ហុង​កុង​​​នឹង​​ធ្វើ​​តេស្ត​​កូវីដ​​ពល​រដ្ឋ​ទាំង​​អស់​​ត្រឹម​​តែ​៧​ថ្ងៃ

ប្រជាជនទាំងអស់ជិត៧.៥លាននាក់នៅទីក្រុងហុងកុងនឹងត្រូវធ្វើតេស្តរកកូវីដ-១៩នៅក្នុងខែមីនាខាងមុខ។ នេះជាការប្រកាសរបស់មេដឹកនាំរបស់ទីក្រុង ស្របពេល​វីរុសបំប្លែងខ្លួន Omicron កំពុងរាតត្បាតខ្លាំង។

លោកស្រី Carrie Lam មេដឹកនាំទីក្រុងហុងកុងបានឲ្យដឹងថា ប្រជាជនទាំងអស់នឹងធ្វើតេស្ត៣ដងក្នុងខែមីនា ហើយសមត្ថភាពធ្វើតេស្តនឹងបង្កើតឲ្យដល់១លាននាក់ ឬច្រើនជាងក្នុងមួយថ្ងៃ។ លោកស្រីមានប្រសាសន៍ថា ៖«ដោយសារយើងមានប្រជាជនប្រហែល៧លាននាក់ ដូច្នេះការធ្វើតេស្តនឹងចំណាយពេលប្រហែល​៧ថ្ងៃប៉ុណ្ណោះ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលបាននិយាយថា ការធ្វើតេស្តនឹងត្រូវបានកំណត់ពេលវេលាតាមឆ្នាំកំណើតរបស់អ្នកស្រុក ហើយពួកគេនឹងត្រូវការកក់ទុកជាមុន។ ការធ្វើតេស្តទ្រង់ទ្រាយធំ និងឧបករណ៍តេស្តតាមផ្ទះក៏គួរតែមានជាការធ្វើតេស្តផ្លូវការ។

លោកស្រី Lam បន្តថា ទន្ទឹមជាមួយគ្នានេះ ការសម្រេចចិត្តកាត់បន្ថយពេលវេលានៃការចាក់វ៉ាក់សាំងដូសទី២ និងទី៣នឹងត្រូវប្រកាសឆាប់ៗ។

ទីក្រុងហុងកុងមានខណ្ឌមានមួយចំនួនដែលមានប្រជាជនរស់នៅច្រើនបំផុតនៅលើផែនដីនេះ។ ចាប់តាំងពីថ្ងៃទី១៥ ខែកុម្ភៈមក ទីក្រុងហុងកុងមានករណីឆ្លងប្រហែលជា៥០០០នាក់ក្នុងមួយថ្ងៃដែលបានកំពុងគំរាមកំហែងដល់ប្រព័ន្ធសុខាភិបាល​យ៉ាង​ខ្លាំង។

ករណីឆ្លងកើនឡើងថ្មីនេះបានចាប់ផ្តើមកាលពីដើមឆ្នាំដែលធ្វើឲ្យករណីឆ្លងជាប់កំណត់ជិត៥៤០០០នាក់ និងស្លាប់​១៤៥នាក់។ ក្នុងសប្តាហ៍នេះ អ្នកជំនាញសុខភាពនៅសាកលវិទ្យាល័យហុងកុងបានព្យាករថា ការឆ្លងថ្មីអាច​ឡើងដល់កម្រិតខ្ពស់​បំផុត​គឺ១៨០ ០០០នាក់ក្នុងមួយថ្ងៃនាខែក្រោយ៕

ប្រែសម្រួល៖ វីរបុត្រ
ប្រភព៖ theguardian