ព័ត៌មានអន្ដរជាតិ

ភ្ញាក់ផ្អើល លេចវត្តមានព្រះរាជបុត្រ ព្រុយណេ អមបិតាទ្រង់យាងមក កម្ពុជា

បានផុស

១ year មុន

នៅ

ថ្ងៃព្រហស្បតិ៍ ១០ វិច្ឆិកា ២០២២

ដោយ

កាលពីម្សិលមិញនេះ ព្រះចៅស៊ុលតង់នៃប្រទេសព្រុយណេ បានយាងមកដល់កម្ពុជា ហើយអ្វីដែលគួរឲ្យភ្ញាក់ផ្អើលនោះគឺវត្តមានព្រះរាជបុត្រ Abdul Mateen អមព្រះបិតាទ្រង់មកកម្ពុជាដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈរូបភាពផ្សព្វផ្សាយអំពីព្រះរាជដំណើរមកដល់កម្ពុជារបស់ព្រះចៅស៊ុលតង់ Hassanal Bolkiah និងព្រះរាជបុត្រ Abdul Mateen គឺដើម្បីចូលរួមកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំកំពូលពាក់ព័ន្ធ ដែលនឹងប្រព្រឹត្តទៅនាសប្តាហ៍នេះ នៅសណ្ឋាគារសុខា រាជធានីភ្នំពេញ។

ដោយឡែក ព្រះរាជបុត្រ Abdul Mateen គឺព្រះអង្គម្ចាស់ដ៏ស្រស់សង្ហារបស់ប្រទេសព្រុយណេ ដែលទទួលបានព្រះកិត្តិនាមល្បីរន្ទឺលើបណ្ដាញសង្គមនានា ហើយទ្រង់ក៏ពុំដែលលាក់លៀមពីជីវិតខាងក្រៅរបស់ទ្រង់ឡើយ។ ព្រះរាជបុត្រ Abdul Mateen តែងបង្ហោះភាគច្រើន ជារូបលេងកីឡាផ្សេងៗ ហាត់ប្រាណ រូបជាមួយសត្វចិញ្ចឹម រូបក្នុងរាជវាំង ឬរាជដំណាក់ និងសម្ភារៈមានតម្លៃកប់ពពកជាច្រើន ព្រមទាំងការចូលរួមក្នុងកម្មវិធីជាមួយខ្សែរាជវង្សដទៃទៀតផងដែរ។

ជាងនេះទៅទៀត ក្នុងចំណោមសកម្មភាពកីឡាបុរសវ័យ ៣១ ឆ្នាំរូបនេះ ចេះលេងបាល់ទាត់, ជិះស្គី, ប្រដាល់, និងហែលទឹក ចំណែកសត្វដែលស្រលាញ់ គឺឆ្មារ និងកូនខ្លា។ បុត្រាទីបួននៃស្ដេចស៊ុលតង់ Haji Hassanal Bolkiah Mu’izzaddin Waddaulah រូបនេះ បានទទួលឋានៈយោធាលើកដំបូងក្នុងឆ្នាំ ២០១១ ក្រោយបញ្ចប់ការសិក្សាពីបណ្ឌិតសភាយោធា Sandhurst ដែលទ្រង់បានយាងចូលកាលពីព្រះជន្ម ១៨ វស្សា ដែលជាបេក្ខជនក្មេងជាងគេ។

សូមបញ្ចាក់ដែរថា ព្រះរាជបុត្រ Abdul Mateen បានបង្កការភ្ញាក់ផ្អើលយ៉ាងខ្លាំង បន្ទាប់ពីបុត្រាអង្គនេះបានយាងអមព្រះរាជដំណើរជាមួយព្រះបិតា ព្រះចៅស៊ុលតង់ Haji Hassanal Bolkiah Muizzaddin Waddaulah មកកម្ពុជា ខណៈក្សត្រទាំងពីរអង្គ ត្រូវបានគេមើលឃើញថា យាងបើកយន្តហោះពិសេស Boeing 787-800 ដោយព្រះអង្គឯងផ្ទាល់ នៅពេលចុះចតនៅអាកាសយានដ្ឋានអន្តរជាតិភ្នំពេញ នាវេលាម៉ោង ៤ និង ៣០ នាទីល្ងាច ថ្ងៃទី ៩ ខែវិច្ឆិកា ២០២២៕