ឆ្នាំ២០២៥ ថៃជួប​វិបត្តិធំៗ​ចំនួន​៤

ប្រទេសថៃកំពុងប្រឈមមុខនឹងសម្ពាធសេដ្ឋកិច្ចកាន់តែខ្លាំងនៅក្នុងឆ្នាំ២០២៥ ខណៈដែលវិបត្តិធំៗចំនួនបួន រួមមាន ជម្លោះព្រំដែនជាមួយកម្ពុជា, អស្ថិរភាពនយោបាយ, ការធ្លាក់ចុះសេដ្ឋកិច្ច និងទឹកជំនន់ធ្ងន់ធ្ងរ បានរួមបញ្ចូលគ្នាបង្ក​ឲ្យ​មានការខាតបង់ផ្នែកហិរញ្ញវត្ថុយ៉ាងធ្ងន់ធ្ងរនៅទូទាំងប្រទេស។

ជម្លោះព្រំដែនជាមួយកម្ពុជា៖ ការប៉ះទង្គិចគ្នានៅតាមបណ្តោយព្រំដែនជាមួយ​កម្ពុជា បានធ្វើ​ឲ្យ​ប្រទេសថៃខាតបង់ថវិកាអស់ជាង១០​ពាន់លានបាតរួចទៅហើយ លើការចំណាយសម្រាប់ការជម្លៀសមនុស្ស និងការខូចខាតទ្រព្យសម្បត្តិ។ ជាមួយគ្នានេះ ការបិទព្រំដែនក្នុងរយៈពេលយូរ អាចបង្ក​ឲ្យ​ខាតបង់ពាណិជ្ជកម្មប្រហែល១០​ពាន់លានបាតក្នុងមួយខែៗ។ បន្ថែម​ពី​នេះ រដ្ឋាភិបាលបានត្រៀមថវិកាយ៉ាងហោចណាស់២៥ពាន់លានបាត សម្រាប់ប្រតិបត្តិការសង្គ្រោះ និងសន្តិសុខ។ នេះ​បើ​យោង​តាម​ទិន្នន័យ​ដែល​ធ្លាប់​​​ចុះ​ផ្សាយ​​​ដោយ​​ទីភ្នាក់ងារ​ព័ត៌មាន Reuters, Nikkei Asia និង​ Thai Enquirer។

អស្ថិរភាពនយោបាយ៖ ភាពចលាចលផ្នែកនយោបាយបន្ទាប់ពីការរំលាយសភា បានធ្វើ​ឲ្យ​ប៉ះពាល់ដល់សេដ្ឋកិច្ច​ថៃ​បន្ថែមទៀត។ សាកលវិទ្យាល័យនៃសភាពាណិជ្ជកម្មថៃ បានប៉ាន់ប្រមាណថា អស្ថិរភាពនយោបាយ និងការបោះឆ្នោតថ្មី អាចធ្វើ​ឲ្យ​សេដ្ឋកិច្ចខាតបង់លើសពី​១១២​ពាន់លានបាត ដែលបង្ក​ឲ្យ​មានការយឺតយ៉ាវក្នុងការអនុម័តកញ្ចប់ថវិកាឆ្នាំ​២០២៦ និងធ្វើ​ឲ្យ​គម្រោងហេដ្ឋារចនាសម្ព័ន្ធ ក៏ដូចជាការចំណាយលើសុខុមាលភាពនានាត្រូវគាំងជាប់។

ការធ្លាក់ចុះសេដ្ឋកិច្ច៖ សេដ្ឋកិច្ចជារួមក៏កំពុងមានការធ្លាក់ចុះផងដែរ។ ធនាគារពិភពលោកបានកាត់បន្ថយការព្យាករកំណើនសេដ្ឋកិច្ចរបស់ថៃសម្រាប់ឆ្នាំ២០២៥ មកត្រឹម១,៨% ដោយលើកឡើងពីតម្រូវការក្នុងស្រុកខ្សោយ បំណុលគ្រួសារខ្ពស់ជិត៩១%នៃGDP និងការកើនឡើងនៃបំណុលមិនដំណើរការ (NPL) ដែលជំរុញឲ្យ​ធនាគារកណ្តាលបញ្ចុះអត្រាការប្រាក់មកត្រឹម១,២៥%។

ទឹកជំនន់ធ្ងន់ធ្ងរ៖ ទឹកជំនន់ដែលបង្កឡើងដោយព្យុះទីហ្វុង Kalmaegi កាលពីខែវិច្ឆិកា បានបង្កការខូចខាតលើស​ពី​​១០០​​ពាន់លានបាត ដោយបានវាយប្រហារបណ្តាខេត្តភាគខាងត្បូង ជា​ពិសេស​នៅ​ទីក្រុងហាតយ៉ៃ ចំពេលរដូវកាលទេសចរណ៍កំពុងឡើងខ្ពស់ ដែលកាន់តែបង្កើនបញ្ហាប្រឈមសេដ្ឋកិច្ចរបស់ប្រទេស។ យ៉ាងហោចណាស់មានមនុស្សស្លាប់ចំនួន ១៤០នាក់​នៅ​​ហាតយ៉ៃ ដោយមានផ្ទះជាង ១០០ ០០០​ខ្នង និងមនុស្សជិត ៣​លាននាក់រងផលប៉ះពាល់នៅទូទាំងតំបន់ភាគខាងត្បូង៕

ប្រែសម្រួល៖ ឈាង