អានុទីន បន្ទោសអ៊ីរ៉ង់ ថា ការវាយប្រហារលើកប៉ាល់ដឹកទំនិញថៃ គឺ «មិនសមស្របទាល់តែសោះ»

ក្រោយកប៉ាល់ដឹកទំនិញថៃ ត្រូវអ៊ីរ៉ង់បាញ់ក្បែរច្រកសមុទ្រ Hormuz ពេលនេះនាយករដ្ឋមន្ត្រី អានុទីន ឆាន់វីរៈគុល បានចេញមុខបន្ទោសទីក្រុងតេហេរ៉ង់ ដោយនិយាយថា៖ «ការវាយប្រហារនោះ គឺមិនសមស្របសោះឡើយ»។

ថ្លែងនៅទីស្នាក់ការកណ្ដាលគណបក្សភូមិចៃថៃ និងផ្សាយដោយ Khaosod នៅថ្ងៃព្រហស្បតិ៍ទី១២ខែមីនាឆ្នាំ២០២៦ អានុទីន និយាយថា ស្ថាប័នរដ្ឋាភិបាលដែលពាក់ព័ន្ធទាំងអស់ ត្រូវបានណែនាំឲ្យចាត់វិធានការគ្រប់បែបយ៉ាងដែលអាចធ្វើទៅបាន ដើម្បីជួយសង្គ្រោះក្រុមនាវិក។ បេសកកម្មការទូតថៃក៏ត្រូវបានបង្គាប់ឲ្យទាក់ទងទៅកាន់នាវិកទាំងនោះ និងផ្ដល់ជំនួយផងដែរ បើទោះបីជាការធ្វើដំណើរទៅកាន់តំបន់នោះអាចត្រូវចំណាយពេលយូរក៏ដោយ។

ទន្ទឹមនោះ លោកបញ្ជាក់ថា កាលៈទេសៈទាំងឡាយត្រូវតែត្រូវបានពិនិត្យជាមុនសិន មុននឹងវាយតម្លៃអំពីផលប៉ះពាល់ណាមួយលើទំនាក់ទំនងរវាងថៃនិងអ៊ីរ៉ង់។

សូមជម្រាបជាថ្មី កប៉ាល់ដឹកទំនិញដោតទង់ជាតិថៃឈ្មោះ MAYUREE NAREE បានរងការវាយប្រហារ កាលពីថ្ងៃពុធទី១១ខែមីនាឆ្នាំ២០២៦ អំឡុងពេលធ្វើដំណើរចេញពីកំពង់ផែ ខាលីហ្វា នៃប្រទេសអារ៉ាប់រួម ឆ្ពោះទៅកាន់ប្រទេសឥណ្ឌា បណ្តាលឲ្យនាវិក៣នាក់បាត់ខ្លួន ខណៈ២០នាក់ទៀតត្រូវបានជួយសង្គ្រោះនិងជម្លៀសដោយសុវត្ថិភាព ទៅកាន់ប្រទេសអូម៉ង់។

ទាក់ទិនការវាយប្រហារនេះ បើតាមការឲ្យដឹងពីឆ្មាំបដិវត្តន៍អ៊ីរ៉ង់ (IRGC), ខ្លួនបានប្រាប់កប៉ាល់នោះហើយថាកុំឲ្យឆ្លងកាត់ ប៉ុន្តែពួកគេមិនស្តាប់ ហើយផ្គើននឹងការព្រមាន ទើបសម្រេចចិត្តបើកការបាញ់ប្រហារតែម្តងទៅ៕

អត្ថបទ៖ សុខ សុវណ្ណ