អ្នករួចជីវិតពីការវាយប្រហារប្រដាប់អាវុធនៅខេត្ត វៀតណាម ជាប់ កម្ពុជា រៀបរាប់ទាំងយំសោកក្នុងហេតុការណ៍សម្លាប់មនុស្ស

លោកវរសេនីយ៍ទោ Dam Dinh Bop ដែលបានរួចផុត និងរស់រានមានជីវិតពីការវាយប្រហារដ៏សាហាវនៅសាលាឃុំ និងប៉ុស្តិ៍ប៉ូលិសក្នុងខេត្ត Dak Lak នៃប្រទេសវៀតណាម ដែលមានព្រំប្រទល់ជាប់ខេត្តមណ្ឌលគិរីរបស់ព្រះរាជាណាចក្រកម្ពុជា កាលពីសប្ដាហ៍មុន បានរៀបរាប់ទាំងយំសោកចំពោះហេតុការណ៍ដែលសម្លាប់មនុស្សយ៉ាងឃោរឃៅនេះ ។

លោក Bop និងមិត្តភ័ក្រ្តម្នាក់ទៀតឈ្មោះ Le Kien Cuong ដែលបានរួចជីវិតពីការវាយប្រហារប្រដាប់អាវុធលើការិយាល័យគណៈកម្មាធិការប្រជាជនឃុំ Ea Ktur បានរៀបរាប់ទាំងទឹកភ្នែកថា នៅ​ម៉ោង​ប្រហែល ១ រំលង​អធ្រាត្រ​ថ្ងៃ​ទី​១១ ខែមិថុនា លោកបានទទួលទូរស័ព្ទមិនស្គាល់លេខមួយខ្សែ ហើយឮសំឡេងបុរសម្នាក់ប្រាប់ឲ្យលោកមកប៉ុស្តិ៍ប៉ូលិស ដោយសារប្រជាជនមានរឿងចង់ប្ដឹង ខណៈភ្លាមៗនោះ លោកក៏បានបើកឡានទៅដល់ប៉ុស្តិ៍ប៉ូលិសផងដែរ ។

នៅពេល​លោក Bop ​ទៅ​ដល់​ប៉ុស្តិ៍ប៉ូលិសដែល​មាន​ទីតាំង​ដូច​គ្នា​នឹង​ទីស្នាក់ការ​គណៈកម្មាធិការ​ប្រជាជន​ឃុំ មាន​មនុស្ស​មួយ​ក្រុម​បាន​ឡោម​ព័ទ្ធ​រថយន្តរបស់លោក ហើយលោកបានបើកកញ្ចប់បង្អួចឡាន និងសួរថាតើមានរឿងអ្វីកើតឡើង ។

លោក Bop បាននិយាយថា “ភ្លាមៗនោះ ពួកគេបានចាក់គាត់ជាច្រើនកាំបិត ខណៈអ្នកផ្សេងទៀតបានស្រែកថា សម្លាប់គាត់ទៅៗ ហើយបានគប់គ្រាប់បែកចូលទៅក្នុងឡានរបស់គាត់ផងដែរ ។ ក្រោយមកគាត់បានរត់ចេញពីឡានសំដៅទៅខាងក្រោយទីស្នាក់ការ ដោយដៃម្ខាងព្យាយាមបិទមុខរបួសនៅលើពោះកុំឲ្យឈាមហូរ” ។

ទន្ទឹមនោះ កាមេរ៉ាសុវត្ថិភាពក៏បានថតជាប់លោក Bop ប្រញាប់ប្រញាលចេញពីរថយន្តដែលកំពុងត្រូវភ្លើងឆេះ ហើយបានព្យាយាមស្រែកហៅឲ្យគេជួយ មុនពេលរត់ទៅដួលសន្លប់នៅសួនក្បែរនោះ ។ រហូតទាល់តែដល់ម៉ោង ៣ ទៀបភ្លឺ ទើបលោក Bop ត្រូវបានបញ្ជូនទៅមន្ទីរពេទ្យ ជាមួយនឹងរបួសជាច្រើនកន្លែង បាត់បង់ឈាម និងរលាកជើងផងដែរ ។

បន្ទាប់ពីដឹងខ្លួន និងទទួលបានការសម្រាកព្យាបាលនៅមន្ទីរពេទ្យ Central Highlands General Hospital, លោកវរសេនីយ៍ទោ Dam Dinh Bop ក៏និយាយទាំងទឹកភ្នែកផងដែរថា “ការឈឺចាប់ផ្នែករាងកាយរបស់ខ្ញុំនៅពេលនេះ គឺមិនអាចប្រៀបនឹងការឈឺចាប់នៃការបាត់បង់មិត្តភ័ក្រ្តរបស់ខ្ញុំបានឡើយ” ។

ក្រៅពីការិយាល័យគណៈកម្មាធិការប្រជាជននៅឃុំ Ea Ktur, ក្រុមប្រដាប់អាវុធមួយក្រុមនេះ ក៏បានវាយប្រហារការិយាល័យគណៈកម្មាធិការប្រជាជននៅឃុំ Ea Tieu ដែលនៅជិតខាងគ្នាផងដែរ ដោយបានសម្លាប់ឧត្តមសេនីយ៍ Tran Quoc Thang និងប៉ូលិសម្នាក់ទៀតឈ្មោះ Ha Tuan Anh ខណៈពួក​គេ​ក៏​បាន​សម្លាប់​មនុស្ស​ ៥ នាក់​ផ្សេង​ទៀត​ដែរ គឺ​មន្ត្រី​ឃុំ ២ ​នាក់ និង​ជន​ស៊ីវិល​ ៣ ​នាក់ ។

គួរបញ្ជាក់ថា គិតត្រឹមពេលនេះ មនុស្សសរុបចំនួន ៩ នាក់បានស្លាប់ ខណៈជនសង្ស័យ ៤៦ នាក់ត្រូវបានប៉ូលិសចាប់ឃាត់ខ្លួន ដោយពួកគេភាគច្រើនអ្នករស់នៅក្នុងខេត្ត Dak Lak ខណៈជនសង្ស័យម្នាក់ឈ្មោះ Y Chanh Nie បានសារភាពថា “មេរបស់ពួកគេបានសន្យានឹងនាំពួកគេទៅក្រៅប្រទេស និងផ្ដល់លុយឲ្យពួកគេក្លាយជាអ្នកមាន ឲ្យតែសម្លាប់អ្នកណានៅចំពោះមុខ” ៕

ប្រែសម្រួលដោយ ៖ ជីវ័ន្ត

ប្រភព ៖ VN Express

ចុចអាន ៖ មេខ្លោង​ស្ទើរតែ​ទាំងអស់ ​នៃ​ការវាយប្រហារ​នៅវៀតណាម ត្រូវបាន​ចាប់ខ្លួន