អ្នកដំណើរសន្លប់រណែល ក្រោយជើងហោះហើរមួយរបើកទ្វារពេលកំពុងនៅលើអាកាស

ជើងហោះហើរក្រុមហ៊ុន Asiana Airlines ដែលចេញដំណើរពីកោះ Jeju-do ទៅកាន់ទីក្រុង Daegu ប្រទេសកូរ៉េខាងត្បូង បានបង្កឱ្យមានការភ្ញាក់ផ្អើលដល់អ្នកដំណើរជិត ២០០នាក់ ខណៈកំពុងហោះជិតដល់ទិសដៅ ស្រាប់តែទ្វារយន្តហោះរបើកឡើង។

យោងតាមរបាយការណ៍របស់ MBC បានឱ្យដឹងថា ច្រកចេញសង្គ្រោះបន្ទាន់របស់យន្តហោះ ស្រាប់តែរបើកភ្លាមៗ ពេលរៀបនឹងចុះចត ដែលធ្វើឱ្យអ្នក​ដំណើរ​ជា​ច្រើន​នាក់​បាន​ដួល​សន្លប់ ហើយអ្នកផ្សេងទៀតបាន​ស្រែក​ឆោឡោពេញយន្តហោះ។

ជាសំណាងល្អមិនមានអ្នករងរបួសធ្ងន់ធ្ងរនៅក្នុងហេតុការណ៍នេះនោះទេ ចំណែកជើងហោះហើរបានចុះចតដោយសុវត្ថិភាព។ ក្នុង​ចំណោម​អ្នក​ដំណើរ​ទាំង ១៩៤​នាក់​ នៅ​លើ​យន្តហោះ មាន ​៦​នាក់​បានជួបបញ្ហា​ពិបាក​ដកដង្ហើម ក្រោយហេតុការណ៍ភ្លាមៗ។

បើតាមការបញ្ជាក់ពីក្រុមហ៊ុនអាកាសចរណ៍ Asiana ពេលនេះមិនទាន់ដឹងពីមូលហេតុនៃការរបើកទ្វារយន្តហោះឡើយ ហើយពួកគេកំពុងស៊ើបអង្កេតអំពីបញ្ហានេះ៕

ប្រែសម្រួល៖ សន្យា

ចុចអាន៖ ក្រុមហ៊ុនអាកាសចរណ៍ វៀតណាម ត្រៀមភ្ជាប់ជើងហោះហើរជាមួយ កម្ពុជា និងឡាវឡើងវិញ