ព័ត៌មានអន្ដរជាតិ

ហុងគ្រី គំរាមសងសឹកអ៊ុយក្រែនដោយឈប់ផ្គត់ផ្គង់ឧស្ម័ន រហូតដល់ទីក្រុងកៀវបើកបំពង់ប្រេងរុស្ស៊ីវិញ

បានផុស

៤ ខែ មុន

នៅ

ថ្ងៃព្រហស្បតិ៍ ២៦ មីនា ២០២៦

ដោយ

នាយករដ្ឋមន្ត្រីហុងគ្រី លោក Viktor Orban បានគំរាមសងសឹកអ៊ុយក្រែនក្នុងជម្លោះបំពង់បង្ហូរប្រេងពីរុស្ស៊ី ថា ទីក្រុង Budapest នឹងផ្អាកការផ្គត់ផ្គង់ឧស្ម័នទៅឲ្យអ៊ុយក្រែនបន្តិចម្តងៗ លុះត្រាតែការបញ្ជូនប្រេងរបស់រុស្ស៊ីតាមរយៈបំពង់បង្ហូរប្រេង Druzhba ត្រូវបានស្តារឡើងវិញភ្លាមៗ។ នេះបើយោងតាមរបាយការណ៍ ចុះផ្សាយដោយទីភ្នាក់ងារព័ត៌មាន Anadolu របស់តួកកីកាលពីថ្ងៃពុធ ទី២៥ មីនា។

**នាយករដ្ឋមន្ត្រីហុងគ្រី លោក Viktor Orban(រូបភាព៖Reuters)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅលើកញ្ចក់ទូរទស្សន៍ជាតិ នាយករដ្ឋមន្ត្រីហុងគ្រី លោក Orban បានប្រកាសថា ការសម្រេចចិត្តនេះត្រូវបានអនុម័តនៅក្នុងកិច្ចប្រជុំគណៈរដ្ឋមន្ត្រី។ ប្រទេសហុងគ្រីនឹងចាប់ផ្តើមកាត់បន្ថយការដឹកជញ្ជូនឧស្ម័នទៅអ៊ុយក្រែន ហើយជំនួសមកវិញ រក្សាទុកបរិមាណដែលនៅសល់ក្នុងស្រុក ដោយលើកឡើងពីការព្រួយបារម្ភអំពីសន្តិសុខថាមពល ដែលកំពុងកើតមាននៅស្ទើរទូទាំងសកលលោក។

មេដឹកនាំហុងគ្រីដែលមានចំណងមិត្តភាពស្អិតរមួតជាមួយមេដឹកនាំរុស្ស៊ីរូបនេះ បានសង្កត់ធ្ងន់ថា ដរាបណាអ៊ុយក្រែនមិនបន្តការតភ្ជាប់បញ្ជូនប្រេងរបស់រុស្ស៊ីឡើងវិញទេ នោះប្រទេសហុងគ្រីនឹងមិនស្តារការផ្គត់ផ្គង់ឧស្ម័នឡើងវិញទេ ដោយ លោក Orban ចោទប្រកាន់ទីក្រុងកៀវអំពីការរារាំងប្រតិបត្តិការនៃបំពង់បង្ហូរប្រេង Druzhba និង វាយប្រហារហេដ្ឋារចនាសម្ព័ន្ធដែលផ្គត់ផ្គង់ប្រទេសហុងគ្រី។

មិនតែប៉ុណ្ណោះ ប្រទេសហុងគ្រីបានអះអាងបន្ថែមទៀតថា ខ្លួនត្រូវតែ «បំបែកការបិទផ្លូវប្រេង» និងធានាការផ្គត់ផ្គង់ថាមពលដែលមានស្ថេរភាព ព្រមទាំងរក្សាតម្លៃប្រេងសាំងដែលមានតម្លៃទាបជូនប្រជាជជនផងដែរ។

អស់រយៈពេលជាច្រើនឆ្នាំមកហើយ អ៊ុយក្រែនគឺជាផ្លូវឆ្លងកាត់សម្រាប់ឧស្ម័នរុស្ស៊ីទៅកាន់អឺរ៉ុប និងទទួលឧស្ម័នត្រឡប់មកពីប្រទេសហុងគ្រីតាមរយៈប្រព័ន្ធបំពង់បង្ហូរប្រេងដែលអាចបញ្ច្រាស់បាន។ ទោះជាយ៉ាងណា តុល្យភាពនេះកំពុងផ្លាស់ប្តូរយ៉ាងឆាប់រហ័ស។ ជាក់ស្ដែង ទាំំងហុងគ្រី និងស្លូវ៉ាគី បានចោទប្រកាន់ទីក្រុងកៀវពីបទរារាំងការបញ្ជូនថាមពលពីរុស្ស៊ីដោយចេតនា ដើម្បីទទួលបានឥទ្ធិពលនយោបាយ ហើយចាប់តាំងពីពេលនោះមក បានសម្រេចចិត្តផ្អាកការផ្គត់ផ្គង់ប្រេងម៉ាស៊ូតដល់អ៊ុយក្រែន ដើម្បីឆ្លើយតបទៅនឹងបញ្ហាមួយនេះដោយផ្ទាល់៕

អត្ថបទ៖ សាង ស្រីល័ក្ខ