ថៃ ប្រកាសជ្រើសរើសកងទ័ពតាមអ៊ីនធឺណិត

ប្រទេសថៃកំពុងឆ្ពោះទៅរកការប្រកាសជ្រើសរើសកងទ័ពតាមរយៈបណ្ដាញអ៊ីនធឺណិតសម្រាប់ឆ្នាំ ២០២៣ ក៏ដូចជាដើម្បីបង្កើនការជ្រើសរើសឲ្យបានរហូតដល់ ៥១០ អង្គភាពទូទាំងប្រទេស ។​

លោកវរសេនីយ៍ឯក Ying Sirichan Ngathong អ្នកនាំពាក្យកងទ័ពជើងគោកថៃបាននិយាយថា កងទ័ពថៃបានប្រកាសជ្រើសរើសបុរសជនជាតិថៃដែលមានអាយុពី ១៨ ទៅ ២០ ឆ្នាំ និងអាយុពី ២២ ទៅ ២៩ ឆ្នាំ ដើម្បីចូលបម្រើកងទ័ពតាមរយៈប្រព័ន្ធអ៊ីនធឺណិត ។

លោក Ngathong បញ្ជាក់ថា ការធ្វើបែបនេះគឺស្របតាមគោលនយោបាយរបស់ក្រសួងការពារជាតិ ដើម្បីឆ្ពោះទៅរកប្រព័ន្ធយោធាស្ម័គ្រចិត្ត ដែលខកខានមិនបានជ្រើសរើសចាប់តាំងពីឆ្នាំ ២០២១ មក ។

ចំណែកសម្រាប់ឆ្នាំ ២០២៣ ក្រសួងការពារជាតិថៃ នឹងពង្រីកការជ្រើសរើសកងទ័ពតាមអ៊ីនធឺណិតនៅតាមទីភ្នាក់ងាររដ្ឋាភិបាលចំនួន ៣ រួមមាន អគ្គបញ្ជាការកងទ័ពថៃ កងទ័ពអាកាស និងកងទ័ពជើងគោក ដើម្បីផ្តល់ជម្រើសឲ្យកាន់តែច្រើនបន្ថែមទៀតសម្រាប់ការដាក់ពាក្យ ។

គួរបញ្ជាក់ថា សម្រាប់ឆ្នាំ ២០២២ កងទ័ពជើងគោកថៃបានជ្រើសរើសទាហានចំនួន ២៨,៦៤២ នាក់ដែលជាការកើនឡើងបើធៀបនឹងឆ្នាំមុន ៕

ប្រែសម្រួលដោយ ៖ គង់ សំអាន

ប្រភព ៖ Bangkok Biz News

ចុចអាន ៖ អ្នកជំនាញ ថៃ ព្រមានថា ទីក្រុងបាងកក ប្រឈមគ្រោះទឹកជំនន់ដ៏ធំដូចកាល ១០ ឆ្នាំមុន