ចិន បង្វែរការនាំចូល និងនាំចេញទំនិញរាប់រយប្រភេទតាមផ្លូវរថភ្លើង ចិន-ឡាវ វិញ

គិតត្រឹមថ្ងៃទី ៣ ខែមករា ផ្លូវដែកចិន-ឡាវ បានដំណើរការរថភ្លើងដឹកទំនិញចំនួន ១១៦ គ្រឿងឆ្លងកាត់ទីក្រុង Kunming ខេត្ត Yunnan ភាគនិរតីនៃប្រទេសចិន ដែលបានដឹកជញ្ជូនទំនិញជាង ៤៩,៨០០ តោន ដែលមានតម្លៃប្រហែល ៦៧៦ លានយ័ន (១០៦ លានដុល្លារ) ។

ចាប់តាំងពីចាប់ផ្តើមប្រតិបត្តិការប្រហែលមួយខែមុន ទំនិញរាប់រយប្រភេទត្រូវបានបង្វែរការនាំចូល និងនាំចេញតាមរយៈផ្លូវរថភ្លើងនេះវិញ ក្រោយមានវិធានការតឹងរ៉ឹងដើម្បីទប់ស្កាត់ការផ្ទុះឡើងវីរុសកូវីដ ។

បើយោងតាមគយទីក្រុង Kunming បានឲ្យដឹងថា ទំនិញនាំចូលសំខាន់ៗរួមមាន កៅស៊ូធម្មជាតិ រ៉ែដែក និងធ្យូង ខណៈដែលបន្លែស្រស់ របស់ប្រើប្រាស់ប្រចាំថ្ងៃ ក៏ដូចជាផលិតផលគ្រឿងម៉ាស៊ីន និងអគ្គិសនី គឺជាមុខទំនិញនាំចេញឈានមុខគេ ។

ទន្ទឹមនោះវាក៏កើតឡើង បន្ទាប់ពីប្រទេសចិនសម្រេចបិទច្រកត្រួតពិនិត្យ Donxing ដែលស្ថិតនៅជាប់ព្រំដែនវៀតណាមដើម្បីការពារការរីករាលដាលនៃជំងឺកូវីដ ១៩ ពីផលិតផលកសិកម្មនាំចូលមក ប៉ុន្តែអនុញ្ញាតឲ្យដឹកជញ្ជូនផ្លែឈើថៃតាមផ្លូវរថភ្លើងតាមរយៈច្រកព្រំដែន Ping Xiang ក្នុងតំបន់ស្វយ័ត Guangxi Zhuang ។

បច្ចុប្បន្ននេះ ទំនិញមកពីទីក្រុងចំនួន ១២ ក្នុងខេត្តចំនួន ៧ នៅទូទាំងប្រទេសចិនបានទៅដល់ប្រទេសឡាវដោយរថភ្លើងដឹកទំនិញអន្តរជាតិតាមរយៈផ្លូវដែកចិន-ឡាវ ហើយទំនិញមួយចំនួនត្រូវបាននាំចេញបន្ថែមទៅកាន់ប្រទេសមួយចំនួនទៀតរួមមាន មីយ៉ាន់ម៉ា ថៃ និងសិង្ហបុរី ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ បិទ វៀតណាម តែ ចិន បើកច្រកព្រំដែនឲ្យ ថៃ ដឹកផលិតផលចូល