កូរ៉េខាងត្បូង រើសបានប្រធានាធិបតីថ្មី

លោក Yoon Suk-yeol បេក្ខជនមកពី​គណបក្ស​អំណាច​ប្រជាជន ដែលជា​បក្ស​ប្រឆាំង ​បាន​ជាប់​ឆ្នោត​ជា​ប្រធានាធិបតី​របស់ប្រទេស​កូរ៉េខាងត្បូង។

នេះជាការដណ្តើមបានអំណាចមកវិញពីសំណាក់ក្រុមអ្នក​អភិរក្ស ​បន្ទាប់​ពី​ការ​ដឹក​នាំរយៈពេល ​៥​ឆ្នាំដោយ​អ្នកសេរីនិយម។

ការបោះឆ្នោតជ្រើសរើស​ប្រធានាធិបតីនេះ ​គឺមានភាពស្វិតស្វាញ​តាំង​ពី​ដើម​ដល់​ចប់ ដោយលោក Yoon បានយកឈ្នះលោក Lee Jae-myung មកពីគណបក្សប្រជាធិបតេយ្យដែលកំពុងកាន់អំណាចក្នុងលទ្ធផលខុសគ្នាមិនដល់ ១%ផង។

គួរបញ្ជាក់ថា លោក Yoon ដែលជាអតីតអគ្គរដ្ឋអាជ្ញា មិនមានបទពិសោធន៍ផ្នែកនយោបាយទេ ប៉ុន្តែលោកបានស្ថិតក្នុងក្រសែភ្នែកសាធារណជន។

ប្រធានាធិបតីផុតអាណត្តិលោក Moon Jae-in បានតែងតាំងគាត់នៅឆ្នាំ២០១៩។ លោក Yoon បានដឹកនាំការស៊ើបអង្កេតអំពើពុករលួយ និងជំរុញឲ្យមានកំណែទម្រង់ ហើយនៅទីបំផុតក៏លាលែងពីតំណែង។

ចាប់តាំង​ពី​ចូល​រួម​ជាមួយបក្ស​ប្រឆាំង​មក លោក​មាន​ជម្លោះ​ជាមួយ​លោក Moon ដែល​មិន​អាច​ឈរ​ឈ្មោះ​ជា​លើក​ទី​ពីរ​បាន​ដោយ​សារ​ការ​រឹតត្បិត​រដ្ឋធម្មនុញ្ញ។

គោលការណ៍សំខាន់បំផុតក្នុងយុទ្ធនាការឃោសនាបោះឆ្នោតរបស់លោក Yoon គឺសេដ្ឋកិច្ច៕

ប្រែសម្រួល៖ Vann Vann

ប្រភព៖ NHK

ចុចអាន៖ អូស្ត្រាលី ​ទិញ​កាំភ្លើងធំពីកូរ៉េខាងត្បូង ចំពេលមានភាពតានតឹងជាមួយ ចិន