ក្រុមតាលីបង់ បាញ់គ្រាប់ពិតលើការតវ៉ា សម្លាប់បាតុករ ៤នាក់

អង្គការសហប្រជាជាតិ បានថ្កោលទោសក្រុមតាលីបង់ចំពោះ ការឆ្លើយតបដោយអំពើហិង្សាកាន់តែខ្លាំងឡើងរបស់ពួកគេលើក្រុមប្រឆាំង, ប៉ុន្មានសប្តាហ៍បន្ទាប់ពីក្រុមនេះ ចូលកាន់កាប់ប្រទេសអាហ្វហ្គានីស្ថាន។

UN និយាយថា យុទ្ធជនតាលីបង់ បានសម្លាប់មនុស្សចំនួន ៤ នាក់ អំឡុងការតវ៉ានាពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បាតុកម្មបានកើតឡើងនៅទូទាំងប្រទេសអាហ្វហ្គានីស្ថាន ចាប់តាំងពីការដួលរលំទីក្រុងកាប៊ុលកាលពីថ្ងៃទី ១៥ ខែសីហា ដោយបាតុករទាមទារឲ្យមានការគោរពសិទ្ធិស្ត្រីនិងសេរីភាពកាន់តែច្រើន។

UN បាននិយាយនៅក្នុងរបាយការណ៍របស់ខ្លួនថា ក្រុមយុទ្ធជនតាលីបង់ បានប្រើដំបងវាយ និងបាញ់គ្រាប់ពិតប្រឆាំងបាតុករ។

អ្នកនាំពាក្យឧត្តមស្នងការសិទ្ធិមនុស្សអង្គការសហប្រជាជាតិបាននិយាយនៅក្នុងសេចក្តីថ្លែងការណ៍មួយថា “យើងសូមអំពាវនាវឲ្យក្រុមតាលីបង់ បញ្ឈប់ជាបន្ទាន់នូវការប្រើកម្លាំង និងការឃុំខ្លួនតាមអំពើចិត្ត ចំពោះអ្នកដែលប្រើសិទ្ធិរបស់ពួកគេក្នុងការជួបជុំដោយសន្តិវិធីនិងអ្នកសារព័ត៌មានដែលផ្សាយការតវ៉ា”។

គួរបញ្ជាក់ថា ក្រុមយុទ្ធជនតាលីបង់ បានវាយលុកពាសពេញប្រទេសអាហ្វហ្គានីស្ថានកាលពីខែសីហា ដោយដណ្តើមបានខេត្តសំខាន់ ហើយទីបំផុត បានចាប់យករដ្ឋធានីកាប៊ុល ក្នុងរយៈពេលមិនដល់ពីរសប្តាហ៍ផង៕

ប្រែសម្រួល៖ Vann Vann

ប្រភព៖ BBC

ចុចអាន៖ តាលីបង់ បណ្ដេញមនុស្សរាប់ពាន់នាក់ចេញពីខេត្តរបស់ចលនាតស៊ូ អាហ្វហ្គានីស្ថាន ដើម្បីបោសសម្អាតជនជាតិភាគតិចនៅទីនោះ (មានវីដេអូ)