សីតុណ្ហភាពនៅទូទាំងប្រទេស ជប៉ុន ចុះត្រជាក់ខ្លាំងបំផុតរហូតដល់ដក ៥.៦ អង្សាសេ

ទីភ្នាក់ងារអាកាសធាតុរបស់ប្រទេសជប៉ុននិយាយថា សីតុណ្ហភាពត្រជាក់បំផុតនៃរដូវនេះត្រូវបានកត់ត្រានៅទូទាំងប្រទេសនៅព្រឹកថ្ងៃចន្ទនេះ ដោយសារតែម៉ាសខ្យល់ត្រជាក់ខ្លាំង ។

ខ្យល់ត្រជាក់បាននាំមកនូវព្រិលដំបូងនៃរដូវនេះធ្លាក់នៅទីក្រុង Wakkanai និងទីក្រុងដទៃទៀតក្នុងខេត្ត Hokkaido ភាគខាងជើងកាលពីប៉ុន្មានថ្ងៃមុន ។

ទន្ទឹមនោះ សីតុណ្ហាភាពដក ៥.៦ អង្សាសេត្រូវបានកត់ត្រានៅក្នុងទីក្រុង Shibecha របស់ខេត្ត Hokkaido ។ ចំណែកនៅទីក្រុង Morioka ភាគខាងជើងប្រទេសជប៉ុន សីតុណ្ហភាពធ្លាក់ចុះដល់ ៣.៥ អង្សា ខណៈ ៩ អង្សានៅទីក្រុង Nara និង ៩.២ អង្សានៅកណ្តាលទីក្រុងតូក្យូ ។

បន្ថែមពីនេះក៏មានភ្លៀង ឬព្រិលធ្លាក់នៅភាគខាងជើងប្រទេសជប៉ុនតាមបណ្ដោយឆ្នេរសមុទ្រជប៉ុន និងនៅតំបន់ភ្នំមួយចំនួនផងដែរ ខណៈទីភ្នាក់ងារអាកាសធាតុកំពុងដាស់តឿនប្រជាជនឲ្យប្រយ័ត្នចំពោះផ្លូវដែលកកបណ្ដាលមកពីការធ្លាក់ព្រិល ។

ស្របពេលជាមួយគ្នានេះ ទីភ្នាក់ងារក៏បានព្យាករណ៍ដែរថា សីតុណ្ហភាពពេលថ្ងៃជាមធ្យមនៅទីក្រុង Fukuoka និងទីក្រុង Osaka ភាគខាងលិចប្រទេសជប៉ុន នឹងឡើងដល់ ២២ អង្សាសេ ។

ប៉ុន្តែកម្រិតសីតុណ្ហភាពទាបជាងពេលថ្ងៃត្រូវបានរំពឹងទុកនៅភាគខាងកើត និងភាគខាងជើងប្រទេសជប៉ុន ហើយសីតុណ្ហភាពទំនងជានឹងឡើងដល់ ១៨ អង្សាសេនៅទីក្រុងតូក្យូ ១៥ អង្សាសេនៅទីក្រុង Sendai និង ៩ អង្សាសេនៅទីក្រុង Asahikawa ។

គួរបញ្ជាក់ថា នៅថ្ងៃចន្ទនេះផ្ទៃមេឃទទេរត្រូវបានគេមើលឃើញនៅតាមតំបន់ធំៗនៃប្រទេស ហើយសីតុណ្ហភាពបានធ្លាក់ចុះ ដោយសារស្ទើរតែគ្មានពពកដើម្បីស្រូបកម្ដៅទៅក្នុងលំហ ខណៈកម្រិតសីតុណ្ហភាពចុះត្រជាក់ពេញមួយយប់ ត្រូវបានកត់ត្រាជាធម្មតារហូតដល់ពាក់កណ្តាលខែវិច្ឆិកា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងត្បូង ជួបសីតុណ្ហភាពត្រជាក់បំផុតក្នុងរយៈពេល ៦៤ ឆ្នាំ តំបន់ខ្លះធ្លាក់ចុះដល់ក្រោមសូន្យ