សហរដ្ឋអាមេរិក យល់ព្រមលក់ជំនួយយោធា ទៅឲ្យ តៃវ៉ាន់

មន្ទីរបញ្ចកោណបាននិយាយកាលពីថ្ងៃសុក្រទី១៥ខែកក្កដាថា ក្រសួងការបរទេសសហរដ្ឋអាមេរិក បានអនុម័តការលក់ជំនួយបច្ចេកទេសយោធា ទៅឲ្យកោះតៃវ៉ាន់ ក្នុងទំហំទឹកប្រាក់ប្រមាណ ១០៨ លានដុល្លារ។

ប្រទេសចិន នៅតែអះអាងប្រើកម្លាំងដើម្បីនាំតៃវ៉ាន់ឲ្យមកស្ថិតនៅក្រោមការគ្រប់គ្រងរបស់ខ្លួន ហើយកោះដែលគ្រប់គ្រងតាមបែបប្រជាធិបតេយ្យមួយនេះ បានត្អូញត្អែរអំពីការកើនឡើងសម្ពាធយោធាពីទីក្រុងប៉េកាំង។

ទោះសហរដ្ឋ​អាមេរិក ​មាន​ទំនាក់​ទំនង​ក្រៅ​ផ្លូវ​ការ​ជាមួយ​ក្រុង​តៃប៉ិក៏ដោយ ប៉ុន្តែ​ច្បាប់​អាមេរិក​តម្រូវឲ្យ ទីក្រុង​វ៉ាស៊ីនតោន ​ផ្តល់​មធ្យោបាយ​ការពារ​តៃវ៉ាន់ ហើយ​រដ្ឋបាល​របស់លោក​ប្រធានាធិបតី​ Joe Biden បាន​ប្តេជ្ញា​បង្កើន​ការ​ចូលរួម​ជាមួយ​កោះនេះ។

មន្ទីរបញ្ចកោណនិយាយថា តៃវ៉ាន់បានស្នើសុំជំនួយចុងក្រោយបំផុត រួមទាំងគ្រឿងបន្លាស់ និងជួសជុលសម្រាប់រថក្រោះ និងយានជំនិះប្រយុទ្ធ ព្រមទាំងជំនួយផ្នែកបច្ចេកទេស និងដឹកជញ្ជូនរបស់រដ្ឋាភិបាលអាមេរិក។

ទីភ្នាក់ងារសហប្រតិបត្តិការសន្តិសុខការពារជាតិរបស់មន្ទីរបញ្ចកោណ បាននិយាយនៅក្នុងសេចក្តីថ្លែងការណ៍មួយថា “ការលក់ដែលបានស្នើឡើងនេះ នឹងរួមចំណែកដល់និរន្តរភាពនៃយានជំនិះ អាវុធធុនតូច ប្រព័ន្ធអាវុធប្រយុទ្ធ និងធាតុជំនួយផ្នែកភស្តុភាររបស់អ្នកទទួល បង្កើ​នសមត្ថភាពរបស់ពួកគេក្នុងការទប់ទល់នឹងការគំរាមកំហែងនាពេលបច្ចុប្បន្ន និងអនាគត”។

វា​ក៏​នឹង​បង្កើន​អន្តរប្រតិបត្តិការ​យោធា ​របស់​តៃវ៉ាន់​ជាមួយ​សហរដ្ឋអាមេរិក និង​សម្ព័ន្ធមិត្ត​ផ្សេងទៀតផងដែរ ហើយ​កងកម្លាំង​ប្រដាប់អាវុធ​របស់​កោះ​នេះ ​នឹង​មិន​ពិបាក​ស្រូប​យក​ឧបករណ៍​និង​ជំនួយ​ឡើយ។

ទោះបីជាយ៉ាងណាក៏ដោយ ការជូនដំណឹងរបស់អាមេរិក មិនបង្ហាញថាតើកិច្ចសន្យា ត្រូវបានចុះហត្ថលេខា ឬការចរចាបានបញ្ចប់រួចហើយឬនៅនោះទេ។ ប៉ុន្តែក្រសួងការពារជាតិតៃវ៉ាន់ និយាយថា កិច្ចព្រមព្រៀងនេះត្រូវបានគេរំពឹងថានឹង រួចរាល់ ក្នុងរយៈពេលមួយខែ៕

ប្រែសម្រួល៖ Vann Vann

ប្រភព៖ CNA

ចុចអាន៖ តៃវ៉ាន់ បណ្តេញយន្តហោះចិន ២៩គ្រឿង ដែលលុកលុយ តំបន់ ការពារ ដែនអាកាស