លោកត្រាំ នឹងជួបជាមួយមេ​បក្ស​ប្រឆាំង​វ៉េណេស៊ុយអេឡា ក្នុង​សប្ដាហ៍​នេះ

សេតវិមានបានបញ្ជាក់​​ថា ប្រធានាធិបតី ដូណាល់ ត្រាំ គ្រោងនឹងជួបពិភាក្សាជាមួយមេដឹកនាំបក្សប្រឆាំងវ៉េណេស៊ុយអេឡា លោកស្រី María Corina Machado នៅថ្ងៃព្រហស្បតិ៍សប្តាហ៍នេះ។ នេះ​បើយោង​តាម​ការ​ចុះ​ផ្សាយ​របស់​ France24 នា​ថ្ងៃ​អង្គារ​ទី​១៣​ខែ​មករា​ឆ្នាំ​២០២៦។

ជំនួបដ៏សំខាន់នេះ កើតឡើងស្របពេលដែលទីក្រុងវ៉ាស៊ីនតោនកំពុងបង្កើនឥទ្ធិពលលើទីក្រុងការ៉ាកាស បន្ទាប់ពីប្រតិបត្តិការយោធាកាលពីថ្ងៃទី៣​​មករា ដែលបានឈានទៅដល់ការចាប់ខ្លួនមេដឹកនាំកាន់អំណាចយូរអង្វែង លោក Nicolás Maduro។

ចាប់តាំងពីការចាប់ខ្លួនលោក Maduro ដោយកងកម្លាំងអាមេរិកមក រដ្ឋបាលលោកត្រាំ​បានដើរតួនាទីយ៉ាងសំខាន់ក្នុងការត្រួតពិនិត្យទិដ្ឋភាពនយោបាយនៅវ៉េណេស៊ុយអេឡា ដោយបានធ្វើការជាចម្បងជាមួយប្រធានាធិបតីស្តីទី លោកស្រី Delcy Rodríguez ដើម្បីធានា​ឲ្យ​បាននូវស្ថិរភាពក្នុងតំបន់ និងការទទួលបានសិទ្ធិទាញយកប្រេងបម្រុងដ៏ច្រើនសន្ធឹកសន្ធាប់របស់ប្រទេសនេះ។

ខណៈពេលដែលលោកស្រី Machado និងសម្ព័ន្ធមិត្តគឺលោក Edmundo González Urrutia ត្រូវបានគេមើលរំលងក្នុងរយៈពេលប៉ុន្មានសប្តាហ៍ចុងក្រោយ ការអញ្ជើញ​ឲ្យ​មាន​ជំនួប​ជាមួយ​លោក​ត្រាំ​ក្នុងសប្តាហ៍នេះបង្ហាញពីសញ្ញានៃការផ្លាស់ប្តូរការចូលរួមផ្នែកការទូត​របស់​អាមេរិក​ជាមួយក្រុមប្រឆាំងប្រជាធិបតេយ្យ។

ជំនួបនេះទៀត​សោត​កើតឡើងចំពេលដែលមានសម្ពាធអន្តរជាតិកាន់តែខ្លាំងលើថ្នាក់ដឹកនាំបណ្តោះអាសន្ននៅទីក្រុងការ៉ាកាស ឲ្យ​ពន្លឿនការដោះលែងអ្នកទោសនយោបាយ។ ទោះបីជារដ្ឋាភិបាលបានប្រកាសដោះលែងអ្នកជាប់ឃុំចំនួន​១១៦​នាក់កាលពីថ្ងៃចន្ទក៏ដោយ ក៏អង្គការសិទ្ធិមនុស្ស និងអ្នកជំនាញអង្គការសហប្រជាជាតិបានព្រមានថា មនុស្សរាប់រយនាក់ទៀតនៅតែបន្តជាប់ឃុំឃាំងនៅឡើយ។ ក្រុមគ្រួសាររបស់អ្នកជាប់ឃុំបានបន្តការជួបជុំគ្នានៅខាងក្រៅមន្ទីរឃុំឃាំង ដូចជាពន្ធនាគារ El Rodeo ជាដើម ដោយបានសម្តែងការមិនពេញចិត្តចំពោះភាពយឺតយ៉ាវនៃការសន្យា «អន្តរកាលទៅកាន់ប្រជាធិបតេយ្យ»។

លោកស្រី Machado ដែលទទួលបានរង្វាន់ណូបែលសន្តិភាពឆ្នាំ២០២៥ សម្រាប់ការតស៊ូមតិផ្នែកសិទ្ធិប្រជាធិបតេយ្យ កាលពីពេលថ្មីៗនេះបានជួបជាមួយសម្តេចប៉ាប Leo XIV នៅបុរីវ៉ាទីកង់ ដើម្បីស្នើសុំអន្តរាគមន៍សម្រាប់អ្នកដែលនៅតែជាប់ពន្ធនាគារ។ ស្រប​ពេលដែលទីក្រុងវ៉ាស៊ីនតោន និងទីក្រុងការ៉ាកាសកំពុងឈានទៅរកការបើកទំនាក់ទំនងការទូតឡើងវិញ កិច្ចពិភាក្សានៅសេតវិមានខាងមុខនេះ ត្រូវបានគេរំពឹងថានឹងផ្តោតលើការកំណត់ពេលវេលាសម្រាប់ការបោះឆ្នោតដោយសេរី និងវិបត្តិមនុស្សធម៌ដែលកំពុងញាំញីប្រទេសក្នុងតំបន់អាមេរិកខាងត្បូងមួយនេះ៕

ប្រែសម្រួល៖ ឈាង