ទីតាំងចំនួន២កន្លែងក្នុងខេត្តប៉ាធុំថានី ដែលបាន និងកំពុងផលិតចែកចាយ ប៊ីចេង អាជីណូម៉ូតូ និងម៉្សៅរ៉តឌី ក្លែងក្លាយ ត្រូវបានកម្លាំងជំនាញស្រាវជ្រាវរកឃើញ បន្ទាប់ពីទទួលបានពាក្យបណ្តឹងរបស់ក្រុមហ៊ុន អាជីណូម៉ូតូ ប្រចាំប្រទេសថៃ ថា មានប៊ីចេងក្លែងក្លាយលក់នៅលើទីផ្សារ។

កាលពីថ្ងៃទី២៨ ខែកក្កដា ឆ្នាំ២០២២ នេះ កម្លាំងតម្រួតប្រឆាំងបទល្មើសសេដ្ឋកិច្ចថៃ បានចុះស្រាវជ្រាវនិងបានរកឃើញទីតាំង ផលិតចែកចាយ ប៊ីចេង និងម៉្សៅរ៉តឌី កន្លែងក្លាយចំនួន២កន្លែង ដែលប៉ះពាល់ដល់កម្មសិទ្ធបញ្ញាផង និងអាចប៉ះពាល់ដល់សុខភាពអ្នកប្រើប្រាស់ផង។

ក្នុងកិច្ចប្រតិបត្តិការនេះ សមត្ថកិច្ចបានចុះទៅកាន់ចំណុចលំនៅឋានមួយកន្លែងក្នុងភូមិ៦ ឃុំបាងតឺយ ស្រុកសាមខូត ខេត្តប៉ាធុំថានី និងទីតាំងមួយកន្លែងទៀតក្នុងផ្ទះជួលមួយកន្លែង ក្នុងឃុំបានខ:យ៉ែង ស្រុកមឿង ខេត្តប៉ាធុំថានី។

ក្នុងនោះដែរសមត្ថកិច្ចបានឃាត់ខ្លួនម្ចាស់ទីតាំងបានចំនួន៣នាក់ ដែលជាជនជាតិថៃមានឈ្មោះ ១.ស្ងួន ចតុផុន ភេទប្រុស អាយុ៣០ឆ្នាំ។ ២.ស្ងួន ភុតអន ភេទស្រី អាយុ៤៣ឆ្នាំ និង៣. ស្ងួន មៀត ភេទស្រី អាយុ៥៧ឆ្នាំ ដែលពួកគេរួមគ្នាផលិតគ្រឿងឧបភោគក្លែងក្លាយ និងបានចែកចាយទៅលើទីផ្សារក្នុងខេត្តប៉ាធុំថានី និងខេត្តជិតខាងអស់មួយចំនួនធំទៅហើយ ។

ពួកគេបានសារភាពថា ពួកគេបានប្រើម៉្សៅ ម៉ូណូសូដៀម ក្លុយតាម៉េត ជាវត្ថុធាតុដើមសម្រាប់លាយធ្វើប៊ីចេង ហើយច្រកទៅក្នុងថង់អាជីណូម៉ូតូ ដែលពួកគេបានកូពីរួចជាស្រេច ដើម្បីបញ្ចេញលក់ទៅលើទីផ្សារ។

នៅពេលនោះដែរ សមត្ថកិច្ចបានដកហូតឧបករណ៍ផលិត និងវេចខ្ចប់ រួមជាមួយវត្ថុតាងជាច្រើនទៀត ដើម្បីបញ្ជូនជាមួយជនសង្ស័យទៅតាមផ្លូវច្បាប់ ៕

អត្ថបទ៖ សោ និយមរ័ត្ន