អាមេរិក ព្រមព្រៀងលក់យន្តហោះចម្បាំង F-16 និងមីស៊ីលទៅ ហ្វីលីពីន ក្នុងតម្លៃកប់ក្ដោង

ក្រសួងការបរទេសអាមេរិកបានយល់ព្រមលើការលក់យន្ដហោះចម្បាំង F-16 ក៏ដូចជាមីស៊ីល Sidewinder និង Harpoon ទៅកាន់ប្រទេសហ្វីលីពីន ក្នុងកិច្ចព្រមព្រៀងចំនួន ៣ ដាច់ដោយឡែកពីគ្នាដែលមានតម្លៃសរុបជាង ២.៥ ពាន់លានដុល្លារ ។

ការយល់ព្រមលក់នេះធ្វើឡើង ខណៈហ្វីលីពីនកំពុងស្វែងរកយន្តហោះចម្បាំងពហុមុខងារថ្មី ហើយកំពុងវាយតម្លៃយន្តហោះ F-16 និងយន្តហោះ SAAB Abs Gripen ។

ទន្ទឹមនោះ ការប្រកាសកាលពីថ្ងៃព្រហស្បតិ៍ក៏ធ្វើឡើង ស្របពេលដែលសហរដ្ឋអាមេរិក ព្យាយាមបន្តកិច្ចព្រមព្រៀងថ្មីជាមួយហ្វីលីពីន ដែលគ្រប់គ្រងវត្តមានកងទ័ពអាមេរិកនៅក្នុងប្រទេសនេះ ដែលមានសារៈសំខាន់ចំពោះយុទ្ធសាស្ត្ររបស់ទីក្រុងវ៉ាស៊ីនតោន ក្នុងការប្រឆាំងសកម្មភាពចិនដែលកំពុងពង្រីកនៅអាស៊ី ។

ចំណែកមន្ទីរបញ្ចកោណបាននិយាយថា ប្រទេសហ្វីលីពីនក៏បានស្នើសុំទិញយន្តហោះ F-16C Block 70/72 ចំនួន ១០ គ្រឿង និងយន្តហោះ F-16D Block 70/72 ចំនួន ២ គ្រឿង ដែលផលិតដោយក្រុមហ៊ុន Lockheed Martin ។

ទោះបីជាមានការយល់ព្រមលក់ពីក្រសួងការបរទេសក៏ដោយ ប៉ុន្តែការជូនដំណឹងនេះមិនបានបង្ហាញថា កិច្ចសន្យាត្រូវបានចុះហត្ថលេខា ឬការចរចារណាមួយបានបញ្ចប់នៅឡើយទេ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ បាក់អគារនៅ អាមេរិក ស្លាប់ម្នាក់ ៩៩ នាក់ទៀត មិនទាន់រកឃើញ