វៀតណាម ហាមពលរដ្ឋ មិនឲ្យហូបផ្លែឈើ ដែលមានស្នាមសត្វខាំ ដើម្បីទប់ស្កាត់ វីរុសនីប៉ាហ៍

ស្របពេលពិភពលោកកំពុងមានក្តីបារម្ភអំពីការផ្ទុះវីរុសនីប៉ាហ៍ (Nipah) ហើយប្រទេសជាច្រើនបានអនុវត្តវិធានការទប់ស្កាត់រួចទៅហើយនោះ ពេលនេះប្រទេសវៀតណាមនៅក្បែរកម្ពុជា ក៏ដាក់ចេញវិធា​នការបង្ការផងដែរ ដោយហាមឃាត់ពលរដ្ឋមិនឲ្យហូបផ្លែឈើណាដែលមានស្នាមសត្វខាំឡើយ។

តាមការផ្សាយរបស់ VN Express នៅថ្ងៃអង្គារទី២៧ខែមករាឆ្នាំ២០២៦ ក្រសួងសុខាភិបាលបានចេញសេចក្តីប្រកាសឲ្យពលរដ្ឋកុំហូបផ្លែឈើណាដែលមានស្នាមសត្វប្រចៀវឬបក្សីផ្សេងទៀត ខាំឬចឹកឲ្យសោះ ដើម្បីចៀសវាងការឆ្លងមេរោគនីប៉ាហ៍។

ក្រសួងណែនាំទៀតថា សូមប្រជាពលរដ្ឋអនុវត្តវិធីសាស្រ្តហូបស្អាតផឹកស្អាត ពោលគឺហូបអាហារដែលចម្អិនឆ្អិន និងផឹកទឹកដាំពុះ ក៏ដូចជាចិតសំបកផ្លែឈើមុនពេលទទួលទាន។ ម្យ៉ាង សូមកុំបរិភោគ ឬផឹកទឹកផ្លែឈើដែលមានស្នាមសត្វខាំឬចឹក ហើយចៀសវាងផឹកទឹកត្នោតឬទឹកដូងស្រស់។

ស្របពេលជាមួយគ្នានោះដែរ ក្រសួងសុខាភិបាលបានណែនាំដល់បណ្តាមូលដ្ឋាន ឲ្យពង្រឹងការឃ្លាំមើលជំងឺនៅតាមច្រកព្រំដែន មូលដ្ឋានសុខាភិបាល និងក្នុងសហគមន៍។

សេចក្តីណែនាំរបស់ក្រសួងសុខាភិបាលវៀតណាម កើតឡើងបន្ទាប់ពី ថៃបញ្ជាក់ពីការរកឃើញវីរុស​នេះ នៅក្នុងខ្លួនសត្វប្រចៀវស៊ីផ្លែឈើក្នុងប្រទេសរបស់ខ្លួន ហើយអ្វីដែលគួរឲ្យកត់សម្គាល់គឺថា វីរុសរកឃើញនោះជា «ពូជបង់ក្លាដែស» ដែលកាចសាហាវនិងមានអត្រាមរណៈខ្លាំងចន្លោះពី៤០%-៧៥%។

តាមការផ្សាយរបស់ Bangkok Post, លោក Sophon Iamsirithaworn អនុរដ្ឋលេខាធិការក្រសួងសុខាភិបាលថៃ បានប្រាប់អ្នកយកព័ត៌មានកាលពីថ្ងៃចន្ទទី២៦ខែមករាឆ្នាំ២០២៦ថា មិនមានការឆ្លងវីរុសនេះលើមនុស្សទេ ប៉ុន្តែថៃបានរកឃើញ «មេរោគនីប៉ាហ៍» នៅក្នុងខ្លួនសត្វប្រចៀវស៊ីផ្លែឈើ ហើយក្នុងនោះមានមួយចំនួនជា «ពូជបង់ក្លាដែស»។

យ៉ាងណា លោកអះអាងថា ថៃមានកម្រិតដង់ស៊ីតេមេរោគទាបជាងបណ្តាប្រទេសដែលមានការផ្ទុះឡើងនៃជំងឺនីប៉ាហ៍ ហើយគ្រោះថ្នាក់ដែលធំជាងនេះ គឺមិនមែនការឆ្លងពីសត្វប្រចៀវទេ ប៉ុន្តែគឺមកពីមនុស្សឆ្លងរោគ ដែលធ្វើដំណើរមកពីបណ្តាប្រទេសដែលមានការផ្ទុះឡើងនៃជំងឺនេះ»។

ទន្ទឹមនោះ លោកស្រី Jurai Wongsawat អ្នកនាំពាក្យនៃនាយកដ្ឋានគ្រប់គ្រងជំងឺថៃ និយាយថា មានវីរុសនីប៉ាហ៍ ពូជបង់ក្លាដេសនិងពូជម៉ាឡេស៊ី។ ពូជបង់ក្លាដែស មានគ្រោះថ្នាក់ខ្លាំងជាង ដោយមានអត្រាស្លាប់ខ្ពស់បំផុត និងបង្កឲ្យមានរោគសញ្ញាផ្លូវដង្ហើម។

ការធ្វើតេស្តលើប្រចៀវស៊ីផ្លែឈើនៅក្នុងប្រទេសថៃ បង្ហាញថាមានតែ ១០% ប៉ុណ្ណោះនៃសំណាកដែលមានផ្ទុកវីរុសនីប៉ាហ៍។ ចំណែកឯសត្វប្រចៀវនៅក្នុងប្រទេសឥណ្ឌាវិញ គឺមានផ្ទុករហូតដល់ទៅ ៤០-៥០%។

វីរុសនីប៉ាហ៍ ត្រូវបានរកឃើញដំបូងនៅប្រទេសម៉ាឡេស៊ី កាលពីឆ្នាំ១៩៩៩។ លុះមកដល់ឆ្នាំ២០០១ ករណីដំបូងនៃការឆ្លងវីរុសនេះលើមនុស្ស ត្រូវបានកត់ត្រាក្នុងប្រទេសបង់ក្លាដែស ហើយបន្ទាប់មកក៏មានករណីឆ្លងនៅក្នុងប្រទេសឥណ្ឌា។

យោងតាមអង្គការសុខភាពពិភពលោក (WHO) វីរុសនីប៉ាហ៍ បានបង្កការឆ្លងក្នុងចំនួនតិចតួចនៅតាមបណ្តាប្រទេសមួយចំនួន ដោយមិនទាន់មានការផ្ទុះឡើងជាទ្រង់ទ្រាយធំនៅឡើយទេ៕

អត្ថបទ៖ សុខ សុវណ្ណ