្លាំងខ្យល់បក់បោក ៥៥ គីឡូម៉ែត្រ/ម៉ោង ក្បែរប្រជុំកោះ Visayas របស់ហ្វីលីពីន។ នេះបើយោងតាម​មជ្ឈមណ្ឌលព្រមានព្យុះទីហ្វុងរួមគ្នា (JTWC)។

JTWC បាន​ព្យាករថា ហ្វេងសេង នឹង​បក់បោករំលងកោះលូហ្សន ចូលទៅក្នុងសមុទ្រចិនខាងត្បូងនៅយប់ថ្ងៃអាទិត្យ ហើយ​នឹង​​​រំកិលខ្លួនយឺតៗនៅលើផ្ទៃសមុទ្រ ដែល​នេះ​បង្ហាញពីលក្ខខណ្ឌនៃការស្រូបកម្លាំងឱ្យ​កាន់ខ្លាំងបន្ថែមទៀត​​របស់ព្យុះ​។

ការព្យាករត្រឹមថ្ងៃព្រហស្បតិ៍សប្ដាហ៍ក្រោ​យរបស់ JTWC បាន​បង្ហាញថា ​ហ្វេងសេង ដែលហ្វីលីពីនហៅថា «រ៉ាមីល» (Ramil) នឹងវិវត្តក្លាយជាព្យុះទីហ្វុង ឬសង្ឃរា ពេលរំកិលខ្លួនកាន់តែកៀកវៀតណាម ហើយតំបន់នៃភាពមិនច្បាស់លាស់របស់ព្យុះ (Cone of Uncertainty) បង្ហាញថា វាទំនងនឹង​វាយប្រហារតំបន់ភាគខាងកណ្ដាលវៀតណាម ពោលគឺនៅក្បែរតំបន់ភាគឦសានរបស់ប្រទេសកម្ពុជា និងឡាវ។

មិនទាន់មាន​ការព្យាករបន្ថែមថា ហ្វេងសេង នឹង​វាយប្រហារកម្ពុជាដោយ​ផ្ទាល់ឬអត់នៅឡើយទេ ប៉ុន្តែក្រសួងធនធានទឹក និងឧតុនិយមកម្ពុជា បាន​និយាយក្នុងសេចក្ដីថ្លែងការណ៍ថ្ងៃសៅរ៍នេះថា កម្ពុជា​ដែលទទួល​រងនឹង​ឥទ្ធិពល នឹង​ឃើញភ្លៀងធ្លាក់ទូទាំងប្រទេស លាយឡំនឹង​ខ្យល់កន្រ្តាក់ និងផ្គររន្ទះ។ តំបន់ខ្ពស់រាបនឹង​ឃើញភ្លៀងធ្លាក់គ្របដណ្ដប់រហូតដល់ទៅ ៥០ ភាគរយ នៃផ្ទៃដី តំបន់ឆ្នេរ ៦០ ភាគរយ និងតំបន់ទំនាបកណ្ដាល ៣០ ភាគរយ។

ជាធម្មតា ព្យុះត្រូពិក ឬសង្ឈរា តែងនាំមកនូវភ្លៀងធ្លាក់ខ្លាំងជោគជាំ និងខ្យល់កន្រ្តាក់។ តំបន់រងការវាយប្រហារ ងាយរងនឹងទឹកភ្លៀងកម្រិតខ្ពស់ ជំនន់ភ្លាមៗ ជំនោរសមុទ្រ ខ្យល់កន្រ្តាក់ដ៏មហន្តរាយ ការរអិលបាក់ដី។ ភាគកណ្ដាលវៀតណាម និងខាងជើងវៀតណាម បាន​រងការវាយប្រហារដោយព្យុះនេះជាច្រើនដងរួចទៅហើយនៅឆ្នាំ ២០២៥ ហើយអាជ្ញាធរឧត្តុនិយមវៀតណាម​ព្យាករថា ព្យុះយ៉ាងហោចណាស់ ៣ ទៀត នឹងវាយប្រហារប្រទេសរបស់ខ្លួន ទម្រាំរដូវកាលព្យុះបិទបញ្ចប់នៅខែវិច្ឆិកា។

ជាធម្មតា ព្យុះនៅចុងរដូវ ទំនោរបក់បោកមកភាគកណ្ដាលវៀតណាម ពោលគឺនៅក្បែរកម្ពុជា ដោយសារតែប្រព័ន្ធសម្ពាធខ្ពស់ពីភាគខាងជើង ដែលរុញច្រានផ្លូវព្យុះឱ្យ​កាន់តែនៅត្បូង។

​