ព័ត៌មានអន្ដរជាតិ

ស្ត្រីស្បែកខ្មៅដំបូង Jackson ក្លាយជាចៅក្រមនៅតុលាការកំពូលអាមេរិក

បានផុស

៤ years មុន

នៅ

ថ្ងៃសុក្រ ៨ មេសា ២០២២

ដោយ

លោកស្រី Ketanji Brown Jackson ទទួលបានការទុកចិត្តពីព្រឹទ្ធសភាកាលពីថ្ងៃព្រហស្បតិ៍ម្សិលមិញដើម្បីក្លាយជាស្ត្រីជនជាតិស្បែកខ្មៅដំបូងបង្អស់ក្នុងការក្លាយជាចៅក្រមនៅតុលាការកំពូលរបស់សហរដ្ឋអាមេរិក និងជាជ័យជម្នះសម្រាប់លោកប្រធានាធិបតី ចូ បៃដិន ដែលបានបំពេញការសន្យាអំឡុងពេលការឃោសនាបោះឆ្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំឡេងគាំទ្រស្ត្រីជាចៅក្រមសាលាឧទ្ធរណ៍វ័យ៥១ឆ្នាំដើម្បីទទួលបានការងារពេញមួយជីវិតលើស្ថាប័នតុលាការកំពូលរបស់ជាតិជាមួយសំឡេងគាំទ្រ៥៣ទល់នឹង៤៧ ដែលសមាជិកគណបក្សសាធារណៈ៣រូបគឺ Susan Collins, Lisa Murkowski និង Mitt Romney ចូលរួមជាមួយគណបក្សប្រជាធិបតេយ្យរបស់លោក បៃដិន។ សំឡេងភាគច្រើនសាមញ្ញត្រូវការជាចាំបាច់ ខណៈពេលលោកស្រី Jackson បានយកឈ្នះក្រុមប្រឆាំងបក្សសាធារណៈក្នុងដំណើរការបញ្ជាក់របស់តុលាការកំពូលដែលនៅមានការប្រកាន់បក្សពួកយ៉ាងខ្លាំង។

លោកស្រី Jackson នឹងជំនួសកន្លែងលោក Breyer អាយុ៨៣ឆ្នាំលើប្លុកសេរីនៃតុលាការមួយជាមួយនឹងសំឡេងអភិរក្សភាគច្រើន៦-៣។ លោក Breyer នឹងបំពេញតួនាទីរហូតដល់អាណត្តិរបស់លោកបញ្ចប់នាចុងខែមិថុនា ហើយលោកស្រី Jackson នឹងស្បថចូលកាន់តំណែងបន្ទាប់ពីនោះ។ លោកស្រី Jackson ធ្លាប់កាន់តួនាទីជាស្មៀនតុលាការកំពូលសម្រាប់លោក Breyer។

លោក បៃដិន បានស្វាគមន៍លោកស្រី Jackson នៅសេតវិមានដើម្បីមើលការបោះឆ្នោតតាមទូរទស្សន៍ និងបានបង្ហោះរូបលើ Twitter ដែលលោកបានថតសេហ្វីជាមួយលោកស្រីដែលបានបង្ហាញស្នាមញញឹម បន្ទាប់ពីព្រឹទ្ធសភាធ្វើការរួច។

លោកប្រធានាធិបតី ចូ បៃដិន បានសរសេរលើ Twitter ថា ៖«ការបញ្ជាក់របស់ចៅក្រម Jackson គឺជាប្រវត្តិសាស្ត្រសម្រាប់ជាតិរបស់យើង។ យើងបានបោះជំហានមួយទៀតនៅក្នុងតុលាការកំពូលរបស់យើងដែលឆ្លុះបញ្ចាំងពីភាពចម្រុះអាមេរិក។ លោកស្រីនឹងក្លាយជាចៅក្រមយុត្តិធម៌ដ៏អស្ចារ្យ ហើយខ្ញុំពិតជាមានកិត្តិយសដែលចែករំលែកពេលវេលានេះជាមួយលោកស្រី»។

ក្នុងចំណោមមនុស្ស១១៥នាក់បម្រើការជាចៅក្រមនៅតុលាការកំពូលចាប់តាំងពីបានបង្កើតឡើងជាផ្លូវការឆ្នាំ១៧៨៩មក មិនដែលមានចៅក្រមជាស្ត្រីស្បែកខ្មៅទេ ប៉ុន្តែក៏មានបុរសស្បែកខ្មៅពីររូបដែរដូចជាលោក Clarence Thomas និងលោក Thurgood Marshall។

លោកស្រី Jackson នឹងក្លាយជាស្ត្រីចៅក្រមទី៦ដែលបម្រើការនៅតុលាការកំពូលនេះ ប៉ុន្តែជាលើកដំបូងដែលមានស្ត្រីចៅក្រម៤រូបនឹងបម្រើការនៅតុលាការក្នុងពេលជាមួយគ្នា៕

ប្រែសម្រួល៖ វីរបុត្រ
ប្រភព៖ reuters