ថៃ ទាញសញ្ញាគ្រោះថ្នាក់នៃរលកកម្តៅ ដោយព្រមានថា ឆ្នាំនេះ នឹងក្តៅខ្លាំងណាស់

ខែប្រាំងមិនទាន់ចូលមកដល់ទេនៅថៃ ប៉ុន្តែប្រទេសនេះបានជួបប្រទះអាកាសធាតុក្តៅជាបណ្តើរៗហើយ ដល់ថ្នាក់ឥឡូវមានការព្រមានទៀតផង អំពីរលកកម្តៅដ៏ខ្លាំងដែលនឹងបង្កគ្រោះថ្នាក់ដល់មនុស្ស។

មុននេះ នាយកដ្ឋានឧតុនិយមថៃព្យាករណ៍ថា រដូវក្តៅឆ្នាំនេះនឹងធ្ងន់ធ្ងរជាងឆ្នាំមុនទៅទៀត ហើយឥឡូវ នាយកដ្ឋានសេវាវេជ្ជសាស្ត្រ (DoMS) បានចេញសេចក្តីណែនាំ ដោយជំរុញឲ្យប្រជាពលរដ្ឋ និងអាជីវកម្មនានា ត្រៀមលក្ខណៈសម្រាប់រដូវក្តៅដែលនឹងមកដល់ខាងមុខ ព្រោះមានគ្រោះថ្នាក់ខ្លាំង ជាពិសេសក្រុមមនុស្ស៥ប្រភេទដែលប្រឈមហានិភ័យដូចជា៖ មនុស្សវ័យចំណាស់ ក្មេងៗ ស្រ្តីមានផ្ទៃពោះ អ្នកជំងឺរ៉ាំរ៉ៃ និងអ្នកទាំងឡាយណាដែលខ្វះទឹកមិនបាន។

តាមការផ្សាយរបស់ Bangkok Post នៅថ្ងៃពុធទី១៨ខែកុម្ភៈ លោក Akkarathan Jitnuyanon អគ្គនាយករង DoMS និយាយថា សីតុណ្ហភាពពិភពលោកកំពុងកើនឡើង ហើយថៃកំពុងប្រឈមមុខនឹងហានិភ័យខ្ពស់នៃជំងឺដាច់សរសៃឈាមខួរក្បាលដោយសារកម្តៅ។ អាកាសធាតុក្តៅក៏អាចធ្វើឲ្យជំងឺរ៉ាំរ៉ៃកាន់តែអាក្រក់ទៅៗផងដែរ ជាពិសេសជំងឺបេះដូង និងសរសៃឈាម ព្រមទាំងជំងឺផ្លូវដង្ហើម។

ប៉ុន្មានសប្តាហ៍មុន ថៃបានចេញការព្យាកររួចហើយថា រដូវក្តៅឆ្នាំនេះនឹងចូលមកដល់រាងយឺតជាងឆ្នាំមុនៗ ប៉ុន្តែឆ្នាំនេះអាកាសធាតុនឹងក្តៅខ្លាំងជាងធម្មតា ហើយក៏មានការវាយប្រហារដោយព្យុះខែប្រាំងផងដែរ ខណៈតំបន់ខ្លះត្រូវប្រឈមនឹងគ្រោះរាំងស្ងួត។

តាមប្រភពពីនាយកដ្ឋានឧតុនិយមថៃ, ឆ្នាំនេះរដូវក្តៅនឹងចូលមកដល់យឺតជាងរាល់ឆ្នាំពីរសប្តាហ៍ ពោលគឺរដូវក្តៅនឹងចាប់ផ្តើមនៅចុងខែកុម្ភៈ ហើយសីតុណ្ហភាពជាមធ្យមទូទាំងប្រទេសត្រូវព្យាករថានឹងមានកម្រិត៣៥អង្សាសេ។

យ៉ាងណា តាមការព្យាករដដែល, តំបន់ភាគខាងជើងនឹងជាកន្លែងអាកាសធាតុក្តៅវាយប្រហារខ្លាំងបំផុត ដោយសីតុណ្ហភាពនឹងកើនលើស ៤២អង្សាសេ ហើយខេត្តធ្ងន់ធ្ងរជាងគេគឺ Mae Hong Son, Lampang និង Tak។

ទន្ទឹមនោះ នាយកដ្ឋានបានចេញការព្រមានថា ក្នុងអំឡុងរដូវក្តៅឆ្នាំនេះ ថៃនឹងជួបព្យុះខែប្រាំង និងភ្លើងឆេះព្រៃ ហើយតំបន់ខ្លះក៏ត្រូវរងគ្រោះដោយគ្រោះរាំងស្ងួតផងដែរ ជាពិសេសចាប់ពីពាក់កណ្តាលខែមីនាដល់ខែមេសា៕

អត្ថបទ៖ សុខ សុវណ្ណ