ថៃ ត្រៀមមន្ទីរពេទ្យរួចហើយ ដើម្បីដាក់អ្នកជំងឺនីប៉ាហ៍

ប្រទេសថៃបានត្រៀមមន្ទីរពេទ្យជាច្រើនកន្លែងរួចរាល់អស់ហើយ ដើម្បីដាក់អ្នកជំងឺនីប៉ាហ៍ (Nipah) ស្របពេលពិភពលោក កំពុងកើតក្តីបារម្ភអំពីការឆ្លងរាលដាលនៃជំងឺនេះ។

តាមការផ្សាយរបស់ Bangkok Post នៅថ្ងៃព្រហស្បតិ៍ទី២៩ខែមករាឆ្នាំ២០២៦ នាយកដ្ឋានសេវាវេជ្ជសាស្ត្របញ្ជាក់ថា មន្ទីរពេទ្យ Rajavithi, Nopparat, Rajathanee, Lerdsin និងទីតាំងសុខាភិបាលធំៗដទៃទៀត បានត្រៀមរួចរាល់អស់ហើយ ដើម្បីទទួលអ្នកជំងឺឬអ្នកសង្ស័យឆ្លងវីរុសនីប៉ាហ៍។

លោក Nattapong Wongwiwat អគ្គនាយកនាយកដ្ឋានខាងលើបានឲ្យដឹងថា ជាមួយនឹងវិធានការផ្សេងៗជាច្រើន មន្ទីរពេទ្យទាំងឡាយបានត្រៀមលក្ខណៈដូចជាការ បង្កើនកម្លាំងបុគ្គលិកនិងគ្រូពេទ្យ បន្ថែមបរិក្ខារពេទ្យ គ្រែអ្នកជំងឺ បន្ទប់វះកាត់ និងបន្ទប់ធ្វើចត្តាឡីស័ក។

ដ្បិតមិនទាន់បញ្ជាក់ពីករណីវិជ្ជមានណាមួយ ប៉ុន្តែថៃក៏ចាត់វិធានការដែរ ដោយយកវិធីសាស្រ្តសម័យកូវីដ-១៩ ​មកប្រើប្រាស់សាជាថ្មី ដើម្បីបង្ការការឆ្លង។

កាលពីថ្ងៃចន្ទទី២៦ខែមករាឆ្នាំ២០២៦ នាយកដ្ឋានគ្រប់គ្រងជំងឺថៃ (DDC) បានប្រកាសថា មន្ត្រីគ្រប់គ្រងជំងឺឆ្លងអន្តរជាតិនៅព្រលានយន្តហោះធំៗទាំងបីដូចជាសុវណ្ណភូមិ ដនមឿង និងភូកេត បានចាប់ផ្តើមបង្កើនការពិនិត្យអ្នកដំណើរដែលចូលមក ជាពិសេសអ្នកដែលធ្វើដំណើរមកពីរដ្ឋ West Bengal នៃប្រទេសឥណ្ឌាតែម្តង។

នីតិវិធីទាំងនោះរួមមាន ការវាស់កម្ដៅនិងការវាយតម្លៃនៅនឹងកន្លែងចំពោះអ្នកដំណើរដែលមានសញ្ញាសង្ស័យ។ ចំពោះអ្នកដំណើរដែលរកឃើញថាមានគ្រុនក្តៅខ្លាំង ឬចេញរោគសញ្ញាពាក់ព័ន្ធវីរុសនីប៉ាហ៍ នឹងត្រូវបញ្ជូនទៅកាន់កន្លែងចត្តាឡីស័ក ដើម្បីពិនិត្យបន្ថែម។

អ្នកដំណើរមកពី West Bengal ក៏នឹងត្រូវផ្តល់ឲ្យនូវ «ប័ណ្ណប្រុងប្រយ័ត្នសុខភាព» ដែលក្នុងនោះ មានរៀបរាប់ពីរោគសញ្ញាត្រូវតាមដាន និងជំហានដែលត្រូវអនុវត្តប្រសិនបើពួកគេមានអារម្មណ៍មិនស្រួលខ្លួនផងដែរ។

អ្នកដំណើរដែលលេចចេញរោគសញ្ញាក្នុងរង្វង់ ២១ ថ្ងៃបន្ទាប់ពីការមកដល់ ត្រូវបានណែនាំឲ្យស្វែងរកការព្យាបាលជាបន្ទាន់ និងត្រូវប្រាប់បុគ្គលិកសុខាភិបាលអំពីប្រវត្តិធ្វើដំណើរ ព្រមទាំងកាលបរិច្ឆេទដែលចាប់ផ្តើមមានរោគសញ្ញា។

ថៃបានបញ្ជាក់ពីការរកឃើញវីរុសនីប៉ាហ៍ នៅក្នុងខ្លួនសត្វប្រចៀវស៊ីផ្លែឈើក្នុងប្រទេសរបស់ខ្លួន ហើយអ្វីដែលគួរឲ្យកត់សម្គាល់គឺថា វីរុសរកឃើញនោះជា «ពូជបង់ក្លាដែស» ដែលកាចសាហាវនិងមានអត្រាមរណៈខ្លាំងចន្លោះពី៤០%-៧៥%៕

អត្ថបទ៖ សុខ សុវណ្ណ