គុយវ៉ែត បង្កការ​ភ្ញាក់ផ្អើលដែល​បាញ់ទម្លាក់​​យន្តហោះ​ចម្បាំងអាមេរិក​ ពេលសង្គ្រាម​កំពុង​ផ្ទុះ​ខ្លាំង

បញ្ជាការកណ្តាលសហរដ្ឋអាមេរិក (Centcom) បាននិយាយកាលពីថ្ងៃចន្ទទី២មីនាថា ប្រព័ន្ធការពារដែនអាកាសប្រទេសគុយវ៉ែតបានបាញ់ទម្លាក់យន្តហោះចម្បាំង F-15 ចំនួនបីគ្រឿងរបស់អាមេរិកដោយអចេតនា ក្នុងអំឡុងសង្គ្រាម​កំពុង​ផ្ទុះ​ខ្លាំង ដោយពណ៌នាថា នេះជាឧប្បត្តិហេតុច្រឡំដៃបាញ់យន្តហោះសម្ព័ន្ធមិត្តជាក់ស្តែងក្នុងអំឡុងពេលជម្លោះជាមួយអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Reuters សេចក្តីថ្លែងការណ៍នេះ បានបញ្ជាក់ថា ក្នុងអំឡុងពេលប្រយុទ្ធយ៉ាងសកម្ម ដែលរួមមានការវាយប្រហារពីយន្តហោះអ៊ីរ៉ង់ មីស៊ីលផ្លោង និងយន្តហោះគ្មានមនុស្សបើក យន្តហោះចម្បាំងរបស់កងទ័ពអាកាសអាមេរិកត្រូវបានបាញ់ទម្លាក់ដោយអចេតនាដោយប្រព័ន្ធការពារដែនអាកាសគុយវ៉ែត ខណៈភាគីគុយវ៉ែត ក៏ទទួលស្គាល់ឧប្បត្តិហេតុនេះ និងកំពុងស៊ើបអង្កេតនៅ​ឡើយ។

វីដេអូ​នៃការ​បាញ់ទម្លាក់​ ដែលចែកចាយ​នៅលើបណ្តាញសង្គម បានបង្ហាញពីយន្តហោះមួយគ្រឿងដែលគេជឿថា ជាយន្តហោះ F-15 បានធ្លាក់ រួមជាមួយនឹងរូបភាពរបស់អ្នកបើកយន្តហោះកំពុងលោតឆ័ត្រយោង និងត្រូវបានកងកម្លាំងសន្តិសុខគុយវ៉ែត ព្រមទាំងមន្ត្រីត្រួតពិនិត្យអាវុធ បញ្ជូនពួកគេទៅកាន់កន្លែងផ្លូវការសម្រាប់ការត្រួតពិនិត្យសុវត្ថិភាព និងការវាយតម្លៃផ្នែកវេជ្ជសាស្ត្រ។ ការប្រគល់បានប្រព្រឹត្តទៅដោយរលូន ស្ថានភាពរបស់ទាហានទាំងពីរនាក់មានស្ថេរភាព ហើយមិនមានរបាយការណ៍អំពីរបួសធ្ងន់ធ្ងរនោះទេ។

ដោយឡែក អ្នកនាំពាក្យក្រសួងការពារជាតិគុយវ៉ែតបានបញ្ជាក់ថា ក្រុមស្វែងរក និងជួយសង្គ្រោះបានដាក់ពង្រាយយ៉ាងឆាប់រហ័ស និងបាននាំក្រុមនាវិកទៅកាន់មន្ទីរពេទ្យដើម្បីពិនិត្យ និងព្យាបាល។ លោកបានបន្ថែមថា សុខភាពរបស់ពួកគេមានស្ថេរភាពនោះទេ។

យ៉ាងណាមិញ ផ្អែកតាមការវាយតម្លៃដំបូងបង្ហាញថា នេះគឺជាឧប្បត្តិហេតុបាញ់ខុសឬច្រឡំដៃបាញ់ ទាក់ទងនឹងប្រព័ន្ធមីស៊ីល Patriot ដែលដាក់ពង្រាយនៅក្នុងតំបន់នោះ។ តែយ៉ាងណា ក៏មិនមានការបញ្ជាក់ជាផ្លូវការនោះទេ ប៉ុន្តែរបាយការណ៍ដំបូងបញ្ចាក់ទៀតថា យន្តហោះនេះអាចត្រូវបានគេកំណត់ខុសថា ជាគោលដៅអរិភាពក្រោមលក្ខខណ្ឌប្រុងប្រយ័ត្នខ្ពស់។

ការធ្លាក់យន្តហោះបានកើតឡើងនៅពេលដែលទីក្រុងវ៉ាស៊ីនតោនបានបញ្ជាក់ពីអ្នកស្លាប់ និងរបួសដំបូងនៅក្នុងប្រតិបត្តិការមួយនេះ។ បុគ្គលិកយោធាអាមេរិក ៣ នាក់ត្រូវបានសម្លាប់នៅមូលដ្ឋានមួយក្នុងប្រទេសគុយវ៉ែត ដែលបង្ហាញពីការកើនឡើងគួរឲ្យកត់សម្គាល់៕

អត្ថបទ៖ សាង ស្រីល័ក្ខ