ព័ត៌មានអន្ដរជាតិ

អភិបាលខេត្តតាលីបង់ម្នាក់ផ្តាំទៅលោកខាងលិចមកវិញជាមួយលុយ មិនមែនអាវុធ

បានផុស

៥ years មុន

នៅ

ថ្ងៃព្រហស្បតិ៍ ១៦ កញ្ញា ២០២១

ដោយ

អភិបាលខេត្ត Helmand របស់តាលីបង់បានផ្ញើសារទៅកាន់ប្រទេសលោកខាងលិចឲ្យត្រឡប់មកប្រទេសអាហ្វហ្គានីស្ថានវិញជាមួយនឹងប្រាក់ ប៉ុន្តែមិនមែនមកជាមួយអាវុធនោះទេ។

អភិបាលខេត្ត Helmand ថ្មីរបស់តាលីបង់ដែលបានចំណាយពេលជាច្រើនឆ្នាំក្នុងនាមជាមេបញ្ជាការម្នាក់ប្រយុទ្ធជាមួយកងទ័ពអង់គ្លេសនៅទីក្រុង Sangin បានស្វាគមន៍ភ្ញៀវដោយបានដាក់កាំភ្លើងពីមុខលោកនៅលើតុ។ ប៉ុន្តែលោកបានទទួចថា ពេលវេលាសម្រាប់ប្រយុទ្ធគ្នាត្រូវបានបញ្ចប់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានផ្ញើសារទៅប្រទេសអង់គ្លេស ក៏ដូចជាប្រទេសជាសម្ព័ន្ធមិត្តណាតូផ្សេងទៀតឲ្យទទួលស្គាល់តាលីបង់ជាមេដឹកនាំស្របច្បាប់របស់អាហ្វហ្គានីស្ថាន ហើយបន្ទាប់មកត្រឡប់មកវិញជាមួយលុយ ប៉ុន្តែមិនមែនជាមួយអាវុធឡើយ។

លោក Talib Mawlawi ជាអ្នកស្រុកនៅខេត្ត Helmand បានតស៊ូប្រយុទ្ធដើម្បីតាលីបង់តាំងពីគ្រប់គ្រងអាហ្វហ្គានីស្ថានលើកទី១កាលពី២០ឆ្នាំមុនបាននិយាយថា ៖«យើងបានប្រឈមមុខដាក់គ្នានៅក្នុងសង្គ្រាម។ យើងមិនបានស្គាល់គ្នាក្នុងពេលធម្មតាទេ។ ឥឡូវនេះ អ្នកអាចយកឈ្នះបេះដូងរបស់ពួកយើង និងធ្វើឲ្យយើងសប្បាយចិត្តបាន ប្រសិនបើអ្នកទទួលស្គាល់រដ្ឋាភិបាលនេះ»។

ឥឡូវតាលីបង់បានកាន់កាប់ទីក្រុង Lashkar Gar ក្នុងខេត្ត Helmand ដែលការប្រយុទ្ធគ្នាបានឈប់ជាលើកដំបូងក្នុងរយៈពេលពីរទសវត្សរ៍កន្លងទៅ។ ភាគច្រើនបំផុតនៃទាហានអង់គ្លេស៤៥៧នាក់បានស្លាប់ក្នុងសង្គ្រាមដ៏យូរអង្វែងនៅខេត្តក្រីក្រមួយនេះ។

លោកបាននិយាយថា ៖«ប្រទេសបរទេសទាំងនោះបានឈ្លានពាន និងសម្លាប់ស្ត្រី កុមារ មនុស្សចាស់ របស់ពួកយើង ហើយបានបំផ្លាញអ្វីៗគ្រប់យ៉ាង។ ឥឡូវនេះ សហគមន៍អន្តរជាតិគួរជួយពួកយើងតាមរយៈជំនួយមនុស្សធម៌ និងផ្តោតលើការអភិវឌ្ឍវិស័យអប់រំ ពាណិជ្ជកម្ម និងអាជីវកម្ម»។

លោកបានបន្តថា ៖«សហគមន៍អន្តរជាតិជួយបណ្តាប្រទេសផ្សេងតាមរយៈការឧបត្ថម្ភដល់ជនស៊ីវិលរបស់ពួកគេ។ យើងបាននាំមកនូវសន្តិសុខ ហើយយើងគាំទ្រដល់ប្រជាជនរបស់យើង ដូច្នេះពួកគេគួរជួយ និងទទួលស្គាល់រដ្ឋាភិបាលរបស់យើង»៕

ប្រែសម្រួល៖ វីរបុត្រ
ប្រភព៖ theguardian

Related Topics:ក្រុមតាលីបង់