ព្រមានឲ្យហើយ! បើ ក្រុមតាលីបង់ កាន់កាប់បានមែន អាល្លឺម៉ង់ នឹងឈប់ផ្ដល់ជំនួយដល់ អាហ្វហ្គានីស្ថាន

រដ្ឋមន្ត្រីការបរទេសអាល្លឺម៉ង់លោក Heiko Maas បាននិយាយកាលពីថ្ងៃព្រហស្បតិ៍ថា អាល្លឺម៉ង់នឹងឈប់ផ្តល់ជំនួយដល់អាហ្វហ្គានីស្ថាន ប្រសិនបើក្រុមតាលីបង់កាន់អំណាចនៅក្នុងប្រទេស ហើយអនុវត្តច្បាប់ឥស្លាម Sharia ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីរូបនេះបាននិយាយនៅក្នុងកម្មវិធីពេលព្រឹកមួយ ដែលផ្សាយដោយបណ្តាញទូរទស្សន៍អាល្លឺម៉ង់ ARD និង ZDF ថា “យើងនឹងមិនផ្តល់ប្រាក់បន្ថែមទៀតដល់អាហ្វហ្គានីស្ថានឡើយ នៅពេលដែលពួកតាលីបង់បានកាន់កាប់ប្រទេសនេះទាំងស្រុង ណែនាំច្បាប់ Sharia” ។

លោកសង្កត់ធ្ងន់ថា អាហ្វហ្គានីស្ថានមិនអាចរស់បានទេ បើគ្មានជំនួយពីអន្តរជាតិ ។

លោក Maas បាននិយាយថា ប្រទេសអាល្លឺម៉ង់បានផ្តល់ជំនួយដល់អាហ្វហ្គានីស្ថានចំនួន ៤៣០ លានអឺរ៉ូ (ប្រហែល ៥០៥ លានដុល្លារអាមេរិក) ក្នុងឆ្នាំនេះ ហើយជាចំនួនមួយដែលអាល្លឺម៉ង់បានសន្យាផ្តល់ជារៀងរាល់ឆ្នាំ រហូតដល់ឆ្នាំ ២០២៤ ។

គួរបញ្ជាក់ថា កងទ័ពអាល្លឺម៉ង់ត្រូវបានដាក់ពង្រាយជាផ្នែកមួយនៃកម្លាំងណាតូនៅអាហ្វហ្កានីស្ថាន អស់រយៈពេលជិត ២០ ឆ្នាំរហូតដល់ខែមិថុនា ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ អាហ្វហ្គានីស្ថាន កំពុងវិលត្រឡប់ទៅការដួលរលំ និងសង្គ្រាមស៊ីវិលជាថ្មី បើ ក្រុមតាលីបង់ កាន់កាប់ប្រទេសនេះទាំងស្រុង