លោកអានុទីន សន្យាសង់ជញ្ជាំងព្រំដែន បើជាប់ឆ្នោតជា​នាយករដ្ឋមន្ត្រី​ម្ដង​ទៀត

នាយករដ្ឋមន្ត្រីចាំផ្ទះ លោក អានុទីន ឆានវីរៈគុល បានសន្យា​នឹងបន្តទៅមុខនូវគម្រោងសាងសង់ជញ្ជាំងព្រំដែនដ៏ចម្រូងចម្រាសតាមបណ្តោយព្រំដែនថៃ-កម្ពុជា ​បើគណបក្ស Bhumjaithai របស់លោក ទទួលបានជ័យជម្នះក្នុងការបោះឆ្នោតសកលខាងមុខ ដែលគ្រោងធ្វើឡើងនៅថ្ងៃទី៨ ខែកុម្ភៈ ឆ្នាំ២០២៦។

ចេញ​ផ្សាយ​នា​ថ្ងៃ​អង្គារ​​​ទី​៣០​ ខែ​ធ្នូ ឆ្នាំ​២០២៥ បាងកក​ប៉ុស្តិ៍​បាន​ឲ្យ​ដឹង​ថា លោក​អានុទីន បានសង្កត់ធ្ងន់ថា ជញ្ជាំងនេះគឺជាមូលដ្ឋានគ្រឹះនៃរបៀបវារៈសន្តិសុខជាតិរបស់គណបក្សលោក។​ លោក​បាន​បញ្ជាក់​ទៀត​ថា ជញ្ជាំង​ព្រំដែន​ដែលបានស្នើឡើងនេះ មានបំណងពង្រឹងសុវត្ថិភាពសម្រាប់ទាំងបុគ្គលិកយោធា និងប្រជាជនស៊ីវិល បន្ទាប់ពីមានជម្លោះព្រំដែន​ជាមួយ​កម្ពុជា ដែលបានធ្វើ​ឲ្យ​មនុស្សរាប់ម៉ឺន​នាក់ត្រូវ​ផ្លាស់ប្តូរទីលំនៅ។

គម្រោងនេះ ដែលទទួលបានការយល់ព្រមពីព្រះនាងម្ចាស់ Chulabhorn ត្រូវបានគ្រោងនឹងអនុវត្តជាដំណាក់កាល ដោយ​​ក្នុង​​ជំហាន​ដំបូង ការសាងសង់នឹងចាប់ផ្តើមនៅក្នុងតំបន់ «មិនមានជម្លោះ» ជាពិសេសនៅស្រុក Pong Nam Ron នៃ​ខេត្តចាន់បុរី។ ជញ្ជាំងនេះត្រូវបានប៉ាន់ប្រមាណថាមានតម្លៃប្រហែល ៧​លានបាតក្នុងមួយគីឡូម៉ែត្រ (ឬ ២០៤ ០០០​ដុល្លារ/គីឡូម៉ែត្រ) ដោយប្រើប្រាស់ថវិកាចម្បងពីកញ្ចប់ថវិកាការពារជាតិ។ ​ចំពោះ​ហេដ្ឋារចនាសម្ព័ន្ធ ផែនការនេះរួមបញ្ចូលទាំងផ្លូវយុទ្ធសាស្ត្រសម្រាប់ល្បាតដែលសាងសង់នៅពីក្រោយជញ្ជាំង ដើម្បីអនុញ្ញាត​ឲ្យ​មានការឆ្លើយតបសន្តិសុខបានឆាប់រហ័ស។

ជញ្ជាំងព្រំដែនបានក្លាយជាចំណុចក្តៅដ៏សំខាន់មួយ នៅមុនការបោះឆ្នោត​របស់​ថៃ​នា​ខែកុម្ភៈ​ខាង​មុខ។ ខណៈពេលដែលលោកអានុទីន បានកំណត់រូបភាពជញ្ជាំងនេះថាជាការការពារចាំបាច់ប្រឆាំងនឹងការរំលោភបំពានទឹកដី និងបទឧក្រិដ្ឋឆ្លងដែន អ្នករិះគន់ និងអ្នកវិភាគក្នុងតំបន់បានលើកឡើងថា ទង្វើនេះអាចធ្វើ​ឲ្យ​ការចរចាបទឈប់បាញ់ដ៏ស្មុគស្មាញជាមួយទីក្រុងភ្នំពេញ កាន់តែមានភាពរកាំរកូស៕

ប្រែសម្រួល៖ ឈាង