អាមេរិក ផ្ទុះការបាញ់ប្រហារថ្មី ២លើកទៀតក្នុងថ្ងៃតែមួយ

ប៉ូលិសនិយាយថា បុរសម្នាក់បានបាញ់សម្លាប់ស្ត្រីពីរនាក់នៅចំណតរថយន្តនៃព្រះវិហារមួយក្នុងរដ្ឋ Iowa កាលពីថ្ងៃព្រហស្បតិ៍ទី២ខែមិថុនា ហើយបន្ទាប់មក បានបាញ់សម្លាប់ខ្លួនឯង។

នេះជាហេតុការណ៍បាញ់បោះបណ្តាលឲ្យមានមនុស្សស្លាប់បន្ថែមទៀត បន្ទាប់ពីការបាញ់ប្រហារជាច្រើនលើក កក្រើកសហរដ្ឋអាមេរិក នាពេលថ្មីៗនេះ។

ការបាញ់ប្រហារនៅខាងក្រៅវិហារ Cornerstone ភាគខាងកើតទីក្រុង Ames នៃរដ្ឋ Iowa បានកើតឡើងភ្លាមៗ បន្ទាប់ពីលោកប្រធានាធិបតី Joe Biden ថ្លែងសុន្ទរកថាដ៏សំខាន់មួយ ស្តីពីអំពើហិង្សាដោយកាំភ្លើង។

ទន្ទឹមនឹងនេះ ការបាញ់ប្រហារមួយទៀតកាលពីថ្ងៃព្រហស្បតិ៍ដដែលនោះ បានបង្ករបួសដល់មនុស្សពីរនាក់ ខណៈពួកគេចូលរួមក្នុងពិធីបញ្ចុះសព នៅទីក្រុង Racine រដ្ឋ Wisconsin។

យោងតាមលោក Nicholas Lennie ប្រធានរងការិយាល័យតម្រួត Story County បាននិយាយថា “​នេះ​ហាក់​ដូច​ជា​ឧប្បត្តិហេតុ​ដាច់​ដោយ​ឡែក​ពី​គ្នា”។

គួរបញ្ជាក់ថា លោក Biden បានជំរុញឲ្យសភាហាមឃាត់អាវុធវាយប្រហារ ពង្រីកការត្រួតពិនិត្យសាវតារ និងអនុវត្តវិធានការគ្រប់គ្រងកាំភ្លើងផ្សេងទៀត ដើម្បីដោះស្រាយការបាញ់ប្រហារសម្លាប់រង្គាល៕

ប្រែសម្រួល៖ Vann Vann

ប្រភព៖ CNA

ចុចអាន៖ បាញ់សម្លាប់រង្គាលទៀតហើយនៅអាមេរិក លើកនេះ ស្លាប់ ៣នាក់និងរបួសច្រើននាក់