លោកត្រាំ ព្រមានថា អ៊ីរ៉ង់នឹង​បាត់​ចេញ​ពីផែនដី បើ​រៀប​គម្រោងធ្វើឃាតរូបលោក

ប្រធានាធិបតីអាមេរិក លោក ដូណាល់ ត្រាំ បានថ្លែងកាលពីថ្ងៃអង្គារ​ទី​២០​ខែ​មករា​ឆ្នាំ​២០២៦​​ថា ប្រទេសអ៊ីរ៉ង់នឹងត្រូវ «បំផ្ទុះខ្ទេចជា​ផេះ» រលាយ​បាត់​ចេញ​ពី​ផែនដី បើមេដឹកនាំ​ខ្លួន​ហ៊ាន​អនុវត្ត​គម្រោង​ធ្វើឃាតលើរូបលោក។

ក្នុង​បទ​សម្ភាសន៍​ជាមួយ​សារព័ត៌មាន NewsNation លោកត្រាំ បានប្រាប់​ថា «ពួកគេមិនគួរធ្វើបែបនោះទេ» ដោយលោកបានបន្ថែមថា លោកបានបន្សល់ទុកនូវការណែនាំជាស្រេចក្នុងការវាយបកវិញ បើមានការវាយប្រហារណាមួយ​បង្ក​ឡើង​ដោយ​អ៊ីរ៉ង់។

មន្ត្រីចារកម្ម​អាមេរិក បានរាយការណ៍ជូនលោកត្រាំ ក្នុងអំឡុងពេលយុទ្ធនាការបោះឆ្នោតប្រធានាធិបតីឆ្នាំ​២០២៤ អំពីការគំរាមកំហែងរបស់អ៊ីរ៉ង់ ដែលអតីតអគ្គមេធាវី លោក Merrick Garland បាននិយាយថា វា​ទាក់ទង​​ទៅនឹងការសងសឹកចំពោះការសម្លាប់ឧត្តមសេនីយ៍អ៊ីរ៉ង់ លោក Qassem Soleimani កាលពីឆ្នាំ២០២០ ក្រោមរដ្ឋបាលអាណត្តិទីមួយរបស់លោកត្រាំ។

លោកត្រាំ បានរិះគន់ប្រធានាធិបតី ចូ បៃដិន ចំពោះការមិនបានចេញមុខនិយាយជាសាធារណៈ ដោយលោកលើកឡើងថា ប្រធានាធិបតីគួរតែការពារគ្នាទៅវិញទៅមក នៅពេលប្រឈមមុខនឹងការគំរាមកំហែងពីបរទេស។

លោកត្រាំ បាន​​​បញ្ជាក់​ជា​ដដែលៗថា អ៊ីរ៉ង់នឹងត្រូវ«កម្ទេចឲ្យ​រលាយ» បើព្យាយាមធ្វើឃាតរូបលោក ដែលជាការអត្ថាធិប្បាយដែលលោកបាន​និយាយ​សាជាថ្មី បន្ទាប់ពីបានចុះហត្ថលេខាលើបញ្ជាប្រតិបត្តិដែលអនុញ្ញាត​ឲ្យ​មានការដាក់សម្ពាធជាអតិបរមាលើទីក្រុងតេហេរ៉ង់។

ការលើកឡើងនេះ ធ្វើឡើងចំពេលមានការតវ៉ាប្រឆាំងរដ្ឋាភិបាលជាច្រើនសប្តាហ៍នៅក្នុងប្រទេសអ៊ីរ៉ង់ ដែលបានបណ្តាល​ឲ្យ​មនុស្សរាប់ពាន់នាក់ស្លាប់ នេះបើយោងតាមក្រុមសិទ្ធិមនុស្ស។ លោកត្រាំ បានព្រមានថា សកម្មភាពយោធារបស់​អាមេរិកនៅតែជាជម្រើស ក្នុង​ករណី​ការប្រហារជីវិត​ក្នុង​ប្រទេស​អ៊ីរ៉ង់​នៅតែបន្ត។

មេដឹកនាំកំពូលរបស់អ៊ីរ៉ង់ Ayatollah Ali Khamenei បានចោទប្រកាន់​អាមេរិកថាជាអ្នកញុះញង់​ឲ្យ​មានភាពចលាចល ដោយបានបដិសេធការអះអាងរបស់ទីក្រុងវ៉ាស៊ីនតោន និងព្រមានថា អ៊ីរ៉ង់នឹងមិនអត់ឱនចំពោះអ្វីដែលលោកហៅថាជាការជ្រៀតជ្រែកពីបរទេសនោះឡើយ៕

ប្រែសម្រួល៖ ឈាង